1 Ndangukulajiza hali meho ga Nguluwi na hali meho ga Kilistu Yesu yawele yowatagusa wanhu wawele wakomu na wabagame, kwa vila kanguya kulongoza heye yawele Mndewa. 2 Ndangukulajiza udamle awo usenga wa Nguluwi, ung'ang'anile kudamla kuli mhela unojile ama mhela haunojile na ung'anuche na kukanya na kuwakangaza nhumbula wanhu houwalangusa kwa wimililo weng'ha. 3 Mina, wokuya mhela uwele wanhu hawohulichiza ulanguso wa kukomya, ila wowinza maya gawo wawo na kikungajizila walangusa bwelele wowalonjela mbuli zila hela walingugana kuhulichiza. 4 Wolema kuhulichiza kukomya, wogalamchila ndano za udesi. 5 Ila, hegwe uwe wilolela kuli chila mbuli na wimilile magazo na ukole mijito ja munhu yalingudamla Mbuli Inojile na wime nzinzili kuli mijito ja hegwe kwa Nguluwi.

6 Mina kwa heni mhela wahabehi, wakulavigwa nhambiko na mhela wakubagama kwa heni ufika. 7 Ndikangaza kuli kubilima, ndita goya kota munhu yalingitwanza kuli kubilima na makundo ndigawika goya. 8 Sambi ipona hela kupegwa chonolo chila cha kudita ganojile hali meho ga Nguluwi na chonolo acho ndopegwa zuwa liwele Mkulu, yawele Mtagusa yalingutagusa goya na haiwele heni hela, ila hamwe na wala weng'ha walingubeteza kwa igano koneka kwa heye.

9 Wikangaze kuya kwa heni behi yiyi. 10 Mina Dema nakagana ng'hatu mbuli za isi ayi nakandeka kaluta Tesalonike. Kilesike nakaluta Galatiya na Tito nakaluta Dalimatiya. 11 Lukasi yaliyeka ndo yawele aha hamwe na heni. Umuhole Malichi uye naye, kwa vila koweza kunhanza kuli mijito ja heni. 12 Nandimlajiza Tukiko yalute kula Efeso. 13 Houkuya ndingalile ikoti lyangu nandililechile kwa Kalipo kula Tiloa, ndingalile kahi na vila vitabu, ng'hatu vila viditikwe kwa ngozi.

14 Yula mponzi yalinguchemigwa Alekizanda kanditila mbuli ya wihe winji, Mkulu komlipizila kwa ago madito ga heye. 15 Hegwe nagwe vivila wilolele naye kwa vila nakaulema ng'hatu usenga wa hetwe.

16 Mhela londali ndichigombela hala mwaluko kuduhu munhu nayemile ubanzi wa heni, weng'ha nawandeka. Ndangumlanda Nguluwi yawosele nongwa kwa mbuli ayo. 17 Ila Mkulu nakekala hamwe na heni, nakamha ludali, mbaka nambeza kuudamla usenga weng'ha, leka wanhu wa isi zinji wauhuliche, kahi nandoholigwa kuli utaguso wa kubagama kota vila kuloholigwa kuli mlomo wa isimba. 18 Mkulu kondohola na mbuli zeng'ha zihile na kunyhola aku yonyamila goya mbaka kuli undewa wa heye wa kilanga. Ukulu uwe wa heye mazuwa gose! Ena.

19 Uwalamse Pilisika na Akula, hamwe na lukolo lwa Onesifolo. 20 Elasito nakapona ako kuli isi ya Kolinto, naye Tilofimo nandimleka ako kuli isi ya Mileto kwa vila nayali mtamwa. 21 Udite himahima kuya mhela wa mbeho loung'hali kuya. Ebulo na Pude na Lino na Kilaudiya wangukulamsa, vivila na wanhu weng'ha walingumkunda Kilistu wangukulamsani.

22 Mkulu yawe na hegwe kuli muhe wa hegwe. Kunoga kwa Nguluwi kuwe na hemwe mweng'ha.