1 Lelo, hegwe mwanangu, uwe na ludali kuli kunoga kwa Nguluwi kotupegwe kuli kilumba na Kilistu Yesu. 2 Uhole gala malanguso gouhuliche ndidamla hali walolezi wenji, ukawalanguse gago wanhu walingukundigwa, wala wawele woweza kuwalangusa wanji kahi. 3 Nagwe wimilile kuli magazo hamwe na hetwe kota mkola mijito yanojile kwa Kilistu Yesu. 4 Mwamizi yawele kuli ngondo, kangiwika kutali na mijito ja kikala kwa chila zuwa, ila kangudita mijito ja kuli ngondo leka yaweze kumnojeza chilongozi wa wamizi. 5 Vivyo du, munhu yalingitwanza na wayage kuli kubilima, howeza kusumya na kupegwa chonolo cha kusumya, mbaka yagomanjize malajizo gawichigwe. 6 Mlimi yalimile ng'hatu ndo kangulapigwa yawe wa mwaluko kupegwa mbena. 7 Wijese aga gondilingukulonjela, mina Mkulu kokutanza uvizele chila chinhu.

8 Mkumbuche Yesu Kilistu yazilipuligwe, nayali wa lukolo lwa Daudi, kota vyoilingulonga Mbuli Inojile yondilingudamla 9 na yila kwa chiwalo cha heye heni ndangugazika na mbopigwa minyololo kota munhu yawele ngudita wihe. Ila ulonzi wa Nguluwi hauweza kuwopigwa na minyololo. 10 Ahyo, ndangwimilila chila chinhu kwa chiwalo cha wala wahaguligwe na Nguluwi, leka hewo kahi wapegwe ulohozi ulinguya kwa kukolela Yesu Kilistu, ula ulingigala ukulu wa mazuwa gose. 11 Ulonzi awu ndo wa kukomya,

"Wone natubagama hamwe na Kilistu,

kahi tochikala hamwe na heye.

12 Lotulutilila kwimilila,

kahi tolongoza hamwe na heye.

Hotumbela, naye kahi kotubela hetwe.

13 Lotuwa wanhu hatuwele wa kukundigwa,

heye kangupona wakukundigwa mazuwa gose,

mina heye howeza kibela yuye."

14 Lelo, uwalonjele wanhu wa hegwe waleche kusemwa mbuli azi na kuwakanya hali Nguluwi waleche kitwanza kwa mbuli ya ulonzi. Kitwanza ako hakunojile, mina kwangigala hela kuwifya kukulu kwa wala walinguhulika. 15 Wikangaze kudita galingumnojeza Nguluwi uwe chitumagwa yohambe yone soni kuli mijito ja heye na yawele kulangusa ulonzi wa kukomya wa Nguluwi kota vyoilinguganigwa. 16 Wiyuse na nhelo za chipoka na hazilingumnojeza Nguluwi, kwa vila azo zangonjeza kuwadita wanhu wekale kutali na Nguluwi. 17 Malanguso gawele ahyo ndo gafanda kota chilonda chilingudakula lukuli. Wanhu wamwe walanguse chinhu acho ndo Humenayo na Fileto. 18 Awa wajilila ng'hatu kutali na mbuli ya kukomya na wanguhulichiza makundo ga wanhu wanji kuli lunhwinhwi kwa kulonga uzilipulo wa hetwe tulingubeteza mina ukoleka. 19 Ila kukomya kwa Nguluwi kwima nzinzili kota iganga lya msisi na mchanya mwake wandichigwa ulonzi awu, "Mkulu kanguwazela wala wawele wa heye," na "Chila yalingulonga heye ndo wa Mkulu, ndo yaleche wihe."

20 Kuli ng'handa ng'hulu kuna visaye na vinhu vya chila mbuli, vinji ndo vya sendi nyinji na zahabu na vinji vigongomanywa kwa migodi na ilongo na vinji vyakatogo hela na vinji vyangukolelwa mijito kwa mbuli za chila zuwa. 21 Lelo, wone munhu yewiche yawe yelile kwa kibagula kutali na mbuli zihile, kowa chinhu cha mijito ya uyeng'ha, kwa vila kahaguligwa na kangumnojeza Mkulu wa heye na kewika goya kwa chila mijito jinojile. 22 Wiyuse na maya ga chisongolo, udite gatanganiche na makundo na igano na kikala goya hamwe na wanhu weng'ha wawele wangumlanda Mkulu kwa nhumbula ilihela nongwa. 23 Wiyuse kitwanza kwa chipoka, uvizela kota ago gegalaga kilewa. 24 Chitumagwa wa Mkulu halinguganigwa kilewa. Yangumlapa yawe liholile kwa wanhu weng'ha, yavizelele kulangusa na yalingwimilila, 25 yawele ndo liholile hoyowakanya wala walingumbela heye, kwa vila hanji Nguluwi kowapa mhumu ya kumgalamchila heye, leka wakuzele kukomya. 26 Ahyo, nyhala za hewo zowahiluchila kahi, nakuwadita wasulupuche kuli idiwa lya Limazoga liwagwilize na kuwadita wawinze goyalingugana heye.