1 Ukumbuchile kota, kuli mazuwa ga kuduma kowa na mhela wa magazo. 2 Wanhu wowa wochigana wawo hela, wawele na maya ga sendi na wawele ngidaya na wawele ngiwona watanganika na walingumliga Nguluwi na wawele hambe wawahulichize wahaza wa hewo na wohambe walonje malumbo na wehile, 3 wolawila wanhu walihela igano mnhumbula na walihela isungu na wasonjelezi na wawele na maya na walingung'hanuka, wozudizwa na choneche chiwele chinojile, 4 wowa wowahinduka wayawo na wajuvi na wamemile ibamba na wogana kiheweza ng'hatu ne kumgana Nguluwi. 5 Kwa kuwalola wokoneka kota wanhu walingumfugamila Nguluwi, ila wolema mong'ho wake. Wiyuse ng'hatu na wanhu awo. 6 Wanhu wamwe walutaga kuli ng'handa za wanhu na kuwahada wadala ng'hochele wamemile mitunyo ja gehile na walingulongozwa kwa maya ga chila mbuli, 7 wadala awo wawele ngujeza kilangusa mazuwa gose, ila hawoweza kuvizela kukomya. 8 Wanhu awo wangulema kukomya kota vila Yane na Yambule navyowambelile Musa. Wanhu awo luhala lwawo lwajilila na makundo ga hewo ga udesi. 9 Ila wanhu awo hawoweza kulutilila ng'hatu mina upoka wa hewo wokoneka hazelu kwa weng'ha. Ndo vyoili kwa Yane na Yambule.

10 Ila hegwe, kuwinza malanguso ga heni na vyondikale heni na mbuli ya heni kuli ukomu na makundo na wimililo wa heni na igano lya heni na ubetezo wa heni, 11 kugaya kwa heni na magazo gangu. Kugazela geng'ha gandawile ako Antiokiya na Ikonio na Lustila. Nanyimilila mbuli zeng'ha ng'hulu zilawile! Ila Mkulu nakandohola kuli mbuli azo zeng'ha. 12 Chila munhu yalingugana kikala kuli ukomu wa kumnojeza Nguluwi kuli kilumba na Kilistu Yesu, kogazigwa. 13 Wanhu wehile na wahadi wowa wehile ng'hatu, wowahada wanji, nawo wawo wohadigwa. 14 Ila hegwe ulutilile kikala kuli kukomya kula koulanguswe naukundile ng'hatu. Kwa vila kuwazela goya wala wawele nawakulanguse, 15 kwangukumbuka kota kulawila vyouwele mwana kugazela Maandiko Matakatifu gawele goweza kukupa luhala lulingigala ulohozi kwa kukolela makundo gawele kwa Kilistu Yesu. 16 Maandiko Matakatifu gandichigwa kwa kuwichigwa Muhe wa Nguluwi na ganoga kwa kulangusa kukomya na kukanya wanhu kuli wihe wa hewo na kuwika goya wihe wowaditile na kuwalongoza wanhu wekale kuli ukomu wa kumnojeza Nguluwi, 17 leka munhu yalingumkunda Nguluwi yawe yanojile ng'hatu na yawe yewichile goya kudita mijito jinojile.