1 Heni Paoli, mtumigwa wa Nguluwi na msenga wa Yesu Kilistu ndangwandika. Heni nyhaguligwa kutanza kuzenga makundo ga wahaguligwe na Nguluwi, leka kuwalongoza wavizele kukomya na kikala kwa kumnojeza Nguluwi, 2 kukomya ako kwangutigalila utumbilo wa ukomu wa mazuwa gose. Nguluwi yawele hambe yalonje udesi, nayalagane hala isi hainalumbigwa, kotigalila ukomu awo 3 na mhela utanganiche loufichile, nakakundigwa yagubule kuli usenga wa heye kwa kudamla. Heni namhegwa usenga awo ndiudamle kota navyoyalajize Nguluwi, Mlohozi wa hetwe.

4 Ndangukwandichila hegwe Tito, mwanangu wa kukomya kuli makundo ga hetwe. Nguluwi Mhaza na Kilistu Yesu Mlohozi wa hetwe, wakupe isungu lyawo na kikala goya.

5 Nandikuleka Kilete leka uwiche goya zila mbuli nalozing'hali kugongomanywa goya na kuwahagula wasekulu wa chilundo cha wanhu walingukunda Kilistu kuli chila muji, kota vyondikulajize. 6 Sekulu yahaguligwe chilongozi wa chilundo cha wanhu walingumkunda Kilistu, imlapa yawe munhu yawele hela nongwa, yawele na mdala yumwe hela na wana wa heye wanguganigwa wawe walingumkunda Kilistu, hawalinguzeleka kota wajuvi ama wawele wohambe wahulichize. 7 Mina kwa vila chilongozi wa chilundo cha wanhu walingumkunda Kilistu, ndo yalingulola mijito ja Nguluwi, yangumlapa yawe munhu yawele hela nongwa. Yawe yohambe yedaye na yohambe yazudile himahima na yohambe yagale na mjuvi ama mbuhu na yalingugana ndolendole. 8 Imgana yawe na nhumbula ya kuwabochela wajenzi na yalingugana mbuli zinojile. Yangumlapa yawe na luhala na yalingudita mbuli kota vyoilinguganigwa na yalingudita galingumnojeza Nguluwi, yelile na yawele na madito ganojile na yalingilongoza yuye. 9 Imgana yebatilile goya usenga ula wa kukomya kota vyoulingulanguswa. Ndo vyoyoweza kuwakangaza nhumbula wanhu wanji kwa malanguso galingukomya ng'hatu na kuziwika hazelu nongwa za wala wohambe wakunde malanguso ago.

10 Mina, wabaho wanhu wenji wala walawile kuli chilundo cha Chiyahudi wawele ngumkunda Kilistu, wawele ndo wajuvi na walinguwajiliza wanji kwa upoka wawo. 11 Igana kuwang'hanuchila waleche ulonzi wa hewo, kwa vila wanguwifya lukolo lweng'ha kwa kulangusa mbuli zohaziganigwe kulanguswa, wangudita ahyo leka wapegwe sendi. 12 Yumwe wa waloli wa hewo, yawele Mkilete, nakalonga, "Wakilete wangulonga udesi mazuwa gose, ndo wafanda kota migongolo jihile, migata na jilingugana kulya lukami!" 13 Mbuli ayo ndo ya kukomya, kwa chiwalo acho, kwangulapigwa uwang'hanuchile ng'hatu, leka wawe wemile nzinzili kuli makundo. 14 Waleche kulutilila kuhulichiza ndano za udesi hela za chiyahudi na malajizo ga chiwunhu galingulawila kwa wanhu walemile kukomya. 15 Chila chinhu ndo nachela kwa wanhu welile, ila kuduhu chinhu chelile kwa wanhu wehile na wohambe wamkunde Nguluwi, kwa vila luhala na ludali lwa hewo luwifigwa. 16 Wanhu kota awo wangidaya kota wamzela Nguluwi, ila kwa madito gawo wangumbela. Ndo wanhu wa kuzudiza ng'hatu na wajuvi, hawawele wanojile kuli kudita mbuli yoneche inojile.