1 Lotulemwele kwimilila natwamula kusigala tuliyeng'ha kukula Asene 2 na kumlajiza kwa hemwe mng'holozetu Timoteyi, yawele ndo mkola mijito muyetu kwa chiwalo cha Nguluwi kuli kudamla Mbuli Inojile ya Kilistu. Natumlajiza leka yawakangaze nhumbula na kuwakangaza kuli makundo ga hemwe, 3 leka makundo ga munhu yoneche hali hemwe galeche kutigasika kwa chiwalo cha magazo ago. Hemwe namvizela kota twanguganigwa kupegwa magazo. 4 Kwa vila lotuwele hamwe na hemwe, natuwalonjela kota togazigwa na nailawila hihyo. 5 Ahyo, londemwele kwimilila, nandimlajiza Timoteyi kwa hemwe leka ndivizele mbuli za makundo ga hemwe. Ileche kuwa hanji mwihe nakawajeza na mijito yeng'ha jotujiditile hali hemwe jajilile hela!

6 Sambi Timoteyi nakahiluka, naye nakatulonjela mbuli zinojile kwa chiwalo cha makundo na igano lye hemwe. Nakatulonjela kota mwangutukumbuchila mazuwa gose na kota mwangugana kutona kota hetwe vyotuwele ngugana ng'hatu kuwona hemwe. 7 Lelo wang'holozangu, kwa mbuli ya makundo ga hemwe nagatukangaza nhumbula ng'hatu, kuli nongwa na magazo ga hetwe geng'ha, 8 sambi twangikala goya wone hemwe mwangwima nzinzili kuli kilumba na Mkulu. 9 Sambi toweza kulonga malumbo kwa Nguluwi wa hetwe kwa chiwalo cha hemwe. Twangulonga malumbo kwa kusangalala kotuwele nako hali heye kwa chiwalo cha hemwe. 10 Twangulutilila kumlanda Nguluwi nechilo na nemisi kwa nhumbula ya hetwe yeng'ha leka tuwe na mhumu ya kuwona hemwe meho kwa meho leka tujeze kuwika goya gapunguche kuli makundo ga hemwe.

11 Twangumlanda Nguluwi, Mhaza wa hetwe, na Mkulu wa hetwe Yesu, yatuchumulile nzila ya kuya ako kwa hemwe. 12 Mkulu yawonjezele ng'hatu hemwe igano na kuwagana wanhu weng'ha lukami, kota vila hetwe vyotulinguwagana hemwe. 13 Ahyo kozidita nhumbula za hemwe ziwe nzinzili, namwe mowa mlihela nongwa na mowa welile hali Nguluwi na Mhaza wa hetwe mhela wa Mkulu wa hetwe Yesu hoyokuya hamwe na wanhu wa heye weng'ha.