1 Lelo hemwe mzilipuche hamwe na Kilistu, mijese ng'hatu mbuli za kilanga, kula Kilistu koyali, nakekala kuli ubanzi wa kudilo kwa Nguluwi. 2 Muwe mchijesa ng'hatu mbuli za ako kilanga, haiwele mbuli za hano muisi. 3 Kwa vila hemwe nambagama na ukomu wa hemwe nauvisigwa hamwe na Kilistu kuli Nguluwi. 4 Ukomu wa hemwe ndo Kilistu na mhela hoyolawila ndo namwe kahi homlawila na kihanza hamwe na heye kuli ukulu.

5 Lelo mkopole choneche chiwele mgati mwa hemwe chiwele ndo cha isi, mina ndo ung'hondwa na wavu na maya gehile na majesa gehile na maya ga kuwa na lufufu lwinji ndo kufugamila jimalukolo. 6 Kwa chiwalo cha mbuli azo kuzudila kwa Nguluwi kowuyila weng'ha wohambe wamhulichize. 7 Kuli mhela umwe hemwe kahi namikala kwa kudita mbuli azo, ukomu wa hemwe houwinzile mbuli azo. 8 Ila sambi mwanguganigwa kuleka mbuli azi zeng'ha, kuzudila na maya na wihe na kuliga na ulonzi wihile uleche kulawa kuli milomo ja hemwe. 9 Mleche kilonjela udesi, kwa vila hemwe namvula ula wunhu wa katali hamwe na madito gake geng'ha gehile. 10 Namvala wunhu unyale. Awu wangulutilila kugaluswa na Nguluwi, yawele nakaulumba, kwa kiwhana na heye leka mumzele Nguluwi ng'hatu. 11 Kuli mbuli ino, haduhu kahi Mgilichi ama Myahudi, yenjile ikumbi ama yula henjile ikumbi, mjenzi ama mwenyeng'haye, mpogozi na yelejehe. Kilistu ndo chila chinhu na kamumo kuli geng'ha.

12 Hemwe mwa wanhu wa Nguluwi, heye nakawagana na kuwahagula muwe wa heye. Ahyo, lelo mvale nhumbula ya isungu na nhumbula inojile na uliholile na kunyenyetela na kwimilila. 13 Mwimilile mwemwe na kilechela, wone munhu kowa na mbuli yoneche kwa myage, kanguganigwa kulechela gakoleche kota Mkulu vyoyawalechele hemwe. 14 Kwa ago geng'ha, mibatilile igano kwa vila igano naliting'hanizaga chila chinhu kuli uhamwe wenele. 15 Nako kikala goya kwa Kilistu kuwe kuli nhumbula za hemwe, kwa vila Nguluwi nakawachema leka mikale goya kuli lukuli alo lumwe. Kahi mlonje malumbo. 16 Ulonzi wa Kilistu naumema ng'hatu mgati mwa hemwe. Milanguse na kikanya kwa nyhala zeng'ha. Mwimbe zabuli na nzimbo za kumtogola na kumfugamila Nguluwi. Kuno mumwimbila Nguluwi mlonga malumbo mnhumbula za hemwe. 17 Na chila chomdita kwa ulonzi ama madito, mdite mweng'ha kwa itagwa lya Mkulu Yesu na kulonga malumbo kwa Nguluwi Mhaza kwa kukolela heye.

18 Hemwe wadala, muwahulichize walume wa hemwe, kwa vila ndovyoyogana Mkulu. 19 Na hemwe walume, muwagane wadala wa hemwe na mleche kuwa mng'ang'ale kwa hewo.

20 Hemwe wana, muwahulichize wa mamo na wahaza wa hemwe kwa chila chinhu, kwa vila acho ndo chilingumnojeza Mkulu.

21 Namwe wahaza, mleche kuwadita wana wa hemwe wazudile kwa kuwaditila vibi, leka waleche kutweguka nhumbula.

22 Hemwe wapogozi, muwahulichize wakulu wa hemwe wa muisi kuli mbuli zeng'ha na haiwele mhela howalinguwalola kwa vila mwangugana kinojeza kwa hewo, ila mdite ahyo kwa nhumbula yeng'ha, kwa chiwalo cha kumdumba Mkulu. 23 Chila chomdita, mdite kwa nhumbula yeng'ha, kota vila mwangumditila Mkulu Yesu na haiwele munhu. 24 Mvizele kota mobochela chonolo kulawa kwa Mkulu Yesu choyawawichile wanhu wa heye, kwa vila mwangumkolela mijito Mkulu Yesu Kilistu! 25 Yalingudita wihe, kohilusilwa wihe wa heye vyouwele, Nguluwi halingutagusa kwa kulola kumeho.