1 Ndaze, kikala kwa hemwe kuli kilumba na Yesu Kilistu kwanguwakangaza? Ndaze, igano lya heye lyanguwahembuliza? Ndaze, mwahamwe na Muhe Yelile na mnaisingu kwa chiwalo cha hemwe na nhumbula zinojile? 2 Lelo mndite heni sangalale ng'hatu kwa kuwa na majesa ga uhamwe na igano limwe na nhumbula imwe na kunuwila kumwe. 3 Mleche kudita chinhu choneche kwa fihi ama kwa kidaya hela, ila muwe mlingunyenyetela na chila yumwe yamone myage kota nakatanganika kusinda heye. 4 Chila munhu yaleche kupala mzidi wa heye yuye hela, ila yapale mzidi kwa chiwalo cha wanji. 5 Muwe na kunuwila kukula koyawelenako Yesu Kilistu.

6 Hanga heye nayali Nguluwi ng'hatu,

Ila hejesile kota kula kiwhana na Nguluwi, ndo chinhu cha kibatilila.

7 Ila kwa kugana kwa heye yuye,

nakagaleka ago geng'ha, nakedita chitumagwa,

nakapondigwa kota munhu,

kota vila wanhu wanji vyowalingupondigwa.

8 Nakanyenyetela na kuhulichiza mbaka nakabagama,

ena, nakabagama kuli msalaba.

9 Kwa mbuli ayo, Nguluwi nakamkwiniza kuchanya ng'hatu,

nakapegwa itagwa liwele likulu kusinda matagwa geng'ha.

10 Leka kwa itagwa lya Yesu,

vilumbigwe vyeng'ha kilanga na kuli isi na kuli isi ya wabagame,

vimfugamile heye

11 na chila umyango ulonje, Yesu Kilistu ndo Mkulu,

kwa ukulu wa Nguluwi Mhaza.

12 Lelo wang'holozangu, kota vila vyomlingunyhulichiza mazuwa geng'ha, mbaka mhela awu lombele kutali na hemwe mlutilile kuhulichiza. Mkole mijito kwa kudumba na kukakama kwa chiwalo cha ugombozi, 13 kwa vila Nguluwi ndo yalingukola mijito mgati mwa hemwe na kuwapa hemwe ludali lwa kudita mbuli zoyalingugana heye yuye.

14 Mdite chila chinhu ne kung'ung'uta na kuwa hela kitwanza, 15 leka muwe welile na mleche kung'hung'utilwa, kota wana walingumhulichiza Nguluwi walingikala kuli isi yihile yajilile. Mopulika hali hewo kota nhondwe vyozilingumwemwesa kuli ulanga 16 wone mibatilile ng'hatu usenga ulingigala ukomu. Aho ndo hondiwa na mbuli ya kidaya kwa hemwe kuli zuwa liwele Kilistu kohiluka, kwa vila yokoneka hazelu kota kikangaza kwa heni na mijito ja heni havyajilile hela.

17 Wone ukomu wa heni wolavigwa leka uwe kota nhambiko hamwe na mijito ja hemwe jilingukundigwa ndosangalala ng'hatu hamwe na hemwe kuli usangalalo awo. 18 Hihyo du namwe mwanguganigwa kusangalala hamwe na heni awo usangalalo wa hemwe.

19 Kuli kilumba na Mkulu Yesu ndangitumbila kota ndoweza kumlajiza Timoteyi kwa hemwe kuli mhela awu wa habehi, leka ng'hangazwe nhumbula kwa kuhulika mbuli za hemwe. 20 Ndahela munhu yunji kota heye yalinguwalolela kwa nhumbula yeng'ha. 21 Wanji wangulolela mbuli za hewo hela honhu ha kulolela mbuli za Yesu Kilistu. 22 Hemwe mwangumzela Timoteyi vyoyawele nzinzili, heye hamwe na heni ndo kota mwana na mhaza kuli kudamla Mbuli Inojile. 23 Ahyo, ndangitumbila kota ndomlajiza kwa hemwe hima hala du hondivizela mbuli za heni vyozilingulutilila. 24 Ndangitumbila kwa Mkulu kota nani kahi ndabehi kuya kwa hemwe.

25 Ndangona kota naingana kumlajiza kwa hemwe mng'holozetu Epafulodito, yalingukola mijito hamwe na heni, yawele ndo mwamizi hamwe na heni, yawele kahi ndo msenga wa hemwe yawele namumlajiza yamhe heni vinhu vyondilinguganigwa kupegwa. 26 Kangugana ng'hatu kuya kuwona hemwe, nakang'ung'uta lukami hala loyavizele kota hemwe namhulika kota heye nayali mtamwa. 27 Ena, nayali mtamwa habehi nakubagama. Ila Nguluwi nakamonela isungu, haiwele heye yaliyeka ila nani kahi leka ndeche kuwa na usungu ng'hatu. 28 Lelo ndangugana ng'hatu kumlajiza kwa hemwe, leka hommona msangalale kahi na masinzo ga heni goche. 29 Lelo mumbochele kwa usangalalo weng'ha kota mng'holozenu kwa Mkulu. Mwanguganigwa kuwahulichiza wanhu wawele kota heye, 30 kwa vila heye nayali habehi kubagama kwa chiwalo cha mijito ja Kilistu, nakambuza ukomu wa heye wajilile leka yanhanze kwa utanzi ula uwele hemwe hamuwezile kuugala.