1 Lelo heni nda mnweng'wa kwa vila ndangumfugamila Mkulu, ndanguwalanda mikale kota Nguluwi vyoyalingugana mikale. 2 Mhela weng'ha msindamale na muwe liholile na muwe na kubeteza, mwimilile mwemwe baho kwa igano. 3 Mikangaze kwa chiwalo cha kulutilila kuwa hamwe kulingugaligwa na Muhe kwa kukolela kikala goya kuwele hali hamwe. 4 Kuna lukuli lumwe lwa Kilistu na Muhe Yelile yumwe, kota vila kitumbila kumwe komchemelwe na Nguluwi. 5 Hana Mkulu Nguluwi yumwe na kukunda kumwe na ubatizo umwe. 6 Hana Nguluwi yumwe yawele ndo Mhaza wa weng'ha, yawele Mkulu wa weng'ha, kangukola mijito yeng'ha na kabaho kuli geng'ha.

7 Na chila yumwe wa hetwe nakabochela ndolendole kwa kiwhana na Kilistu vyoyampele. 8 Kota vyogalingulonga Maandiko Matakatifu,

"Loyakwinile kuchanya,

nakawahola wapogozi wa ngondo wenji,

nakawapa wanhu ndolendole."

9 Lelo vyoilingulonjigwa, "Nakakwina mchanya," Yanguwala choni? Yanguwala kota Kilistu nakadulika mbaka hasi ng'hatu muisi. 10 Ahyo, yula yawele nakadulika hano muisi ndo yakwinile kuchanya ng'hatu ha ulanga leka yaimemeze isi. 11 Ndo yawapele wanhu ndolendole, nakawahagula wanhu wanji wawe watumigwa na wanji waloli na wanji walingudamla Mbuli Inojile na wanji wadimi na walangusa. 12 Nakadita ahyo leka yawawiche goya wanhu weng'ha wa Nguluwi kwa chiwalo cha mijito ja Kilistu kuli kuwimiza lukuli lwa Kilistu. 13 Ahyo hetwe tweng'ha tilumbe, tuwe hamwe kuli makundo na kumzela Mwana wa Nguluwi, tuwe wanhu wawele na makundo gawele nzinzili ng'hatu kota Kilistu vyoyawele. 14 Lelo hatuwa kota wana wadodo kahi, kutigaswa na nhigu za mazi na kuwembeluswa ako na ako kwa mbeho ya malanguso gowalingulangusa wahadi leka wawahade wenji kwa uhadi. 15 Ila, wone tibatilile mbuli zilingukomya kwa nhumbula ya igano, towa wakulu mgati mwa heye yawele ndo mutwi, yawele ndo Kilistu. 16 Hali ulongozi wa heye vitomo vyeng'ha vya lukuli vyangibatilila na lukuli lweng'ha lwangubatililwa hamwe kwa vitomo vyake. Ahyo wone chila chitomo chodita mijito jake, lukuli lweng'ha lwangukula na kizenga kuli igano.

17 Lelo kwa itagwa lya Mkulu, ndanguwalonjela kota mleche kulutilila kikala kahi kota wanhu wohawamzelele Nguluwi, wawele na Majesa ga upoka 18 na nyhala za hewo za kuli jiza. Wanhu wa kutali na ukomu wa Nguluwi kwa chiwalo cha upoka uwele mgati mwa nhumbula zawo. 19 Nawajilila na wahela soni, nawenjila kuli kubunza na mazuwa geng'ha wangudita wihe.

20 Ila hemwe hamilanguse ahyo kuwala Kilistu. 21 Namuhulika goya mbuli za heye, namwe namlanguswa goya kukomya kuwele kuli Yesu. 22 Namlanguswa kota muuleche awu lukuli lwa hemwe lwa katali lulingiwifigwa kwa maya ga udesi, 23 leka muhe na majesa ga hemwe vigaluche. 24 Muuvale lukuli lunyale luwele nalulumbigwa kwa kukomya kwa kiwhana na Nguluwi kuli kutanganika na welile.

25 Ahyo, mleche kulonga udesi. Hemwe mweng'ha mlonje kukomya kwa wayenu, kwa vila chila yumwe wa hetwe ka chitomo cha lukuli lwa Kilistu. 26 Wone mozudila, mleche kudita gehile, kahi mleche kikala kuno mzudile nemisi yeng'ha. 27 Mleche kulipa Limazoga honhu ka kukola mijito hali hemwe. 28 Mhizi yaleche kuhiza kahi ila yakole mijito jinojile kwa moko ga heye leka yapate chinhu cha kuwapa wazunwa.

29 Ulonzi wihile uleche kulawa kuli milomo ja hemwe, ila mlonje ulonzi unojile ulinguwakangaza wanhu, leka goumlingulonga gawatanze wanhu walinguwahulichiza. 30 Mleche kumzudiza Muhe Yelile wa Nguluwi, kwa vila kwa kukolela heye hemwe muwichigwa ulajilo wa Nguluwi kwa chiwalo cha zuwa lya kugomboligwa. 31 Lelo mleche kizudila, mleche kizudiza, mleche kuwa na iyowe na maligo. Mleche wihe weng'ha! 32 Ila muwe na isungu na mitanze, chila yumwe wa hemwe yalechele gehile ga miyage, kota Nguluwi vyoyalingulechela gehile ga hemwe kwa kukolela Kilistu.