1 Ndangugana kumzelesa kwa hemwe lumbulyetu Foebe yula yawele ndo chitumagwa kuli chilundo cha wanhu walingumkunda Kilistu chiwele ako Kenikilea. 2 Mbocheleni kwa chiwalo cha Mkulu kota vyowalingubocheligwa wanhu wa Nguluwi. Mumtanze choneche choyolanda kwa hemwe, mina heye kanoga ng'hatu kwa wanhu wenji na kwa heni.

3 Mndamsile Pilisika na Akula, wakola mijito wayangu kuli uchitumagwa wa Kilistu Yesu. 4 Hewo nawagana wakopoligwe kwa chiwalo cha heni. Wangulapigwa kulonjelwa malumbo, haiwele kwa heni yeka ila kahi kulawila kwa vilundo vya wanhu walingumkunda Kilistu wa isi zinji. 5 Mndamsile kahi chilundo cha wanhu walingumkunda Kilistu weng'ha, walingiting'hana haluga hawo. Mndamsile goloko wa heni Epaineto yula yawele yomkunda Kilistu wa mwaluko kuli mkowa wa Asiya. 6 Mndamsile Maliya yula nayakolile mijito kwa kikangaza kwa chiwalo cha hemwe. 7 Mndamsile Andolonikasi na Yunia, wanhu wa isi wayangu wotuwohigwe mchinweng'ho hamwe na heni, hewo wazeleka goya mli watumigwa, nawo wali walongole kumkunda Kilistu heni londing'hali.

8 Mndamsile Ampiliato, goloko wa heni kuli kilumba na Mkulu. 9 Mndamsile Ulubano, mkola mijito myangu kuli uchitumagwa wa Kilistu, vivila mndamsile kahi goloko wa heni Sitaku. 10 Mndamsile Apelesi yula yazeleche kota wa kukomya kwa heye Kilistu. Mndamsile wanhu weng'ha wawele muli ng'handa ya Alisitobulo. 11 Mndamsile mng'holozangu Helodiana, Muwalamse weng'ha wawele kaye kwa Nalikisi welumbile na wanhu wamkundile Mkulu.

12 Mndamsile Tilufena na Tilufosa walingukola mijito kuli uchitumagwa wa Mkulu na goloko wa heni Pelisi yula nayaditile menji kwa chiwalo cha Mkulu. 13 Mndamsile Lufo, munhu yahaguligwe kuli mijito ja Mkulu na mayake yawele nani ndo mayangu. 14 Mndamsile Asunikilito na Filegoni na Helime na Patiloba na Helima na wang'holoze weng'ha wawele hamwe na hewo. 15 Mndamsile Filologo na Yulia na Nelea na lumbulye na Olimpa na wanhu weng'ha wa Nguluwi wawele hamwe na hewo.

16 Milamse kwa kulajila igano lya Kilistu. Mwangulamswa na chilundo cha wanhu walingumkunda Kilistu weng'ha.

17 Wang'holozangu, ndanguwalanda milolele na wala weng'ha walingwambuza wayao webagule na kuwadita wanhu wanji wagwe, waleche kibata malanguso gomlanguswe. Mikale kutali na wanhu awo, 18 mina wanhu wali ahyo hambe wamkolele mijito Kilistu Mkulu wa hetwe, ila nawajikolela mijito mida ja hewo wawo. Kwa ulonzi wa hewo wa usugu na kudamla kwa hewo kwa kuhembuliza leka kwajiliza nhumbula za wanhu wanojile. 19 Chila munhu nakahulika kuhulichiza kwa hemwe kuli mbuli inojile ne nongwa ilingulapa kudita mbuli zihile. 20 Naye Nguluwi nayali chaluko cha kikala goya hokawila kulihondanga Limazoga hasi hali magulu ga hemwe.

Kunoga kwa heye Mkulu wa hetwe Yesu Kilistu kuwe na hemwe.

21 Timoteyi, mkola mijito muyangu, kangukulamsani. Kahi na Lukio na Yasoni na Sosipetili na wanhu wayangu, wangukulamsani.

22 Nani Telitio, ndilingwandika baluwa ayi, ndangukulamsani kwa itagwa lya Mkulu.

23 Gayo mwenyeng'haye wa heni na chilundo cha wanhu walingumkunda Kilistu weng'ha walingiting'hana kwa heye, kangukulamsani. Elasito, muwika lufufu lwa muji awu, hamwe na mng'holozetu Kwato, wangukulamsani. 24 Utambichizo wa Mkulu wa hetwe Yesu Kilistu uwe na hemwe mweng'ha. Ena.

25 Lelo, sambi tumtogole Nguluwi! Heye kanguweza kuwadita hemwe mwime nzinzili kuli ila Mbuli Inojile yondamle ya Yesu Kilistu na kuli ula uviso ugubuligwe na nawali uvisigwe kulawila katali. 26 Ila, sambi kukomya ako nakugubuligwa kwa kukolela gandichigwe na waloli na kwa malajizo ga Nguluwi wa mazuwa gose nawilajila kwa wanhu wa isi zeng'ha leka wanhu weng'ha wakunde na wahulichize.

27 Kuli ukulu wa heye Nguluwi nayali yaliyeka yawele na luhala, yatambichizwe kwa nzila ya kukolela Yesu Kilistu, mazuwa gose! Ena.