1 Lelo, Myahudi kana chinhu chachi cha mzidi kusinda wanhu wanji? Ama kwinjila ikumbi kuna chinhu chachi cha mzidi? 2 Ena, kuna chinhu cha mzidi chila ubanzi. Mwaluko, Nguluwi nakawapa Wayahudi usenga wa heye. 3 Ila yowa ndaze wone wayawo wamwe hawawele wa kukundigwa? Ndaze, mbuli ayi yokusa kukundigwa kwa Nguluwi? 4 Ne hado! Nguluwi kopona wa kukundigwa mazuwa gose, hanga chila munhu ndo mdesi. Kota Maandiko Matakatifu vyogalingulonga,

"Chila vyoulonga, ulonzi wa hegwe ndo wa kukomya,

na kuli utaguso, hegwe kwangusumya."

5 Ila, wone gehile ga hetwe gangulajila kota Nguluwi kangudita ganojile, lelo tulonje choni? Ndaze, tulonje Nguluwi kanguwifya wone yatutaguse? Aha ndangulonga chiwunhu. 6 Ne hado! Wone na iwe ahyo, Nguluwi yahawataguse ndaze wanhu wa isi?

7 "Munhu koweza kuuza, wone udesi wa heni wangonjeza kukomya kwa Nguluwi na wangonjeza ukulu wa heye, lelo lekachoni ndangutagusigwa ndina gehile?" 8 Ndo kihwana nakulonga. Tudite gehile leka tupegwe ganojile! Ndo wanji vyowatubezile kwa kutulonjeleza hetwe twangulangusa mbuli azo. Wotagusigwa kota vyoilingulapigwa.

9 Tulonje choni, lelo? Ndaze, hetwe Wayahudi ndo natutanganika kusinda wanhu wanji? Ne hado! Kwa vila nandiwalonjelani aho mwaluko, kuta Wayahudi na wanhu wa isi zinji weng'ha wana gehile. 10 Kota Maandiko Matakatifu vyogalingulonga!

"Haduhuli ne yumwe yawele yatanganiche!

11 Haduhuli munhu ne yumwe yavizelele,

ne yumwe yalingumpala Nguluwi.

12 Weng'ha wajilila,

weng'ha wana gehile,

haduhu ne yumwe yaditile ganojile,

haduhuli ne yumwe.

13 Mimelo ja hewo ndo kota chilaga chilimwanzi,

myango za hewo zangulonga udesi.

Mumlomo mwa hewo mwangulawa ulonzi uwele na dunga kota ya izoka.

14 Mgati mwa milomo ja hewo mmema upanjilo uwele usungu.

15 Magulu ga hewo gangubilimila kukopola,

16 honeche howoluta wangwambuza kubagama na magazo,

17 hawavizelele kikala goya.

18 Mbuli ya kumdumba Nguluwi ya haduhu ng'hatu kwa hewo."

19 Lelo tuvizela kuta malajizo ga Musa ganguwalapa wanhu wala wawele na malajizo ago, ne chila munhu yaleche kigombela, isi yeng'ha yotagusigwa na Nguluwi. 20 Ahyo haduhu munhu yoneche yalinguwazigwa katanganika ama kanoga hali Nguluwi kwa kudita vyogalingugana malajizo, kwa vila malajizo gangumlajila munhu kugazela gehile.

21 Ila lelo, Nguluwi nakaidita nzila ya heye ya kuwadita wanhu wawe watanganiche hali heye izeleche. Nzila ayi hailingitumbila malajizo. Vivyo du vitabu vyandichigwe na Musa na vya waloli, vyangutawiza vinhu avi. 22 Nguluwi kanguwakunda wanhu wawe watanganiche hali heye kwa kumkunda Yesu Kilistu, Nguluwi kangudita ahyo kwa wanhu weng'ha walingumkunda Kilistu, kuduhuli kibagula koneche. 23 Wanhu weng'ha nawadita gehile na ukulu wa Nguluwi naumala kwa hewo. 24 Ila kwa ndolendole ya utambichizo wa Nguluwi, wanhu weng'ha wangukundigwa wawe watanganiche kwa kukolela kwa Yesu Kilistu yalinguwagombola. 25 Nguluwi nakamlavya Yesu Kilistu kwa danda ya heye, yawe nzila ya kuwosela wanhu gehile ga hewo kwa makundo ga hewo kwa heye. Nakadita ahyo leka yalajile heye kuta katanganika. Aho katali Nguluwi nayali yokwimilila ne kuwagaza wanhu kwa gehile gowaditile, 26 sambi, mhela awu, kanguwinza gehile ga wanhu yawalajile kutanganika kwa heye. Mina heye Nguluwi kanoga na kangumdita munhu yoneche yatanganiche yalingumkunda Yesu.

27 Lelo, toweza kidayila choni? Haduhu! Lekachoni? Ndaze, kwa chiwalo cha kweneza malajizo? Hebu! Ila kwa vila twangukunda. 28 Mina Nguluwi kangumkunda munhu yawe yatanganiche kwa makundo, ila haiwele kwa kibata malajizo ga Musa. 29 Ama ndaze, Nguluwi ndo Nguluwi wa Wayahudi waliyeka, Ndaze, heye hawele Nguluwi wa wanhu wanji? Ena, heye ndo Nguluwi wa wanhu wa isi zinji kahi. 30 Nguluwi ndo yumwe, naye nakawadita Wayahudi wawe watanganiche kwa makundo ga hewo na wanhu wa isi zinji kahi kwa makundo ga hewo. 31 Ndaze, twanguwika malajizo hafungo mwa makundo aga? Ne hado, ila twanguwinza malajizo.