1 Ndangulonga ndikomya, heni nda munhu wa Kilistu hambe ndoje udesi. Majesa ga heni golongozwa na Muhe Yelile, yangundonjela mbuli ayi kahi ndeche kulonga udesi. 2 Ndangugana kulonga ahi, ndina masinzo makulu na usungu wohambe umale mnhumbula ya heni, 3 kwa chiwalo cha wang'holozangu wawele wa nhanzi ya heni! Wone naiwe kwa chiwalo cha lukuli lwa hewo, ndahajezile kulanda kupanjilwa na Nguluwi na kubaguligwa na Kilistu. 4 Awo ndo wanhu wa Isilaeli awala Nguluwi nayawahagule wawe wana wa heye, nakawahanhyisa kuli ukulu wa heye, nakadita ilagano nawo, nakuwapa malajizo ga heye, makundo ga kukomya na goyalonjile heye. 5 Hewo ndo wazukulu wa wasekulu wa Waebulaniya, naye Kilistu, kuli wunhu wa heye, nakalawila kuli lukolo lwa hewo. Nguluwi yalingulongoza hali geng'ha, nayatogoligwe mazuwa gose! Ena.

6 Hambe ndoje ilagano lya Nguluwi ligaluka, mina haiwele wanhu weng'ha wa Isilaeli ndo wanhu wa Nguluwi. 7 Kahi hawawele walelwa weng'ha wa Abulahamu ndo wanage wa kukomya. Ila, kota Maandiko Matakatifu vyogalingulonga, "Walelwa wa heye wolawila kwa Isaka." 8 Mina, haiwele wala wavumbuche chilukuli ndo wana wa Nguluwi, ila wana wala wavumbuche kwa ilagano lya Nguluwi awo ndo wochemigwa wana wa Abulahamu. 9 Mina ilagano alyo ndo ali, "Mhela utanganiche ndohiluka, naye Sala koponda mwana."

10 Kahi hagawele ago hela, ila naye Lebeka nakaponda wanyambili kwa mhaza yumwe, heye ndo Isaka, sekulu wa hetwe. 11 Ila, leka Nguluwi yoneche kota kana ludali lwa kuhagula, hanga kung'hali wala wanyambili hawana pondigwa na lowang'hali kudita linojile ama lihile, 12 Lebeka nakalonjeligwa kota yula mwana wa mwaluko komkolela mijito yula wakeli. Ahyo Nguluwi kanguhagula kota vyoyogana heye na haiwele vyowogana wanhu halingulola choyalingukola munhu. 13 Kota Maandiko Matakatifu vyogalingulonga, "Yakubu nandimgana, ila nandimzudila Esau."

14 Lelo, tulonje choni? Ndaze, Nguluwi kahela hachi? Ne hado! 15 Mina nakamlonjela Musa, "Ndomlechela munhu yoneche yondilingugana kumlechela na ndomonela isungu munhu yoneche yondigana." 16 Ahyo, ago geng'ha gangitumbila isungu lya Nguluwi, haiwele kikangaza ama choyalingugana munhu. 17 Mina Maandiko Matakatifu gangulonga ahi kwa Falao, "Nandikudita uwe mndewa kwa kukolela hegwe, leka ndajile ukulu wa heni na itagwa lya heni lizeleche kuli isi yeng'ha." 18 Ahyo, Nguluwi kangumonela isungu munhu yoneche yalingugana na wone yagane kumdita munhu yawe mjuvi, komdita yawe ahyo.

19 Hanji kombuza, "Wone mbuli za hino, lekachoni Nguluwi kangugona gehile ga hetwe gotulingudita? Whaani yoweza kugabela gala goyalingugana Nguluwi?" 20 Ila hegwe munhu, kwa whaani mbaka umuuze Nguluwi? Ndaze chiya chojeza kumuuza yachiwumbile, "Lekachoni unyumbile kota ahi?" 21 Mlumba viya kana ludali lwa kugongomanyila ilongo lyoyalingugana na kuwumba viya vili kwa ilongo lilila, chimwe kwa mbuli ng'hulu na chinji kwa mbuli ndodo.

22 Ahyo ndo vyoiwele kwa Nguluwi. Nakagana kulajila ng'halazi ya heye na kulajila ludali lwake. Ila nakawemilila wanhu wala nawaganigwe kudumigwa na ng'halazi ya heye. 23 Heye yuye nakagana kuulajila winji wa ukulu wa heye woyatujidile hetwe tuganigwe kubochela isungu lya heye, hetwe mina yatuwichile goya kulawila katali tubochela ukulu wa heye. 24 Mina hetwe ndo wala nayawachemile, haiwele kulawila kuli Wayahudi yeng'ha ila kahi kulawila kuli wanhu wa isi zinji. 25 Kota Mkulu navyoyalonjile mli chitabu cha mloli Hoseya,

"Wala, ‘Nahawawele wanhu wa heni’

ndowachema, ‘Wanhu wa heni!’

Naye ‘Sikuganile’ kochemigwa,

‘Mganwa wa heni,’

26 Hanga Nguluwi nakawalonjela,

‘Hemwe hamuwele wanhu wa heni’

aho wochemigwa,

‘Wana wa Nguluwi yawele mkomu.’ "

27 Vivila mloli Isaya, nakalonga kwa usungu kwa chiwalo cha wanhu wa Isilaeli, "Wone wanhu wa Isilaeli ndo wenji kota misanga ja kumwhani, ndo wado hela woloholigwa, 28 Mkulu hokawila kutagusa himahima isi yeng'ha." 29 Kota Isaya vyoyalongole kulonga, "Kota Mkulu wa wamizi hatulechele wana wamwe wa Isilaeli, twahawele kota Sodoma, twahewhanile na Gomola."

30 Lelo tulonje choni? Wanhu wa isi zinji hawaditile chinhu leka wawe watanganiche, nawaditikwa wawe watanganiche, kwa makundo ga hewo, 31 ila wanhu wa Isilaeli wala nawapalile malajizo ga kuwadita wawe watanganiche, nahawagawene. 32 Lekachoni lelo? Kwa vila nawetumbila madito ga hewo honhu ha kitumbila makundo. Ahyo, nawekwang'wala hali iganga lya kikwang'wala, 33 kota vyogalingulonga Maandiko Matakatifu,

"Ulole, ndowika iganga ako Siyoni alyo lyanguwadita wanhu kikwang'wala,

mbika mgamba,

ulinguwadita wanhu wagwe.

Ila munhu yoneche yomkunda hobasigwa soni hebu!"