1 Lelo, goloko wa heni, wone kwanguwatagusa wanji, huweza hebu kilewela, hanga hegwe uwe whaani. Kwa vila, vyouwatagusa kwa wihe wanhu wanji, aku nagwe uchipanjila kwa gala gowalingudita hewo nagwe kwangudita. 2 Lelo tuvizela utaguso wa Nguluwi kwa wanhu walingudita mbuli kota azo ndo wa kukomya. 3 Ila hegwe goloko ulinguwatagusa wanhu walingudita mbuli kota azo na kahila nagwe kwangudita, ndaze, kwangiijesa kota kochiwika kutali na utaguso wa Nguluwi? 4 Ama kwangubeza kunoga kwa heye kukulu, kubeteza kwa heye ne kuvizela kota kunoga kwa heye kwangugana kukulongoza umgalamchile Nguluwi kwa kulonga gehile? 5 Ila hegwe uwele na nhumbula igagadale na ulingubeza kuleka gehile, ahyo kwangiyonjezela gwegwe magazo kwa zuwa lila lya kuzudila mhela wula utaguso wa hachi ya Nguluwi loufika. 6 Zuwa alyo Nguluwi komlipa chila munhu kwa chila nachoyaditile. 7 Wala wanhu walingulutilila kudita ganojile, aku wopala ukulu na koneka wana lutogo lwa Nguluwi na kuleka kubagama, wanhu awa Nguluwi kowapa ukomu wa mazuwa gose. 8 Ila wala wamwe walingigana wawo yeng'ha, walingulema mbuli zinojile na kuwinza gehile, ndangukomya Nguluwi kowatagusa kwa ng'halazi ya heye. 9 Magazo na usungu womuyila chila munhu yawele na wihe. Mwaluko gowafika Wayahudi hamba kahi kwa wanhu wa isi zinji. 10 Ila Nguluwi kowapa ukulu na katogo na kikala goya kwa wala walingudita ganojile. Mwaluko gowafika Wayahudi hamba kahi kwa wanhu wa isi zinji. 11 Mina Nguluwi hambe yambagule munhu yoneche.

12 Wala walingudita gehile ne kugazela malajizo ga Musa wokwaga walihela malajizo. Wala walingudita gehile aku wagazelele malajizo ga Musa, wotaguswa kwa malajizo. 13 Kwa vila hawawele wala walinguhulika malajizo ga Musa ndo wala walingukundigwa na Nguluwi, ila wala walinguhulichiza malajizo ndo wokundigwa hali Nguluwi. 14 Ena, wanhu wa isi zinji wahela malajizo ga Musa, ila howokweneza chila chiliguganigwa kuli malajizo, hewo wanguwa chipimilo cha malajizo hali hewo hanga hawagazelele malajizo ga Musa. 15 Mbuli za hewo zowalingudita zangulajila kota galinguganigwa na malajizo nagandichigwa mnhumbula za hewo. Nhumbula za hewo zangutawiza kuwala mbuli ayo, mina majesa ga hewo mhela unji kanguwalonjeleza na mhela unji ganguwalewela. 16 Ahyo, golawila zuwa lya utaguso hala Nguluwi kukolela Yesu Kilistu hoyotagusa mbuli za uviso za wanhu, kota vyondilingudamula Mbuli Inojile.

17 Nagwe ndaze? Wone kwangichema gwegwe Myahudi, kwangitumbila malajizo kwangidaila kwa munhu wa Nguluwi, 18 kwa nzila ya malajizo kuvizela chila choyalingugana Nguluwi udite na koweza kuhagula mbuli inojile, 19 hegwe kwangiwona kwa chilongozi wa wanhu wohambe walole na lumuli lwa wanhu wawele kutitu, 20 wone hegwe kwa mlangusa wa wapoka na wala hawanavizela malanguso, kwangijesa kuli malajizo kwanawo uwanzi weng'ha na kukomya. 21 Lelo, hegwe kwanguwalangusa wanji, lekachoni hambe wilanguse gwegwe uliyeng'ha? Kwanguwadamlila wanji waleche kuhiza, ila hegwe nagwe kwanguhiza. 22 Kwangulonga, "Mleche kudita ung'hondwa," kuno hegwe udita ung'hondwa, kwangujizudila jimalukolo ja milungu ja udesi na kuno hegwe kwangupata lufufu kwa kuhiza kuli ng'handa azo za milungu. 23 Kwangidaila malajizo ga Nguluwi, hambi hegwe hulingumbeza Nguluwi kwa kulema kuwinza malajizo ga heye? 24 Kota vila Maandiko Matakatifu vyogalingulonga, "Wanhu wa isi zinji nawaliliga itagwa lya Nguluwi kwa chiwalo cha hemwe Wayahudi."

25 Kwinjila ikumbi ndo chowa chinhu chinojile wone wibatilile malajizo. Ila wone hulingibatilila malajizo, lelo, kwinjila ikumbi kwa hegwe hakuwele chinhu. 26 Wone munhu wa isi zinjii yawele henjile ikumbi wone yadite kota malajizo vyogalingugana, ndikomya kojesigwa kota munhu yenjile ikumbi. 27 Wanhu wa isi zinji wokutagusa hegwe Myahudi wone hibatilile malajizo, hanga kwanago malajizo gandichigwe na kwinjila ikumbi, ila hewo wangibatilila malajizo hanga hawenjile ikumbi. 28 Ndo kulonga, haiwele chila munhu yalingoneka kwa kunze Myahudi ndo Myahudi wa kukomya, ne munhu howa Myahudi wa kukomya wone yenjile ikumbi chilukuli. 29 Myahudi wa kukomya ndo yula yawele Myahudi wa mgati, yani yula yenjile ikumbi mnhumbula. Ayi ndo mbuli ya Muhe na haiwele mbuli ya malajizo gandichigwe. Munhu yawele ahyo kangutogoligwa, haiwele kwa wanhu, ila kulawa kwa Nguluwi.