1 Tulonje choni lelo? Ndaze, Tulutilile kusigala kuli gehile leka kunoga kwa heye Nguluwi konjezeche? 2 Ne hado! Hetwe natubagama, tolutilila ndaze kulongozwa na gehile? 3 Mina, namvizela kota hetwe tubatizigwe natilumba na Yesu Kilistu, natubatizigwa natilumba kuli kubagama kwa heye. 4 Lotubatizigwe natilumba kuli kubagama kwa heye na natutiligwa hamwe, leka kota vila Kilistu loyazilipulwe kulawa kwa wanhu wabagame kwa madito makulu ga Mhaza, hetwe natwe tikale kuli ukomu unyale.

5 Mina, wone hetwe natilumba naye kuli kubagama kota heye, hiho du tochilumba naye kwa kuzilipuligwa kulawa kwa wabagame kota heye. 6 Kwa vila natuvizela wunhu wa hetwe wa katali nawagazigwa hamwe na Kilistu, leka ludali lwa gehile mulukuli luwifigwe, ahyo tuleche kahi kuwa wapogozi wa gehile. 7 Mina, munhu yabagame, kagomboligwa kulawa kuli gehile. 8 Lelo, wone tubagame hamwe na Kilistu, twangukunda tochikala naye hamwe kahi. 9 Mina, natuvizela Kilistu mina nakazilipulwa kuli wanhu wabagame na hobagama kahi, kubagama hakumlongoza kahi. 10 Ahyo, kwa vila nakabagama kamwe hela, gehile gahela ludali, ukomu woyawele ngikala sambi kangulongozwa na Nguluwi. 11 Ila hemwe kahi miwone mwemwe kota mbagama kwa kulongozwa na gehile, ila mwawakomu kwa Nguluwi kukolela Yesu Kilistu.

12 Ahyo, gehile galeche kuwalongoza kahi mli ng'huli za hemwe zilingubagama, leka mleche kuwinza maya ga lukuli. 13 Kahi mleche kulavya vitomo vya hemwe vya lukuli vilongozwe na gehile kota vinhu vya kuditila wihe. Ila milavye hemwe mwemwe kwa Nguluwi kota wanhu wazilipulwe kulawa kwa wanhu wabagame na mlavye ukomu wa hemwe kwa Nguluwi kwa chiwalo cha kutanganika. 14 Mina, gehile hogowalongoza kahi, kwa vila hemwe hamlingulongozwa na malajizo, ila hemwe mwangulongozwa na kunoga kwa heye.

15 Lelo, tulonje choni? Ndaze, tudite gehile kwa vila hatulingulongozwa na malajizo ila twangulongozwa na kunoga kwa heye? Ne hado! 16 Ndangukomya ng'hatu, mvizela wone milavye hemwe mwemwe kota wapogozi na kumhulichiza munhu yunji, hemwe mwanguwa wapogozi wa ayo mlingumhulichiza. Homuwa wapogozi wa gehile momalila kuli kubagama, homuwa wapogozi kwa kumhulichiza Nguluwi, mokoneka mtanganiche kwa Nguluwi. 17 Hanga namwali wapogozi wa gehile aho katali, ila sambi ndanguta malumbo Nguluwi mhulichiza kwa nhumbula yeng'ha gala gomlonjelwe na malanguso gomgabochele. 18 Namgomboligwa kulawa muupogozi wa gehile, muwa wapogozi wa utanganiche 19 aha ndangulonga ndonga ya hihi hela ya wanhu kwa chiwalo cha ung'hochele wa hemwe mwemwe. Kwa vila mhela umwe vyomilavile vitomo vya ng'huli za mwemwe kuditila wihe na kuwifya, hihyo du mlavye vitomo vya ng'huli za hemwe kwa kuwadita muwe mwelile.

20 Lomwali wapogozi wa gehile, namilejeha muwa kutali na kutanganika. 21 Lelo nampata choni zuwa lila kwa mbuli zila mwanguzonela soni sambi? Mina, golawila kuli mbuli azi ndo kubagama! 22 Ila lelo mina mgomboligwa kulawa kuupogozi wa gehile namuwa vitumagwa wa Nguluwi, chonjezeche kwa hemwe sambi ndo welile na chilawila ndo ukomu wa mazuwa gose. 23 Mina chonolo cha gehile ndo kubagama, ila ndolendole yalingulavya Nguluwi ndo ukomu wa mazuwa gose kuli kilumba na Yesu Kilistu, Mkulu wa hetwe.