1 Hetwe tuwele na makundo makulu twangulapigwa kuwatanza wala wawele na makundo mado wesumwe na ung'hochele wa hewo. Tuleche kinojeza hetwe tuliyeka. 2 Chila munhu kangulapigwa kumnojeza yoyalingikala habehi na heye kwa isungu leka ayo yadahe kizenga kuli makundo. 3 Mina Kilistu henojeze yaliyeka, ila nayali kota vyogalingulonga Maandiko, "Maligo geng'ha kowakulijile hegwe gambuyila heni." 4 Mina, geng'ha gandichigwe katali nagandichigwa kwa chiwalo cha kutulangusa hetwe kwa ubetezo na kikangaza kotulingupegwa na ago Maandiko Matakatifu tuwe na lya kitumbila. 5 Nguluwi nayali mwaluko wa ubetezo na yalinguwapa hemwe lunojenoje lweng'ha, yakuganileni hemwe muwe na chinhu chimwe kota heye Kilistu Yesu navyoyali, 6 leka hemwe mweng'ha, kwa nhumbula imwe na lizi limwe, mtogoleni Nguluwi, Mhaza wa Mkulu wa hetwe Yesu Kilistu.

7 Lelo, michemele hemwe kota heye Kilistu vyoyawachemile hemwe leka Nguluwi yatogoligwe. 8 Mina, ndangukulonjelani Kilistu nayali chitumagwa kwa Wayahudi leka yalajile kukomya kwa Nguluwi, leka gala malagano yawichile Nguluwi kwa wasekulu wa hetwe gakoleche kwa kukomya, 9 leka nawo wanhu wa isi zinji leka wamzele na kumtogola Nguluwi kwa chiwalo cha isungu lya heye. Kota vyogalingulonga Maandiko Matakatifu,

"Ahyo ndokutogola hali wanhu wa isi.

Ndokwimba lutogo lwa itagwa lyako."

10 Kahi Maandiko gangulonga,

"Msangalale, hemwe wanhu wa isi,

msangalale hamwe na wanhu wa heye."

11 Kahi, gangulonga,

"Hemwe wanhu wa isi zeng'ha, mumtogole Mkulu,

hemwe wanhu weng'ha, mumtogole."

12 Kahi mloli Isaya kangulonga,

"Kuli lukolo lwa Yese kulawila munhu,

naye kowalongoza wanhu wa isi,

nawo womtumbila."

13 Lelo, Nguluwi nayali chaluko cha kitumbila, yakumemezeni usangalalo weng'ha na kikala goya kwa makundo ga hemwe, kitumbila kwa hemwe konjezeche kwa mong'ho wa Muhe Yelile.

14 Wang'holozangu, heni ndivizela ng'hatu kota hemwe mmema kunoga na luhala lweng'ha, moweza kilangusa hemwe mliyeng'ha. 15 Ila nandikwandichilani kuli baluwa ayi vinhu vinji ne kudumba, leka ndikukumbuseni mbuli zimwenga. Nandita ahyo kwa isungu lyoyamhele Nguluwi, 16 leka ndiwe kota chitumagwa wa Yesu Kilistu kwa wanhu wa isi. Ndangiditila kota mtambika kudamla Mbuli Inojile ya Nguluwi leka wanhu wa isi zinji wawe nhambiko ikundigwe na Nguluwi, nhambiko yelizwe na Muhe Yelile. 17 Ahyo, ndiwele ndilumbile na Kilistu Yesu, ndoweza kidayila madito ga heni kwa chiwalo cha Nguluwi. 18 Hambe njeze kulonga chinhu chinji choneche ila chila hela Kilistu Yesu choyaditile kwa kung'holela heni leka wanhu wa isi wamhulichize heye. Nakadita ahyo kwa ulonzi na madito, 19 kwa ludali lwa vinduzanduza na kububuwaza na kwa ludali lwa Muhe wa Nguluwi. Lelo, kwa majendo ga chila honhu, kwaluchila kula Yelusalemu mbaka isi ya Iluliko, nandiwadamlila ng'hangaze Mbuli Inojile ya Kilistu. 20 Chondilingugana heni mazuwa geng'ha, ndamle Mbuli Inojile hali isi zila Kilistu halinguzeleka, leka ndeche kuzenga hali msisi uwichigwe na munhu yunji. 21 Kota vyogalingulonga Maandiko Matakatifu,

"Wanhu weng'ha hawalonjelwe mbuli za heye, wokona,

nawo wala wawele hawanahulika mbuli za heye wovizela."

22 Kwa chiwalo acho mazuwa menji nandemezwa kuya kwa hemwe. 23 Kwa vila sambi nasinda mijito ja heni kuli isi azi, kwa vila kwa mihela minji nangana ng'hatu kuya kwa hemwe kuwalolani, 24 Ndangugana kudita ahyo sambi. Ndowajendelani ndiwele mmajendo kuluta Sipaniya na ndangugana hemwe kunhanza fiche ako, hondisinda kusangalala kikala na hemwe mhela udo. 25 Ila, kwa sambi ndanguluta kuwaditila uchitumagwa wanhu wa Nguluwi kula Yelusalemu. 26 Mina wanhu wa Makedoniya na wanhu wa Akaya wangugana kuwatanza wanhu wa Nguluwi wawele wazunwa ako Yelusalemu. 27 Hewo wawo nawagana kudita ahyo, ila nawaganigwa kudita ahyo. Mina, wone wanhu wa isi zinji wangubochela utambichizo wa chimuhe kulawila kwa Wayahudi, nawo wangulapigwa kuwatanza Wayahudi kuli chila chowogana hewo cha muisi. 28 Londisinda kukola mijito ajo na kuwapa Wayahudi chila chikongozigwe kwa chiwalo cha hewo, ndokujendelani hemwe londiwa mmajendo kuluta Sipaniya. 29 Ndanguvizela kota londikuya kwa hemwe ndokugalilani utambichizo winji wa Kilistu.

30 Lelo, wang'holozangu, ndanguwalanda kwa Mkulu wa hetwe Yesu Kilistu na kwa igano lya Muhe Yelile, muwe na heni kuli kundandila kwa Nguluwi. 31 Mndandile ndawe goya muli wala wohambe wamkunde Kilistu wawele Uyahudi, mndandile mijito ja heni jiwe goya ako Yelusalemu jikundigwe na wanhu wa Nguluwi wawele ako Yudeya. 32 Ahyo, wone Nguluwi yagane, hanji ndokuya kwa hemwe kwa nhumbula isangalale, ndikesele hamwe na hemwe. 33 Nguluwi yawele yaluchize kikala goya yawe hamwe na hemwe! Ena!