1 Wang'holozangu, kwa nhumbula ya heni yeng'ha ndangugana kuwalandila kwa Nguluwi Waisilaeli wayangu waloholigwe. 2 Mina ndangutawiza hewo welavya kumgana Nguluwi. Ila nahawavizelele kudita navyoyaliyogana Nguluwi. 3 Mina hawavizelele hila Nguluwi vyoyalinguwadita wanhu wawe watanganiche, nawo waluchiza vihendo vya hewo wawo na hawaikundile ayo nzila ya Nguluwi ya kuwadita wawe watanganiche. 4 Mina kwa kuya kwa heye Kilistu, malajizo nagaduma, leka weng'ha walingukunda wawe watanganiche.

5 Kulapa kuwa utanganiche kwa kuwinza malajizo, Musa nakandika ahi, "Munhu yoneche yalinguhulichiza malajizo kochikala." 6 Ila kwa mbuli ya kutanganika hali meho ga Nguluwi kwa nzila ya makundo, Maandiko Matakatifu gangulonga hino, "Uleche kulonga mnhumbula mwa hegwe, ‘Whaani yokwina mbaka kilanga,’ ako ndo kumdulisa Kilistu? 7 Ne uleche kulonga, ‘Whaani yodulika mbaka kuli isi ya wabagame,’ ako ndo kumigala Kilistu kulawa kuli wanhu wabagame?" 8 Maandiko Matakatifu gangulonga ahi, "Ulonzi awo wa Nguluwi wahabehi na hegwe, wa hamlomo wa hegwe na mnhumbula ya hegwe" nawo ndo gala makundo gotulingudamla. 9 Houvumila kwa mlomo wa hegwe kuta Yesu ndo Mkulu na kukunda mnhumbula ya hegwe kuta Nguluwi nakamzilipula kuli wanhu wabagame, koloholigwa. 10 Mina munhu kangukunda kwa nhumbula kanguditigwa yatanganiche na kuvumila kwa mlomo leka yaloholigwe. 11 Maandiko Matakatifu gangulonga, "Chila yalingumkunda hobasigwa soni." 12 Mbuli ayi ndo kwa weng'ha, mina haduhu yalivinji hali Wayahudi na hawawele Wayahudi, kwa vila Nguluwi ka Mkulu kwa wanhu weng'ha, naye kana isungu ng'hatu kwa weng'ha walingumchema. 13 Kwa vila Maandiko Matakatifu gangulonga, "Ahyo wanhu weng'ha howolanda kwa itagwa lya Mkulu Nguluwi woloholigwa."

14 Lelo, womlanda ndaze heye yula hambe wamkunde? Kahi, womkunda ndaze yula hawanahulika mbuli za heye? Wohulika ndaze mbuli za heye wone kuduhu munhu yalingudamla? 15 Wanhu wodamla ndaze wone hawatumigwe? Kota Maandiko Matakatifu vyogalingulonga, "Ndo mbuli ya kunojeza lukami kuya kwa wala walingudamla Mbuli Inojile!" 16 Ila haiwele wanhu weng'ha waikundile Mbuli Inojile. Mina Isaya nakalonga, "Mkulu, ndo whaani yaukundile usenga wa hetwe?" 17 Ahyo lelo, makundo ganguya kwa kuhulika usenga, nawo usenga wanguya kwa ulonzi wa Kilistu.

18 Lelo ndanguuza, ndaze, hawauhuliche awo usenga? Ena, nawauhulika, kota Maandiko Matakatifu vyogalingulonga,

"Lizi lya hewo nalyenela kuli isi yeng'ha,

na ulonzi wa hewo naufika mbaka kuli kuduma kwa isi yeng'ha."

19 Kahi ndanguuza, hambi wanhu wa Isilaeli nahawavizelele? Musa heye nakalongola kwidichila,

"Ndokuditani muwonele maya

wanhu wa isi inji,

ndokuditani muwang'hang'halile,

wanhu wapoka."

20 Kahi Isaya hadumbile kulonga,

"Wala wanhu wawele hawamhalile nawambona,

ndilajila kwa wanhu wala hawamhalile."

21 Ila kwa mbuli ya Isilaeli, Nguluwi kangulonga,

"Nemisi yeng'ha nandiwagololela moko ga heni wanhu hawalingunyhulichiza na wajuvi."