1 Ahyo, wang'holozangu, kwa vila Nguluwi kana isungu lukami, ndangukulandani kwa nhumbula yeng'ha, mumlavile Nguluwi lukuli lwa hemwe kota nhambiko iling'homu, yelile na ilingunojeza. Aku ndo kumfugamila Nguluwi. 2 Mleche kwiga chihendo cha isi ayi, leka Nguluwi yawadite muwe mnojile mgati mwenu kwa kugalamla nyhala za hemwe. Aho ndo homvizela kugana kwa Nguluwi na kuvizela mbuli iwele inojile, ilingumnojeza na yenele.

3 Kwa utambichizo woyamhele Nguluwi, ndangukulonjelani hemwe mweng'ha, chila munhu yaleche kiwona mkulu kusinda vila vyoyalinguganigwa. Kijesa kwa hemwe na kuwe na chasi kota Nguluwi vyoyamgawile chila munhu makundo ga heye. 4 Lukuli luna vitomo vinji, chila chitomo chimwe changukola mijito jake. 5 Hiho du natwe hanga twawenji, twa lukuli lumwe kwa kilumba na Kilistu na chila yumwe ndo chitomo cha myage. 6 Lelo, twanao uwanzi winji kota vila kunoga kwa heye kotupeligwe. Yawele na ndolendole ya uloli na yauditile kota makundo ga heye vyogali. 7 Munhu yawele na ndolendole ya uchitumagwa na yaudite. Munhu yawele na ndolendole ya kulangusa na yalanguse. 8 Munhu yawele na ndolendole ya kuwahembuliza wanji nayadite ahyo. Munhu yalingumgawila myage choyawelenacho nayadite ahyo kwa isungu. Munhu yawele chilongozi na yalongoze kwa kwimilila, naye munhu yalingudita mbuli ya isungu nayadite ahyo kwa kusangalala.

9 Igano lya hemwe liwe hela udesi woneche. Mzudile mbuli yoneche yihile, mibatilile linojile. 10 Migane chilukolo, mihulichize hemwe kwa hemwe, chila yumwe yaluche kumjesa myage kwa kumuhulichiza. 11 Mleche kuwa wagata kuli kumkolela mijito Mkulu, ila muwe msangalale kuli nhumbula za hemwe zeng'ha kuli kumfugamila Mkulu. 12 Kitumbila kwa hemwe kukuwicheni chila zuwa msangalale, namuwe na ubetezo kuli kugaya na kumlanda Nguluwi mhela weng'ha. 13 Muwatanze wanhu wa Nguluwi kuli chila chowolanda, muwabochele wajenzi kwa luhala.

14 Muwatambichize wala weng'ha walinguwabunza hemwe, ena, muwatambichize na mleche kuwapanjila. 15 Msangalale hamwe na wawele ngusangalala, mlile hamwe na wala walingulila. 16 Mikale hamwe kwa kihanyisa. Mleche kidaya, ila mkunde kikala na wanhu wawele wazunwa. Mleche kiwona ndo muwele na luhala lukami.

17 Mleche kumuhilulila munhu lihile kwa lihile. Mdite mbuli zinojile hali wanhu weng'ha. 18 Kota vyoilingulapigwa kikala goya na wanhu weng'ha, muwe na igano kwa wanhu weng'ha. 19 Waganwa wa heni, mleche kihilulila chibida, ila mlecheleni Nguluwi mbuli ayo, mina Maandiko Matakatifu gangulonga, "Kuhilula chibida ndo kwa chiwalo cha heni, nani ndohilula chibida, Mkulu kangulonga." 20 Kupuluta kwa ago, Maandiko gangulonga, "Wone mng'honyo wa hegwe kana nzala, umhe chilyo, wone yawe na ng'halu, umhe chinhu cha kunwa yanwe. Mina kwa kudita ahyo komdita yone usungu mnhumbula kota makala ga chiluli mchanya muli mutwi wa heye."

21 Uleche kukunda kusumigwa na wihe, ila usumye wihe kwa kudita mbuli zinojile.