1 Mumbochele haluga henu munhu yawele na makundo mado, ila mleche kitwanza naye kuwala majesa ga heye yaliyeka. 2 Wanhu hawewhanile. Yumwe makundo ga heye gangumkundiza kulya chila chinhu, ila yunji yawele makundo ga heye ndo mado, kangulya mboga hela. 3 Munhu yalingulya chila chinhu yaleche kumbeza yula yalingulemwela kulya chila chinhu, naye yalingulya mboga hela, yaleche kumtagusa yalingulya chila chinhu, mina Nguluwi nakamkunda. 4 Hegwe ndo whaani mbaka ujeze kumtagusa chitumagwa wa yunji? Wone yeme ama yagwe acho ndo choyaganile Mkulu wa heye, ena, kokwima nzinzili, mina Mkulu kanguweza kumwimiza.

5 Munhu kangijesa kota zuwa limwe litanganika kusinda zuwa linji, yunji kangijesa kota mazuwa gose gewhana. Chila yumwe yawinze kwimilila kwa luhala lwa heye. 6 Yula yalinguwaza zuwa limwenga litanganiche, kangudita ahyo kwa chiwalo cha kumtogola Nguluwi, naye yalingulya chilyo chimwenga kangudita ahyo kwa kumtogola Mkulu, mina kanguta malumbo Nguluwi kwa chilyo choyampele. Hiho du naye yalinguleka kulya chilyo chimwenga, ayo kangudita kwa chiwalo cha kumtogola Mkulu, naye kahi kangumtogola Nguluwi. 7 Mina haduhu munhu yoneche hali hetwe yalingikala kwa chiwalo cha heye yuye, kahi haduhu yalingubagama kwa chiwalo cha heye yuye, 8 mina wone tikale twangikala kwa chiwalo cha Mkulu, wone tubagame, twangubagama kwa chiwalo cha Mkulu. Lelo, wone tuwe wakomu ama tubagame, hetwe ndo lufufu lwa heye Mkulu. 9 Mina Kilistu nakabagama, nakazilipuka leka yawe Mkulu wa wakomu na wabagame. 10 Lekachoni, hegwe kwangumtagusa mng'holozo? Nagwe, lekachoni ulingumbeza mng'holozo? Hetwe tweng'ha tokwima hali chigoda cha utaguso cha Nguluwi. 11 Mina Maandiko Matakatifu gangulonga,

Mkulu kangulonga, "Kota vyondilingikala,

chila munhu kofugamila,

na chila munhu kovumila kuta heni nda Nguluwi."

12 Ahyo lelo, chila yumwe wa hetwe, kokwidichila kwa chiwalo cha madito ga heye yuye hali Nguluwi.

13 Lelo, tuleche kitagusa, ila tilolele tuleche kuwa chambuzo cha wang'holozetu kikwang'wala ama kuwambuza wagwe mli gehile. 14 Kuli kilumba na Mkulu Yesu, ndivizela ng'hatu kuwa kuduhu chinhu choneche chikokomoche kochaluchile, ila, wone munhu yone chinhu chimwe chikokomoka, lelo, kwa heye chikokomoka. 15 Lelo wone mng'holozo kangisinza kwa chilyo choulingulya, lelo, hegwe kwahela igano. Chilyo choulingulya chileche kuwa chambuzo cha kwajilila mng'holozo, yula Kilistu yabagame kwa chiwalo cha heye! 16 Lelo, mleche kukunda chinhu chomulinguchona chinojile chikovuligwe. 17 Mina Undewa wa Nguluwi hauwele kwa chinhu cha kulya na kunwa, ila wangulapa kutanganika na kikala goya na kusangalala kulingigaligwa na Muhe Yelile. 18 Mina munhu yoneche yalingumkolela mijito Kilistu kota ahi, kangumnojeza Nguluwi na kangukundigwa na wanhu.

19 Ahyo mibatilile mbuli zilingigala kikala goya na galingutanza kizenga mwemwe baho. 20 Lelo, uleche kuwifya mijito ja Nguluwi kwa kiziganila chilyo. Vilyo vyesa vinoga, ila haiwele goya munhu kulya chilyo choneche chimwambuza munhu yunji yagwe kuli gehile. 21 Chiba kuleka kulya miwunde na kunwa divai ama kudita choneche chila chlingwambuza mng'holozo yagwe kuli gehile. 22 Lelo, wibatilile choulingukunda hegwe na Nguluwi wa hegwe. Kobweda munhu yula yawele ngugana yuye chakudita, kwa vila vinhu vyowalingijesa kota vinoga. 23 Ila yula munhu yalingijesa kwa chiwalo cha chila chilyo choyalingulya, kangutaguswa kwa wihe wone yalye, mina hadile kwa makundo. Choneche wone munhu hambe yadite kwa makundo acho ndo gehile.