1 Ahyo, lelo haduhu utaguso kwa wihe wa wala wawele kuli kikala kwa hewo nawelumba hamwe na Kilistu Yesu. 2 Mina, malajizo ga Muhe Yelile galingigala ukomu kwa kilumba na Kilistu Yesu nagangombola kulawila kuli malajizo ga gehile na kubagama. 3 Nguluwi nakaidita mbuli ayo iwele malajizo nakalemwela kudita kwa chiwalo cha ung'hochele wa wanhu. Nguluwi nakamlajiza Mwanage yawele na lukuli kota lwa hetwe tuwele na gehile, kwa lukuli alo nakatagusa gehile. 4 Nguluwi nakadita kutanganika ako leka kwenela kwa chila chinhu chilinguganigwa kuli malajizo chikoleche mgati mwa hetwe, hetwe tulingikala kwa Muhe Yelile, nahaiwele kwa lukuli luwele na gehile. 5 Mina, wala walingikala kwa kuwinza vyolugana lukuli, luhala lwao lwangulongozwa na majesa ga mlukuli. Ila wala walingikala vyoyogana Muhe Yelile, luhala lwao lwangulongozwa na majesa ga Muhe. 6 Majesa ga lukuli gangigala kubagama, ila majesa ga Muhe Yelile gangigala ukomu na kikala goya. 7 Mina, yalingulongozwa na majesa ga lukuli ndo mng'honyo wa Nguluwi, kwa vila hambe yagahulichize malajizo ga Nguluwi, ne howeza kugahulichiza. 8 Wanhu walinguwinza maya ga lukuli howoweza kumganiza Nguluwi.

9 Ila hemwe, Muhe wa Nguluwi wone yekale mgati mwa hemwe, hamlongozwa na lukuli, ila mwangulongozwa na Muhe. Wone munhu yoneche kahela Muhe wa Kilistu, ayo hawele wa Kilistu. 10 Ila wone Kilistu ka mgati mwa hemwe, hanga ng'huli za hemwe zibagama kwa chiwalo cha gehile, kwa hemwe Muhe ndo ukomu kwa vila mditigwa muwe mtanganiche. 11 Wone Muhe wa Nguluwi yula yamzilipule Kilistu kuli wanhu wabagame kangikala mgati mwa hemwe, lelo ayo yamzilipule Yesu kuli wanhu wabagame kozipa ukomu ng'huli za hemwe zilingoneka za kubagama, kodita ahyo kukolela Muhe wa heye yalingikala mgati mwa hemwe.

12 Lelo, wang'holozangu, twanayo mbuli, hambe tuganigwe kikala kota ng'huli za hetwe za wihe vyozilingugana kikala. 13 Kwa vila wone mikale kwa kuwinza lukuli vyolugana ng'hatu mobagama. Ila wone kwa nzila ya Muhe Yelile mogadumya madito ga hemwe gehile, lelo, mowa wakomu. 14 Mina wala weng'ha walingulongozwa na Muhe wa Nguluwi, awo ndo wana wa Nguluwi. 15 Mina hambochele Muhe Yelile leka yalinguwadita hemwe wapogozi kahi mdumbe, ila mbochela Muhe yalinguwadita hemwe wana wa Nguluwi, kwa ludali lwa Muhe ayo, hetwe twangumchema Nguluwi, "Aba," izeleche "Mhaza!" 16 Naye Muhe wa Nguluwi katawiza na nhumbula za hetwe kota hetwe twa wana wa Nguluwi. 17 Lelo, kwa vila hetwe twa wana wa Nguluwi, ahyo tobochela utambichizo weng'ha Nguluwi woyawawichile wanhu wa heye, twanguhaliza hamwe na Kilistu, wone tugaziche naye, vivyo du tuwe hamwe hali ukulu wa heye.

18 Ndangona kota magazo ga mhela awu wa sambi ne hado hauwele chinhu wone tuwhanize na ula ukulu woulajilwa kwa hetwe. 19 Vilumbigwe vyeng'ha vyangumbeteza ng'hatu Nguluwi yawalajile wana wa heye. 20 Mina, vilumbigwe naviwikwa vyoneche haviwele chinhu, ila haiwele kwakugana hewo, ila kota navyoyaganile Nguluwi. Leka ahyo wabaho utumbilo, 21 mina avyo navyo vilumbigwe vyogomboligwa kulawa kuli upogozi wa kuwifya, vinjile kuli kilejeha kwa ukulu wa wana wa Nguluwi. 22 Mina tuvizela mbaka sambi baha, vilumbigwe vyeng'ha vyangulila kwa usungu kota wa kulela mwana. 23 Kahi haiwele hihyo vilumbigwe viliyeng'ha, ila na hetwe tuwele na ayo Muhe Yelile, yawele wamwaluko wa ndolendole za Nguluwi, natwe twangulila mgati mwa hetwe, aku tubeteza Nguluwi yatudite tuwe wana wa heye, nhumbula za hetwe zigomboligwe. 24 Mina kwa utumbilo awu hetwe tuloholigwa. Ila utumbilo wahela chinhu mina wone tuchone chila chotulingitumbila. Mina ndo whaani yalingitumbila chila choyalinguchona? 25 Wone tulingitumbila chila hatunachona hebu, twangubeteza kwa kwimilila.

26 Hiho du, naye Muhe Yelile kangututanza kuli ung'hochele wa hetwe. Mina hatuvizelele vyotulinguganigwa kulanda, ila Muhe heye kangutulandila kwa Nguluwi, kwa kung'ung'uta kwa masizo ne kulavya lizi. 27 Naye Nguluwi yalingulola mbaka mgati mwa nhumbula za hetwe, kavizela majesa ga heye Muhe, kwa vila ayo Muhe Yelile kanguwalandila wanhu wa Nguluwi kwa kuwinza vyoyogana Nguluwi.

28 Tuvizela kota, kuli mbuli zeng'ha Nguluwi kangukola mijito hamwe na wanhu weng'ha walingumgana, yani wala yawachemile kwa chiwalo cha kugana kwa heye. 29 Mina awo yawahagule kulawila katali, ndo yawahagule wewhane na Mwanage, leka Mwanage yawe wa mwaluko mli wang'holoze wenji. 30 Lelo, wala Nguluwi yawahagule ndo wala yawachemile, awo yawachemile ndo wala yawaditile watanganiche ndo awo yawahanzile kahi kuli ukulu wa heye.

31 Kwa mbuli azo zeng'ha, tulonje choni lelo? Wone Nguluwi yawele hamwe na hetwe, whaani yoweza kutulemela? 32 Nguluwi hamonele ne isungu mwanage wa udewele, ila nakamlavya kwa chiwalo cha hetwe tweng'ha. Hanga nakadita ahyo, ndaze, hotugalila kwa kubweda vinhu vyeng'ha hamwe na heye? 33 Whaani yowalonjeleza wahaguligwe na Nguluwi? Heye Nguluwi yuye nakawakunda kota watanganika! 34 Whaani yowatagusa kwa wihe? Kuduhu! Mina Kilistu Yesu ndo yabagame, kahi nakazilipuka kuli wanhu wabagame na kangikala ubanzi ya kudilo kwa Nguluwi. Heye ndo yalingutulandila! 35 Whaani yotubagula na igano lya Kilistu? Ndaze, ndo kugaya ama kugazigwa ama magazo ama nzala ama kwisilwa nguwo ama hali nongwa ama kubagama? 36 Kota Maandiko Matakatifu vyogalingulonga,

"Kwa chiwalo cha hegwe, twangukopoligwa chila zuwa,

twanguditilwa kota ming'holo jilinguhilikwa kudumuligwa singo."

37 Ila, kuli mbuli azi zeng'ha, tusumya ng'hatu kwa kukolela heye yatuganile. 38 Mina ndivizela ng'hatu kota haduhuli chinhu chiweza kutubagula na igano lya heye, ne kubagama ne ukomu ne wahilisi wa kilanga ama wala walingulongoza kilanga ne galingulawila sambi ne golawila hamba ne ludali, 39 ne gala gawele kuchanya ne gala gawele hasi ng'hatu. Haduhu choneche chilumbigwe, chiweza kutubagula na igano lya Nguluwi liwele kuli Yesu Kilistu Mkulu wa hetwe.