1 Lelo, kwa vila tuditigwa tuwe watanganiche kwa makundo, lelo twangikala goya na heye Nguluwi kwa kukolela Mkulu wa hetwe Yesu Kilistu. 2 Kwa makundo ga hetwe, Yesu nakatigala kuli kunoga kwa heye Nguluwi motulingikala sambi. Lelo, twangidaila kitumbila kotuwele nako kwa kihanza kuli ukulu wa Nguluwi. 3 Ena, haiwele ago hela, kahi twangusangalala mli magazo ga hetwe, tuvizela magazo gangigala ubetezo, 4 nako kubeteza kwangigala kukundigwa na kukundigwa kwangigala kitumbila. 5 Kitumbila hambe kutubade, mina Nguluwi nakatujidila mnhumbula za hetwe igano lyake kukolela Muhe Yelile yatupele hetwe.

6 Lotwali hela ludali, mhela Nguluwi loyauhagule lowuyile, Kilistu nakabagama kwa chiwalo cha wihe wa hetwe. 7 Haiwele ubewe kwa munhu kubagama kwa chiwalo cha munhu yatanganiche, ila hanji munhu kobagama kwa chiwalo cha munhu yanojile. 8 Ila Nguluwi nakalajila kangutugana, mina lotwali tung'hali na gehile, Kilistu nakabagama kwa chiwalo cha hetwe. 9 Kwa vila sambi tuditigwa tuwe watanganiche kwa danda ya Kilistu, ndo yangoneka ng'hatu kotulohola kulawa kuli kuzudila kwa Nguluwi. 10 Mina, lotwali tung'hali wang'honyo wa heye, Nguluwi nakatuhanyisa na heye kwa kubagama kwa Mwana wa heye. Kwa vila lelo natuhanyiswa na heye, yangulajila ng'hatu toloholigwa kwa ukomu wa Kilistu. 11 Ila haiwele ago yeng'ha, ila twangusechelela kahi kuli Nguluwi kwa kukolela kwa Mkulu wa hetwe Yesu Kilistu yula yatuhanyise na Nguluwi.

12 Kwakukolela munhu yumwe gehile nagenjila muisi, nago nagambuza kubagama. Ahyo kubagama nakwenela kuli wanhu weng'ha, kwa vila weng'ha nawadita gehile. 13 Lokung'hali kuwa na malajizo, gehile galikuko muisi yeng'ha, ila gehile hambe gawazigwe kuli kukumbuchila ne malajizo. 14 Ila kwaluchila mhela wa Adamu mbaka mhela wa Musa, kubagama nakulongoza na wala hawaditile gehile kota ga Adamu, ga kumhinduka Nguluwi. Adamu nakewhana na Kilistu yawele nakoya hamba. 15 Ila wihe wa Adamu hauwhanile na utambichizo wa Nguluwi. Mina, hanga gehile ga munhu yumwe nagambuza kubagama kwa wanhu weng'ha, kwa isungu lya munhu yumwe, yawele ndo Yesu Kilistu, Nguluwi nakawonjezela weng'ha utambichizo na ndolendole za heye. 16 Ndolendole ya Nguluwi haiwhanile na wihe wa munhu yumwe. Kwa vila munhu yumwe loyaditile gehile, Nguluwi nakatagusa, ila hala lowawifile wanhu wenji, Nguluwi nakegala ndolendole ya kuwadita watanganiche. 17 Kwa gehile ga munhu yumwe, kubagama nakulongoza kukolela munhu ayo yumwe, ila yangoneka hazelu choyaditile yula munhu yumwe, yawele ndo Yesu Kilistu, ndo chikulu ng'hatu. Weng'ha walingubochela utambichizo na ndolendole ayo yakuwadita wawe watanganiche, wolongoza kuli ukomu kwa kukolela ayo yumwe, yawele ndo Yesu Kilistu.

18 Lelo, kota vila kwa gehile ga munhu yumwe vyogegale utaguso kwa wanhu weng'ha, hihyo du chinhu chimwe chinojile cha munhu yumwe chowagombola wanhu weng'ha na changuwapa kutanganika na ukomu. 19 Kulema kuhulichiza kwa munhu yumwe, wanhu weng'ha nawadita gehile, hihyo du kuhulichiza kwa munhu yumwe kawadita wenji wawe watanganiche hali heye Nguluwi.

20 Malajizo nagalawila, nagambuza konjezeka kwa gehile, ila hala gehile logonjezeche, kunoga kwa heye Nguluwi nakonjezeka ng'hatu. 21 Kota vila gehile vyogalongoze kwa kubagama, vivyo du utambichizo wa Nguluwi wolongoza kwa gatanganiche na kigala ukomu wa mazuwa gose kwa kukolela Yesu Kilistu Mkulu wa hetwe.