1 Lelo, ndanguuza, ndaze, Nguluwi nakawalema wanhu wa heye? Ne hado! Hawalemile hebu! Heni nda Muisilaeli, mlelwa wa Abulahamu, nda munhu wa nhanzi ya Benjamini. 2 Nguluwi hawalemile wanhu wa heye nayawahagule kulawila mwaluko. Mwangukumbuka vyogalingulonga Maandiko Matakatifu kuwala Eliya mhela yamng'ung'utile Nguluwi kwa mbuli ya Isilaeli, 3 "Mkulu, wawakopola waloli wa hegwe na kubomola honhu ha kulavila nhambiko za hegwe. Ndo heni ndiliyeka mhonile, nawo wangugana kung'hopola!" 4 Ndaze, Nguluwi nakamwidichila choni? Nakamlonjela, "Nandiwichila wanhu elufu saba (7,000) wawele hawamfugamile Baali." 5 Lelo, ndo vyoiwele mhela awu wa sambi, wabaho wanhu wala Nguluwi yawahagule kwa chiwalo cha isungu kwa heye. 6 Ila wone nawahaguligwa kwa isungu, haiwele kahi kwa kuwinza madito. Mina, wone uhaguzi wa heye nawitumbile madito ga wanhu, isungu lya heye hanalyali isungu kahi.

7 Sambi, ndaze? Wanhu wa Isilaeli hawachiwene chila chowali wochipala, ila weng'ha wahaguligwe nawachona. Wanji nawambuzwa nhumbula za hewo ziwe zigagadale, 8 kota vyogalingulonga Maandiko Matakatifu.

"Nguluwi kazidita nhumbula za hewo zigagadale,

na mbaka lehano hambe walole kwa meho ga hewo,

ne kuhulika kwa makutu ga hewo."

9 Naye Daudi kangulonga,

"Visaga vya hewo viwe idiwa lya kuwagwiliza,

wagwe na kugazigwa.

10 Meho ga hewo gawichigwe jiza,

leka walemwele kulola.

Migongo ja hewo jibinuche mazuwa gose!"

11 Lelo, ndanguuza, hambi Wayahudi wekwang'hwala mbaka wagwa ng'hatu? Ne hado! Ila kwa gehile ga hewo ulohozi nauya kwa wanhu wa isi zinji, leka Wayahudi wawonele maya. 12 Ila gehile ga Wayahudi gambuza kuya utambichizo winji kwa isi yeng'ha na nongwa za hewo, zigala utambichizo winji kwa wanhu wa isi zinji. Lelo, Wayahudi weng'ha wone wamgalamchile Nguluwi, utambichizo wokonjezeka ng'hatu.

13 Lelo, ndanguwalonjelani hemwe wanhu wa isi zinji. Kwa vila heni nda mtumigwa kwa wanhu wa isi zinji, ndangidayila vyondilingudita, 14 ndangugana ndiwadite wanhu wayangu wakoneleni hemwe maya, leka mbeze kuwalohola wamwenga. 15 Mina kwa kulemigwa kwa hewo nakuwadita wanhu wahanyiswe na Nguluwi, yowa ndaze mhela lowokundigwa na Nguluwi? Wabagame wozilipuka!

16 Wone chihande cha mwaluko cha ibumunda nachiwichigwa chiuyeng'ha, ibumunda lyeng'ha lyanguwa liwichigwe chiuyeng'ha, mizabi ja migodi wone jinoje na nhagala za igodi ziwaga zinojile kahi. 17 Ena, nhagala zimwe za mzeituni mkagunda nazitemigwa na honhu hake hawichigwa na kuwohigwa nhagala ya mzeituni wa kisolo naiwichigwa. Hemwe wanhu wa isi zinji mwangiwhana na mzeituni wa kisolo na sambi mwangihanza hamwe na unhovu wa igodi lya mzeituni. 18 Lelo, mleche kuwabeza wala watemigwe kota nhagala! Na wone lyakuko lya kidayila, mkumbuchile kota hamuwele hemwe mlingujimiza ajo mizabi, ila mizabi ndo jilinguwemiza hemwe.

19 Ila molonga, "Nhagala nazitemigwa leka heni mbichigwe honhu hake." 20 Goya! Nazitemigwa kwa chiwalo cha kwanjila makundo, ila hegwe kwangwima kwa makundo ga hegwe. Ila uleche kidaya, leka wime kwa kudumba. 21 Mina, wone Nguluwi hawonele isungu Wayahudi wewhanile na nhagala za chaluchizo, ndaze, Nguluwi kokonela isungu hegwe?

22 Lelo mlole, Nguluwi vyoyawele na isungu na vyoyang'hang'hale. Heye kang'hang'hala kwa wala wagwile, ila kana isungu kwa hemwe wone mlutilila kikala mli igano lya heye, ila wone hebu, vivila namwe motemigwa. 23 Nawo Wayahudi, hihyo, wone waleche wihe wa hewo wa makundo, wohiluswa honhu hala ha mwaluko. Mina Nguluwi koweza kudita ahyo. 24 Hemwe wanhu wa isi zinji, kwa chaluchizo mfanda kota nhagala za mzeituni wa kisolo, ila musigwa ako, muwichigwa kuli mzeituni mkagunda honhu hala kwa chaluchizo hahawele ha hemwe. Ila Wayahudi kwa chaluchizo ndo kota mzeituni mli kamgunda na yowa mbuli ya ubewe ng'hatu kwa hewo kuwichigwa na kuwohigwa kahi muli igodi lya mzeituni.

25 Wang'holozangu ndangugana mvizele ng'hatu kukomya kuvisigwe mleche kiwona mna luhala lukami. Usugu wa Wayahudi wali wa mhela udo hela mbaka wanhu hawawele Wayahudi lowowa wamhiluchile Nguluwi. 26 Aho Waisilaeli weng'ha woloholigwa, kota vyogalingulonga Maandiko Matakatifu,

"Mlohozi kokuya kulawila Siyoni,

kowusa wihe wa lukolo lwa walelwa wa Yakubu.

27 Ali ndo ilagano lyondilingudita na hewo,

mhela wondikusa wihe wa hewo."

28 Kwa vila wanguilema Mbuli Inojile, Wayahudi nawawa wang'honyo wa Nguluwi, ila kwa lutogo lwa hemwe wanhu hawawele Wayahudi. Ila kwa vila nawahaguligwa na Nguluwi, wang'hali woganigwa na Nguluwi kwa chiwalo cha wasekulu wa hewo. 29 Mina Nguluwi wone yawape ndolendole za hewo na kuwahagula, hambe mng'ung'utile chila choyaditile. 30 Aho mwaluko hemwe namleka kumhulichiza Nguluwi ila sambi mpegwa isungu lya heye, kwa hewo Wayahudi kaleka kumhulichiza Nguluwi. 31 Vivila kota hemwe lombochele utambichizo, Wayahudi nawo sambi, wangumleka Nguluwi leka hewo nawo wabochele isungu lya Nguluwi. 32 Mina Nguluwi kawawoha wanhu weng'ha kuli kubelenhuka kwa hewo leka yawonele isungu weng'ha.

33 Lufufu na luhala na uwanzi wa Nguluwi ndo lukulu lukami. Utaguso wa heye hambe upugajizwe na nzila za heye hazilinguzeleka. Kota vyogalingulonga Maandiko Matakatifu.

34 "Whaani yajezile kugazela Majesa ga Mkulu?

Whaani yolongasa naye?

35 Ama ndo whaani yalongole kumha chinhu,

naye Nguluwi yamhilusile chinhu acho?"

36 Kwa vila vinhu vyesa vyangulawa kwa heye, vyabaho kukolela heye na kwa chiwalo cha heye. Ukulu na uwe kwa heye mazuwa gose! Ena.