1 Heni Paoli, chitumagwa wa Yesu Kilistu, Nguluwi nakanyhema ndiwe mtumigwa na kuwichigwa chiuyeng'ha leka ndiwadamlile wanhu Mbuli Inojile ya heye.

2 Aho katali, Nguluwi nakalagana na wanhu kwa Mbuli Inojile kwa kukolela waloli wa heye kuli Maandiko Matakatifu. 3 Ayi Mbuli Inojile ya heni yangumdamla Mwana wa Nguluwi, Mkulu wa hetwe Yesu Kilistu, yawele kuwala uwunhu wa heye, nayali mlelwa wa Daudi, 4 kuwala ukulu wa heye, nakatawizwa yawe Mwana wa Nguluwi kwa ludali lwa Muhe Yelile kwa kuzilipulwa kulawa kwa wabagame. 5 Kwa nzila ya heye, tubochela kunoga kwa heye tuwe watumigwa kwa chiwalo cha Kilistu, leka tuwadite wanhu wa isi zinji leka wakunde na kuhulichiza. 6 Hemwe mweng'ha mwa mli wanhu awo, mchemigwa muwe wanhu wa heye Yesu Kilistu. 7 Lelo, ndanguwandichilani hemwe mweng'ha muli ako Loma mlinguganigwa na Nguluwi, nakawabagula muwe wanhu wa heye. Ndanguwaganilani igano na kikala goya kulawa kwa Nguluwi Mhaza wa hetwe na Mkulu Yesu Kilistu.

8 Nding'hali kwaluka geng'ha, ndanguta malumbo Nguluwi wa heni kwa kukolela Yesu Kilistu kwa hemwe mweng'ha, kwa vila makundo ga hemwe gangudamligwa na wanhu weng'ha kuli isi yeng'ha. 9 Nguluwi yondilingumfugamila kwa nhumbula ya heni yeng'ha kuli kudamla Mbuli Inojile ya Mwana wa heye, ndo mlolezi wa heni kota heni hambe ndikusemweni, 10 chila zuwa hondimlanda Nguluwi. Ndangumlanda Nguluwi wone yagane, yamhe mhela unojile wa kuya kwa hemwe. 11 Mina nangana ng'hatu ndikoneni ndiwagawileni ndolendole za chimuhe za kuwakangaza. 12 Gondilingulonga hano, weng'ha heni na hemwe tikangaze. Makundo ga hemwe gong'hangaza heni na makundo ga heni gokukangazani hemwe. 13 Hemwe wang'holozangu, ndangugana mvizele hino, nangana kukujendelani, ila mbaka sambi ndemezwa. Nangana wanhu wamkunde Nguluwi hali hemwe kota vyomhatile wanhu hali wanhu wa isi zinji. 14 Namhegwa mijito ja kuwadamlila wanhu weng'ha, Wagilichi na hawawele Wagilichi, wawele na luhala na wasowile luhala. 15 Ndo mina heni ndangugana ng'hatu kuidamla Mbuli Inojile kwa hemwe mlingikala ako Loma.

16 Hambembone soni kudamla Mbuli Inojile, kwa vila ina mong'ho wa Nguluwi ilinguwalohola weng'ha walingukunda. Wawe Wayahudi na wala hawawele Wayahudi. 17 Kwa vila Mbuli Inojile yangulajila hazelu Nguluwi vyoyawele nguwadita wanhu watanganiche kwa heye, wanhu wanguwa ahi kwa kukunda, kulawila mwaluko mbaka kuduma, kota vyogandichigwe. "Munhu yatanganiche kochikala kwa makundo."

18 Nguluwi kalajila kuzudila kwa heye kulawila kilanga, iwalawile weng'ha walingumbeza Nguluwi na kudita gehile wala weng'ha walingudita kukomya kuleche kuzeleka. 19 Kwa vila, geng'ha gala galinguzeleka kwa chiwalo cha Nguluwi ndo gahazelu kwa hewo, kwa vila heye Nguluwi nakagadita gazeleche kwa hewo. 20 Kulawila zuwa lila Nguluwi vyoyalumbile isi, ludali lwa heye lwa mazuwa gose na ukulu wa heye, hanga hambevyoneche kwa meho, vyanguzeleka ng'hatu. Wanhu woweza kuzizela mbuli azo kwa vinhu avyo vyoyalumbile Nguluwi. Ahyo wahela nzila ya kilewela. 21 Hanga wavizela hana Nguluwi, ila hambewamtogole vyoilinguganigwa ne kulonga malumbo. Lelo chowalingijesa nachali chaupoka na nhumbula za hewo ziwa nhitu. 22 Wangidaya wana luhala aku wawele wapoka. 23 Waleka kumtogola Nguluwi yalingikala mazuwa gose, ila wangujifugamila jimalukolo jiwhanile na wanhu walingubagama, jiwhanile kota migongolo na videje ama migongolo jilumbigwe jilingutambala.

24 Ahyo, Nguluwi nakawaleka wawinze maya gehile ga nhumbula za hewo na kudita mbuli za soni mli ng'huli za hewo. 25 Wangugalamla kukomya kwa Nguluwi kwa udesi, wanguvitogola na wanguvifugamila vinhu vilumbigwe na Nguluwi, ila hawalingumtogola heye yalumbile yalinguganigwa kutogoligwa mazuwa gose! Ena.

26 Kwa vila wangudita ahyo, Nguluwi nakawaleka wawinze gala gehile. Nawo wadala wa hewo nawaleka kuwasa na walume kota vyowalumbigwe, wangigana hewo kwa hewo. 27 Nawo walume nawadita hiho, nawaleka kuwasa na wadala kota vyowalumbigwe, wangigana hewo kwa hewo. Wangiditila mbuli za soni walume kwa walume, ahyo naweyambuza wawo kugazigwa kwa gala gehile ga hewo gowaditile.

28 Kwa vila wanhu nawalema kumzela Nguluwi, Nguluwi nakawaleka wawinze luhala lwa hewo lwajilile, nawadita gala hawaganigwe kudita. 29 Wanhu awa nawamema wihe na kubunza na maya na ubuhu. Nawamema fihi na kukopola na kilewa na uhadi na kuwifya na kuheha 30 na kulonga vinhu vihile kwa wanhu wanji, ndo wanhu wa kuzudiza kwa Nguluwi, wajuvi na wana mnvinvi na kidaya na wadaha ng'hatu kudita gehile na hambe wawahulichize wahaza wa hewo, 31 wahela luhala na hambe webate ilagano na hawanojile ne kuwonela isungu wanhu wanji. 32 Wanguvizela kota kuli malajizo ga Nguluwi gangulonga wanhu walingudita vinhu kota avyo, wanguganigwa kubagama. Mzidi wa ago, haiwele hela wangudita mbuli azo wawo, ila kuno wanguwatogola wanhu walingudita mbuli azo.