1 Chila munhu kangulapigwa kuwahulichiza walingulongoza isi, kwa vila kuduhu munhu yolongoza wone Nguluwi hamlechile yalongoze, Nguluwi yaliyeka ndo yalinguwapa vilongozi ludali lwa kulongoza. 2 Yalingubeza ludali lwa vilongozi kangubeza ilajizo lya Nguluwi, nawo walingudita ahyo wotagusigwa. 3 Mina walingulongoza hambewambuze kudumba kwa wanhu wanojile, ila kwa wanhu wehile. Lelo, kwangugana uleche kumdumba munhu yawele na ludali? Udite ganojile naye kokutogola, 4 mina heye ndo chitumagwa wa Nguluwi yalingukola mijito kwa mbuli ya hegwe inojile. Ila wone udite gehile, lelo, yokulapa kudumba, mina heye ng'hatu kana ludali lwa kukugaza. Heye chitumagwa wa Nguluwi, kuwalajila kuzudila kwa heye kwa wala walingudita wihe. 5 Ahyo ndo yangulapigwa kuwahulichiza wakulu wa isi wali na ludali, haiwele kwa chiwalo cha kudumba kuzudila kwa Nguluwi, leka kahi kwa vila nhumbula ya hegwe yovizela choulingugana kudita.

6 Kwa chiwalo chicho hemwe mwangulavya kodi, mina vilongozi wa isi wangumkolela mijito Nguluwi hanga wangukola gala gawele nguwalapa. 7 Mumhe chila munhu hachi ya heye, munhu wa ushulu, yapegwe ushulu na munhu wa kodi yapegwe kodi na yalingudumbigwa nayadumbigwe na yalingugana katogo na yatogoligwe.

8 Mleche kudaigwa na munhu yoneche, ila migane. Yalingumgana yoyalingikala habehi na heye, kanguwinza malajizo. 9 Mina malajizo aga, "Uleche ung'hondwa na uleche kukopola na uleche konela maya" na zinji zoneche, zamumo mli ilajizo ali limwe, "Mgane yalingikala habehi na hegwe kota vyoulingigana gwegwe." 10 Yalingumgana yalingikala habehi na heye hambe yamditile vibi. Lelo, igano ndo kwenela kwa malajizo.

11 Mzidi wa ago, hemwe sambi mvizela kota twa mli mhela wachi. Sambi ndo mhela wa kulilimka, ena, ulohozi wa hetwe wahabehi ng'hatu sambi kusinda mhela wula wotwaluche kukunda. 12 Nechilo yangumala na nemisi yahabehi kwinjila. Lelo, tuleche kudita wihe wa jiza, tudite ganojile ga lumuli. 13 Tikale goya kota wanhu walingikala nemisi, haiwele kwa kulya lukami na kugala na wavu na ung'hondwa na kilewa na maya. 14 Lelo milumbe na Mkulu Yesu Kilistu, hamba mleche kuwinza maya ga ng'huli za hemwe vyozilingugana.