1 Naye Saulo nayali yakundile kota Stefani kanguganigwa kubagama.

Zuwa alyo chilundo cha wanhu walingumkunda Nguluwi ako Yelusalemu nachaluka kugazigwa ng'hatu. Wanhu weng'ha walingumkunda Nguluwi naiwagana kusambaluka kuli honhu ha migunda ja Yudeya na Samaliya, ila haiwele watumigwa. 2 Wanhu walingumdumba Nguluwi nawamtila Stefani na kulombocheza ng'hatu kwa chiwalo cha heye.

3 Mhela wuwo Saulo nakajeza kuchiwifya chilundo cha wanhu walingumkunda Nguluwi. Nakaluta kuli chila ng'handa, nakawalavya mgati walingumkunda Nguluwi, walume na wadala, nakawawika mchinweng'ho.

4 Wala walingumkunda Nguluwi wasambaluche, nawaluta chila honhu kuno wodamla ulonzi wa Nguluwi. 5 Naye Filipo nakenjila kuli muji wa Samaliya, nakadamla mbuli za Kilistu kwa wenyeng'haye wa aho. 6 Wanhu lowamhuliche Filipo na kona ulajilo na vinduzanduza vyoyaditile, nawahulichiza goya gala goyalonjile. 7 Kwa vila vijeni viwele navinjila kwa wanhu navilawa kuno vitowa iyowe likulu na wanhu wenji wawele nawazilika na vyete nawaloholigwa. 8 Nakwali na usangalalo ukulu kuli muji wula.

9 Lelo nakwali na munhu yumwe yalinguchemigwa Simoni yawele nayali yaditile uhawi kwa mhela winji kuli muji awo yowabubuwaza wanhu weng'ha wa Samaliya. Nakedaya kota heye ndo munhu mkulu. 10 Wanhu weng'ha, wadodo na wakulu, nawamhulichiza goya, wolonga, "Munhu ayu ndo ludali lwa mlungu lulinguchemigwa ‘Ludali Lukulu.’ " 11 Nawamuwinza kwa vila nayali yawabubuwaze kwa uhawi wa heye kwa mhela winji. 12 Ila lowaukundile usenga wa Filipo kuwala Mbuli Inojile ya undewa wa Nguluwi na itagwa lya Yesu Kilistu, nawabatizigwa, wadala na walume. 13 Simoni naye nakakunda, loyasindile kubatizigwa nayali yochilongoza na Filipo, nakabubuwala kwa ulajilo wa vinduzanduza viwele vikoleka.

14 Wala watumigwa wawele kula Yelusalemu lowahuliche kota wenyeng'haye wa Samaliya nawo nawaubochela ulonzi wa Nguluwi, nawawalajiza ako Petili na Yohani. 15 Lowafichile Samaliya, nawalanda kwa chiwalo cha walingumkunda Nguluwi leka wambochele Muhe Yelile, 16 kwa vila mhela awo Muhe Yelile nayali hamdulichile munhu yoneche hali hewo, ila nawabatizigwa hela kwa itagwa lya Mkulu Yesu. 17 Lelo, Petili na Yohani wawawichila moko awo wamkundile Nguluwi, nawo wambochela Muhe Yelile. 18 Aho Simoni nakavizela kota kwa kuwichilwa moko ga watumigwa, walingumkunda Nguluwi nawapegwa Muhe Yelile. Ahyo nakawapa sendi Petili na Yohani yolonga, 19 "Mumhe nani ludali alo leka yoneche yondimuwichila moko, yabochele Muhe Yelile."

20 Ila Petili nakamwidichila, "Udumigwe hegwe hamwe na sendi za hegwe, kwa vila kwangijesa kota kwanguweza kugula ludali lwa Nguluwi kwa sendi! 21 Kwahela honhu honeche ne hachi kuli mijito ajo kwa vila Nhumbula ya hegwe haiwele goya hali meho ga Nguluwi. 22 Ahyo, ulonje gehile ga hegwe hali Mkulu Nguluwi na umlande heye hanji koweza kukulechela kwa chiwalo cha majesa ago. 23 Kwa vila ndangukona kota nakumema maya na kwa mchinweng'ho cha gehile!" 24 Simoni nakedichila, "Mlande kwa Mkulu Nguluwi kwa chiwalo cha heni, leka ago gomlonjile galeche kufika kwa heni."

25 Petili na Yohani lowasindile kulavya ulolezi wa hewo na kudamla usenga wa Mkulu Nguluwi, nawahiluka Yelusalemu. Lowawele wohiluka nawadamla Mbuli Inojile kuli vijiji vinji vya Samaliya.

26 Mhilisi wa Mkulu Nguluwi nakamlonjela Filipo, "Wiwiche goya ulute kusini kwa kukolela nzila ilingulawila Yelusalemu kuluta Gasa." Nzila ayo yangukolela kugunuche. 27 Lelo, Filipo nakewika goya, nakaluka majendo. Mhela wuwo nakwali na munhu yumwe towashi wa Etiopiya, yawele nayali kuli majendo ga kuluta kaye kwa heye. Ayo munhu nayali chilongozi mkulu yawele na ludali kuli ng'hano za Kandake, mndewa wa chidala wa Etiopiya. Nayali yalutile ako Yelusalemu kumlanda Nguluwi na mhela awo nayali yohiluka yawele yakwinile mutuka wa kukwejigwa. 28 Loyawele mnzila yohiluka, nayali yochisoma chitabu cha mloli Isaya. 29 Lelo, Muhe Yelile nakamlonjela Filipo, "Ulute habehi na mutuka awo leka milongoze." 30 Filipo nakabilimila habehi na mutuka, nakamhulika ayo munhu yosoma chitabu cha mloli Isaya. Filipo nakamuuza, "Ndaze, kwangugazela ago goulingugasoma?" 31 Ayo munhu nakamwidichila, "Ndovizela ndaze wone haduhu munhu wa kundongoza?" Aho nakamchema Filipo yakwine kuli mutuka, yekalise hamwe na heye. 32 Lelo, honhu ha Maandiko Matakatifu hoyawele yosoma nayali ahi,

"Nayali kota ing'holo lilinguhilikwa kudumuligwa singo,

tulu kota vila lyana ing'holo holidumuligwa milaika,

heye halavile lizi ne hado.

33 Kuli kubasigwa soni kwa heye hapegwe ne hachi.

Haduhu yoweza kulonga kuwala lulelo lwa heye,

kwa vila ukomu wa heye nawusigwa kuli isi."

34 Ayo Mwetiopiya nakamlonjela Filipo, "Ndonjele, ayu mloli kangulonga kuwala choni? Kangulonga mbuli azi kuwala heye yuye ama kuwala munhu yunji?" 35 Lelo, Filipo nakaluchila honhu ha ago Maandiko Matakatifu, nakamlonjela Mbuli Inojile kuwala Yesu. 36 Lowawele wolutilila na majendo, nawafika honhu hawele na mazi, ayo chilongozi nakalonga, "Honhu aha hana mazi, ndaze, hana chinhu choneche chilingundemeza kubatizigwa?" 37 Filipo nakamlonjela, "Wone kwangukunda kwa nhumbula ya hegwe yeng'ha kwanguweza kubatizigwa." Naye nakedichila, "Ena, ndangukunda kota Yesu Kilistu ndo Mwana wa Nguluwi." 38 Lelo, ayo chilongozi nakalajiza wula mutuka wime, weng'ha weli Filipo na yula chilongozi nawedulika kuli mazi, naye Filipo nakambatiza. 39 Lowalawile kuli mazi Muhe wa Mkulu Nguluwi nakamdita Filipo yajilile. Ayo chilongozi hamuwene kahi, ila heye nakalutilila na majendo ga heye kuno yawele yasangalale.Munhu yalingubatizigwa 40 Filipo nakefika yawele Asoto, nakakola kuli miji jeng'ha kuno yodamla Mbuli Inojile mbaka hoyafichile Kaisaleya.