1 Paoli nakawanogolela meho wala watagusa, hamba nakaluka kulonga, "Wang'holozangu, mbaka mhela awu nanyeneza gondilinguganigwa kudita kwa Nguluwi kwa kunuwila kunojile ng'hatu." 2 Aho Ananiya mtambika mkulu nakawalonjela wala wawele nawema habehi na Paoli kota wamzabule kumlomo. 3 Lelo, Paoli nakamlonjela, "Nguluwi yuye kokuzabula hegwe uwele kota lukanzi lubakalizwe chokaa! Kwanguweza ndaze kikala aho leka kunhagusa kwa malajizo kuno kwangubena malajizo kwa kulonga nhowigwe?" 4 Wala wanhu wawele nawema habehi na Paoli nawamlonjela, "Ndaze, kwangujeza kumliga mtambika mkulu wa Nguluwi?" 5 Paoli nakedichila, "Wang'holozangu, sivizelele kota heye ka mtambika mkulu. Kwa vila nayandichigwa, ‘Uleche kulonga vibi kuwala chilongozi wa wanhu wa hegwe.’ "

6 Paoli loyavizelele kota wamwe wa wanhu wawele hala nawali Masadukayo na wanji ndo Mafalisayo, nakalandula lizi hali chitala, "Wang'holozangu, heni nda Mfalisayo, mwana wa Mfalisayo. Nandonjelezwa kuwala kitumbila kwa heni kuli kuzilipuka kwa wabagame." 7 Loyalonjile ago, ivuche ling'ang'ale nalyaluka hali Mafalisayo na Masadukayo na nhing'hano naisambaluka. 8 Kwa vila Masadukayo wangulonga kota kuduhu kuzilipuligwa ne haduhu wahilisi ama muhe ila Mafalisayo wangukunda aga geng'ha. 9 Ivuche nalyonjezeka na wamwe wa walangusa wa malajizo ga Musa wawele ndo Mafalisayo nawalonga kwa mong'ho, "Hambe tone wihe woneche kwa munhu ayu, hanji muhe ama mhilisi nakalongasa na heye!"

10 Kilewa nakwali kukulu mbaka chilongozi mkulu wa wamizi nakadumba kota womtema Paoli vihande vihande. Ahyo nakawalonjela wamizi wa heye walute kuli chila chilundo, wamhole Paoli na kumhilula mgati mwa ngome.

11 Nechilo iwinzile, mkulu nakema habehi na Paoli, nakamlonjela, "Wikangangaze nhumbula! Kota vyoulonjile hano Yelusalemu, kodita hihyo kuli muji wa Loma."

12 Lokubwemwenzuche, Wayahudi nawadita nhing'hano ya chinyele. Nawelaha, "Hambe tulye ne kunwa mbaka hotumkopola Paoli." 13 Wanhu wawele nawadita nhing'hano ayo nawapuluta makumi gane. 14 Lelo, nawaluta kwa watambika wakulu na wasekulu, nawalonga, "Hetwe natilaha kota hatujeza choneche kuli milomo ja hetwe mbaka hotumkopola Paoli. 15 Lelo hemwe hamwe na watagusa mhiliche usenga kwa chilongozi mkulu wa wamizi leka yamigale Paoli kwa hemwe, midite kota mwangugana kuvizela ng'hatu kuwala heye. Twagoya kumkopola kung'hali hanafika hano."

16 Ila mwana wa lumbulye Paoli nakahulika kuwala kiwika goya ako, ahyo nakaluta mgati mwa ngome, nakamzelesa Paoli kuwala mbuli ayo. 17 Aho Paoli kamchema mwamizi yumwe, nakamlonjela, "Mhiliche ayu msongolo kwa chilongozi mkulu wa wamizi, kana mbuli ya kumlonjela." 18 Mwamizi nakamhola ayo msongolo, nakamhilika mbaka kwa chilongozi mkulu wa wamizi, nakalonga, "Yula mnweng'hwa Paoli nakandanda ndimigale ayu msongolo kwa hegwe kwa vila kana mbuli ya kukulonjela." 19 Mkulu wa wamizi nakambata ayo msongolo moko, nakamigala honhu ha uyeka, nakamuuza, "Kwangugana kundonjela choni?" 20 Heye nakalonga, "Wayahudi nawekundiza wakulande umigale Paoli kuli chitala cha hewo mitondo kwa kidita kota wangugana kuvizela goya kuwala ulonjelezi wa heye. 21 Ila uleche kukunda kwa vila hana wanhu mzidi wa makumi gane wewichile goya kumvaba. Nawelaha kuleka kulya ne kunwa mbaka howowa wamkopole. Sambi wa goya, wangubeteza hegwe ukundize." 22 Chilongoza mkulu wa wamizi nakamkanya yula msongolo, "Uleche kumlonjela munhu yoneche kota nakundonjela mbuli azi." Hamba nakamleka yalute.

23 Lelo, chilongozi mkulu wa wamizi nakawachema wamizi weli nakawalonjela, "Muwawiche goya wamizi miya mbili na wakwina falasi makumi saba na wamizi miya mbili wawele na migoha, mlute Kaisaliya, muwe goya kuka lehano kung'hali saa tatu nechilo. 24 Kahi muwiche goya falasi wamwe kwa chiwalo cha Paoli, mumhiliche kwa kikala goya kwa Felisi chilongozi wa mkowa." 25 Hamba nakandika baluwa kuwala mbuli ayi.

26 "Heni Klaudiyo Lusia ndangukwandichila hegwe mkulu Felisi, chilongozi wa mkowa. Ulamche! 27 Wayahudi nawamibata munhu ayu habehi wamkopole. Ila nanduta na vilundo vya wamizi wa heni kumlohola kwa vila nanzeleswa kota heye ka mwenyeng'haye wa Loma. 28 Nandimhilika hali chitala chikulu cha hewo kuno ndigana kuvizela kuwala ulonjelezi wa hewo. 29 Nandivizela kota ulonjelezi nawali kuwala mbuli za malajizo ga hewo, ila hawele yalonjelezwe kwa mbuli yoneche ilingumgana yabagame ama yawichigwe mchinweng'ho. 30 Londonjelwe kota Wayahudi nawali wewichile goya kumkopola, nanyamula kumigala kwa hegwe, nandiwalonjela wawele nawamlonjeleza walonje ulonjelezi wa hewo kwa heye hali hegwe."

31 Lelo, awo wamizi nawamhola Paoli kota vyowalonjelwe, nawamigala nechilo yiyila mbaka Antipatili. 32 Mitondo wamizi wa magulu nawahiluka kuli ngome, nawawaleka wala wamizi wakwina falasi walutilile na majendo hamwe na Paoli. 33 Lowafichile Kaisaliya nawamha chilongozi wa mkowa yila baluwa na kumuwika Paoli hali ulongozi wa heye. 34 Felisi loyasomile ayo baluwa nakamuuza Paoli kota nakalawa kuli mkowa wachi. Loyazeleswe kota nayali yalawile kuli mkowa wa Kilikiya, 35 nakalonga, "Ndohulichiza ulonjelezi ulingukuwala hegwe hala du wawele nawakulonjeleza howofika hano." Hamba nakalonga Paoli yawichigwe hali wamizi kuli ng'handa ya undewa wa Helodi.