1 Kuli miji wa Kaisaliya nakwali na munhu yumwe yalinguchemigwa Kolinelio, yawele nayali chilongozi wa chilundo chilinguchemigwa Italiya. 2 Heye hamwe na wanhu wa ng'handa ya heye nawali womdumba Nguluwi, nayali yowatanza wazunwa na kumlanda Nguluwi mazuwa gose. 3 Zuwa limwe saa tisa matinazo, nakapata uloli, nakamona mhilisi yokuya kwa heye na kumlonjela, "Kolinelio!" 4 Kolinelio nakamlola ng'hatu kuno yodumba, nakamlonjela, "Hana choni Mkulu?" Ayo mhilisi nakamlonjela, "Nguluwi nakabochela kulanda kwa hegwe na ndolendole za hegwe kwa wazunwa na kuwa ukumbuchilo kwa Nguluwi. 5 Lelo walajize wanhu Yopa leka wamcheme munhu yumwe yalinguchemigwa Simoni, kwa itagwa linji Petili. 6 Heye kamng'handa ya Simoni yalingugongomanya ngozi yawele ng'handa ya heye ya hafungo ha Bahali." 7 Yula mhilisi loyochile, Kolinelio nakawachema vitumagwa wa heye weli hamwe na mwamizi yawele yomdumba Nguluwi yawele hali wala walingumkolela mijito, 8 nakawalonjela mbuli zeng'ha zilawile hamba nakawalajiza walute Yopa.

9 Mitondo nemisi, awo wanhu wadatu lowawele habehi kufika kuli muji wa Yopa, Petili nakakwina kuli chinduwiko cha ng'handa leka yalande. 10 Loyawele yolanda, nayali na nzala, nakagana kupata chilyo. Ila wowawele wowika goya chilyo, heye nakawasa ng'hatu na kulota. 11 Nakona ulanga ugubuligwe na chinhu kota igolole likulu lyanguduliswa kuno liwele libatigwe kuli mhembo zake zine. 12 Mgati mwa alyo igolole nakwali na chila igongolo liwele na magulu gane na vilumbigwe vilingutambala na videje. 13 Nakahulika lizi limlonjela, "Petili, winuche, udumule singo na ulye!" 14 Petili nakedichila, "Hebu, Mkulu, heni sinajeza chinhu choneche chiwele chikokomoche ama chiwele mlongo."

15 Lila lizi nalihulikwa kahi lwa keli, nalimlonjela, "Uleche kuvichema vikokomoka vinhu viwele Nguluwi nakavyeliza!" 16 Mbuli ayi naikoleka mala zidatu, hamba lila igolole nalihiluswa kilanga.

17 Petili loyawele yang'hali yabubuwale kuwala wula ulajilo woyauwene, wala wanhu wawele nawalajizwa na Kolinelio, nawaifichila yila ng'handa ya Simoni yalingugongomanya ngozi, nawema hali lwizi. 18 Nawahodiza na kuuza kota Simoni yalinguchemigwa Petili nayali yochikala aho.

19 Mhela Petili yawele yochijesa kuwala wula ulajilo, Muhe Yelile nakamlonjela, "Simoni, hana wanhu wadatu wangukupala. 20 Uduliche himahima na uleche kudumba kuluta na hewo kwa vila heni ndo ndiwalajize." 21 Lelo, Petili nakadulika, nakawalonjela awo wanhu, "Heni ndo yula mlingumpala. Lekachoni namuya?" 22 Hewo nawamwidichila, "Natulajizwa na Kolinelio yawele chilongozi wa wamizi. Heye ka yanojile na yalingumdumba Nguluwi na yalinguhulichizwa na Wayahudi weng'ha. Heye nakalonjelwa na mhilisi yelile yakulaliche kaye kwa heye leka yahulichize ulonzi woumlonjela." 23 Petili nakawalonjela wenjile mng'handa, nakawapa honhu ha kuwasa nechilo yila.

Mitondo, Petili nakaluka majendo hamwe na hewo, wamwe wa wanhu wa ako Yopa nawelongoza na heye. 24 Zuwa lya keli nawafika Kaisaliya naye Kolinelio nayali yowabeteza yawele na ivyazi lya heye na goloko wa heye yawalaliche. 25 Petili loyawele yokwinjila, Kolinelio nakalawa kumbochela, nakafugama hali heye na kinamiza mbaka hasi. 26 Ila Petili nakamwinula, nakamlonjela, "Wime, kwa vila heni nda munhu hela." 27 Petili nakalutilila kulongasa na Kolinelio, kuno wokwinjila mng'handa muwele nakawafika wanhu wenji wekungajize. 28 Petili nakawalonjela, "Hemwe mwanguvizela kota Myahudi yoneche nakalemezwa na malajizo ga nzila ya heye ya kumfugamila Nguluwi kilumba na wanhu wa isi zinji. Ila Nguluwi nakandajiza ndeche kumjesa munhu yoneche kota kakokomoka ama ka wavu. 29 Kwa chiwalo acho, lomnyhemile nambuya ne kijesa. Lelo, ndanguwauza, lekachoni namnyhema?" 30 Kolinelio nakalonga, "Mazuwa gadatu gapulute mhela kota awu wa matinazo, saa tisa, nandali ndimlanda Nguluwi kuchihengo cha heni. Baho du! Munhu yawele yavalile mivalo jilingupulika nakema kumwando kwa heni, 31 nakalonga, ‘Kolinelio! Kulanda kwa hegwe na ndolendole za hegwe kwa wazunwa nazikundigwa na Nguluwi. 32 Mlajize munhu yalute Yopa yakamcheme munhu yalinguchemigwa Simoni, kwa itagwa linji Petili, ka kuli ng'handa ya Simoni yalingugongomanya ngozi habehi na bahali.’ 33 Ahyo nandikugalila usenga ne kukawila, nagwe nakudita goya kuya. Lelo, hetwe twa kumwando kwa Nguluwi, kuhulichiza choneche chila chiwele Mkulu nakakulajiza kulonga."

34 Aho Petili nakaluka kulonga, "Ndikomya, lelo nandivizela kota Nguluwi hambe yabagule. 35 Munhu wa isi yoneche yalingumdumba Nguluwi na kudita gawele ga hachi kangukundigwa na heye. 36 Awu ndo wula usenga wa Nguluwi woyauhiliche kwa wanhu wa Isilaeli, yodamla Mbuli Inojile ilingigala kikala goya kwa kukolela Yesu Kilistu yawele ndo Mkulu wa wanhu weng'ha. 37 Hemwe mwanguizela mbuli ilawile kuli isi yeng'ha ya Wayahudi kwaluchila Galilaya kulawila hala Yohani vyoyadamle kuwala Ubatizo. 38 Mwangumzela Yesu wa Nasaleti na vila Nguluwi vyoyambakalize mafuta na kumha Muhe Yelile na mong'ho, heye nakaluta aku na ako yodita ganojile na kuwalohola weng'ha wawele hali ludali lwa Limazoga kwa vila Nguluwi nayali hamwe na heye. 39 Hetwe twa walolezi wa mbuli zeng'ha zoyaditile kuli isi ya Yudeya na muji wa Yelusalemu. Nawamkopola kwa kumuwamba, 40 ila Nguluwi nakamzilipula kulawa kwa wabagame zuwa lya kadatu, nakamdita yoneche, 41 haiwele kwa wanhu weng'ha, ila kwa wala wawele Nguluwi nakawahagula wawe walolezi wa heye, kwa vila hetwe natulya na kunwa hamwe na heye hala loyazilipuche. 42 Nakatulajiza tudamle Mbuli Inojile kwa wanhu weng'ha na kulavya ulolezi kota heye ndo yabakalizwe mafuta na Nguluwi yawe mtagusa wa wakomu na wabagame. 43 Waloli weng'ha, nawalonga kuwala heye kota chila munhu kokusilwa gehile ga heye geng'ha kwa itagwa lya heye."

44 Mhela Petili loyawele yolonga ulonzi awo, Muhe Yelile nakawadulichila weng'ha wawele nawali wohulichiza usenga awo. 45 Wala Wayahudi wamkundile Kilistu wawele nawoya hamwe na Petili kulawa Yopa nawabubuwala kwa kona kota Nguluwi nakawajidila Muhe Yelile wanhu wa isi zinji, 46 kwa vila nawawahulika wolonga kwa ndonga zilivinji womtogola Nguluwi. Aho Petili nakalonga, 47 "Wanhu awa nawambochela Muhe Yelile kota hetwe vyotumbochele. Ndaze, hana yoneche yawele yoweza kudita waleche kubatizigwa kwa mazi?" 48 Lelo, nakalajiza wabatizigwe kwa itagwa lya Yesu Kilistu. Hamba nawamlanda Petili yekale hamwe na hewo kwa mazuwa mado.