1 Watumigwa na wanhu wamkundile Kilistu wawele Yudeya nawahulika kota wanhu isi zinji nawo nawaubochela ulonzi wa Nguluwi. 2 Lelo, Petili loyahiluche Yelusalemu, wala Wayahudi wakundile wawele nawagana wanhu wanji wenjile ikumbi, nawamng'ung'utila wolonga, 3 "Hegwe nakuluta kikala na wanhu wawele hawenjile ikumbi na kulya hamwe na hewo!" 4 Aho Petili nakawalonjela ne kuvisa kuwala mbuli zeng'ha zilawile ako kulawila mwaluko.

5 "Zuwa limwe londiwele ndimlanda Nguluwi ako kuli muji wa Yopa, nambona uloli, nambona chinhu kota igolole likulu lyanguduliswa kulawa kilanga liwele libatigwe kuli mhembo zeng'ha zine, naliwichigwa hafungo ha heni. 6 Nasunjilila mgati mwa lila igolole nambona migongolo jiwele na magulu gane, migongolo ja kisolo na vilumbigwe vilingutambala na videje vya kilanga. 7 Hamba nanyhulika lizi lindonjela, ‘Petili winuche, udumule singo, ulye.’ 8 Ila heni nandonga, ‘Hebu Mkulu, kwa vila choneche chiwele nachikokomoka na mzilo kwa heni hachijezile kwinjila kuli mlomo wa heni.’ 9 Lila lizi nalilonga kulawa kilanga lwa keli, ‘Uleche kuchichema chikokomoche chinhu choneche chiwele Nguluwi nakacheliza.’ 10 Mbuli ayo naikoleka mala zidatu, hamba vyeng'ha navihiluswa kilanga. 11 Baho du, wanhu wadatu nawalajizwa kwa heni kulawa Kaisaliya, nawafika kuli ng'handa yondiwele ndikala. 12 Muhe naundonjela ndute hamwe na hewo ndeche kijesa. Awa wang'holozangu sita natulutasa hamwe Kaisaliya na ako natwinjila kuli ng'handa ya Kolineli. 13 Heye nakatulonjela vyoyamuwene mhilisi yemile mng'handa ya heye na kumlonjela, ‘Mlajize munhu Yopa yakamcheme munhu yumwe yalinguchemigwa Simoni, kwa itagwa linji Petili. 14 Heye kokulonjela ulonzi uwele hegwe na wang'holozo weng'ha wowadita mloholigwe.’ 15 Lonyhaluche kulonga, Muhe Yelile nakadulika kwa hewo kota vyoyatudulichile hetwe hala mwaluko. 16 Aho nang'humbuchila wula ulonzi uwele Mkulu woyalonjile, ‘Yohani nakabatiza kwa mazi, ila hemwe mobatizigwa kwa Muhe Yelile.’ 17 Lelo, wone Nguluwi nakawapa utambichizo wuwula wanhu wa isi nzinji kota woyatupele hetwe hala lotumkundile Mkulu Yesu Kilistu, ndaze, heni nda whaani mbaka ndimbeze Nguluwi?" 18 Lowahuliche ago, nawaleka kitwanza, nawamtogola Nguluwi wolonga, "Nguluwi nakawapa wanhu wa isi zinji mhumu ya kumgalamchila Nguluwi leka wapegwe ukomu."

19 Lelo wala wasambaluche kwa chiwalo cha magazo galawile na kubagama kwa Stefani, nawaluka majendo mbaka Foinike na Kupulo na Antiokiya. Nawo nawadamla wula usenga wa Nguluwi kwa Wayahudi hela. 20 Ila wamwe wa hewo nawali wanhu wa Kupulo na Kulene, lowalutile Antiokiya nawaudamla awo usenga kwa wanhu wa isi zinji wowadamlila Mbuli Inojile ya Mkulu Yesu. 21 Mkulu nakawatanza na wanhu wenji nawakunda na kumgalamchila Mkulu. 22 Mbuli ayo naihulikwa na chilundo cha wanhu walingumkunda Kilistu ako Yelusalemu. Ahyo nawamlajiza Balinaba yalute Antiokiya. 23 Loyafichile ako nakona vila Nguluwi vyoyawonele isungu wala wanhu, nakasangalala na kuwalonjela weng'ha wekale kwa kitumbila kwa Mkulu. 24 Balinaba nayali munhu yawele yanojile na yamemile Muhe Yelile na yawele na makundo. Chilundo chikulu cha wanhu nachikwejigwa kwa Mkulu. 25 Hamba, Balinaba nakaluta Taliso kumpala Saulo. 26 Loyamuwene, nakamigala Antiokiya. Nawo weng'ha weli nawekala na chila chilundo cha wanhu walingumkunda Kilistu kwa mhela wa mwaka umwe kuno wolangusa chilundo chikulu cha wanhu. Ako Antiokiya, ndo kwa mwaluko walanguswa nawachemigwa Wakilistu.

27 Mhela wuwo waloli nawoya Antiokiya kulawa Yelusalemu. 28 Lelo, yumwe wa hewo yalinguchemigwa Agabo nakema, kwa ludali lwa Muhe Yelile nakalavya uloli kota kowa na lufemba kuli isi yeng'ha. Lufemba alo nalulawila mhela wa ulongozi wa Kilaudiyo. 29 Wala walanguswa nawamula chila munhu yegale choyawelenacho leka kuwatanza wala wanhu walingikala ako Yudeya. 30 Lelo, nawadita ahyo na kumha Balinaba na Saulo vyeng'ha viwele navikungajizwa leka wavigale hewo wawo kwa vilongozi wa wanhu walingumkunda Kilistu.