1 Zuwa limwe, saa tisa nemisi, Petili na Yohani nawali woluta kuli ng'handa ya Nguluwi kumlanda Nguluwi. 2 Lelo nakwali na munhu yawele chete kulawila kupondigwa kwa heye. Chila zuwa nawali womuwika kuli lwizi lwa ng'handa ya Nguluwi lulinguchemigwa Suli leka yalande kwa wanhu walingwinjila kuli ng'handa ya Nguluwi. 3 Loyawawene Petili na Yohani wokwinjila kuli ng'handa ya Nguluwi, nakawalanda wamhe choneche. 4 Petili na Yohani nawamnogolela meho, naye Petili nakamlonjela, "Utulole!" 5 Naye nakawagalamchila kuno yochitumbila hanji kopegwa chinhu. 6 Aho Petili nakamlonjela, "Ndahela sendi ne zahabu, ila chila chondilinacho ndokupa. Kwa itagwa lya Yesu Kilistu wa Nasaleti, wime na ujende!" 7 Hamba nakamibata moko wa kudilo, nakamwinula. Baho du magulu na mafugamilo ga heye nagawa na mong'ho. 8 Nakanyozoka, nakema na kwaluka kujenda. Hamba nakenjila hamwe na hewo kuli ng'handa ya Nguluwi, yojenda na kunyozoka nyozoka kuno yomtogola Nguluwi. 9 Wanhu weng'ha wawele aho nawamona yojenda na kumtogola Nguluwi. 10 Lowavizelele kota ndo yula yaliyolanda hali lwizi Ng'handa ya Nguluwi lulinguchemigwa Suli, nawabubuwala lukami na kulemwela kuvizela gamlawile.

11 Wanhu weng'ha kuno wawele wabubuwale ng'hatu, nawaluka kubilima woluta honhu halinguchemigwa "Lugagala lwa Solomoni," hawele yula munhu nayali welongoze na Petili na Yohani. 12 Lelo, Petili loyawawene wanhu awo nakawalonjela, "Hemwe Waisilaeli, lekachoni mwangububuwala kuwala mbuli ayi? Lekachoni mwangutunogolela meho kota ndo kwa ludali lwa hetwe ama welile wa hetwe ndo natumdita munhu ayu yajende?" 13 Nguluwi wa Abulahamu na Isaka na Yakubu, Nguluwi wa wasekulu wa hetwe ndo yamtogole chitumagwa wa heye Yesu. Heye ndo yuyula yomumlavile leka yatagusigwe kubagama na kumlema hali Pilato, hanga heye Pilato nayali yamule kumlechela yalute. 14 Nayali yelile na yanojile, ila hemwe namumlema, namgana munhu yunji yawele yalingukopola yalechelwe yalute. 15 Lelo, namumkopola yula yawele mwaluko wa ukomu. Ila Nguluwi nakamzilipula, natwe twa walolezi wa mbuli ayo. 16 Kwa makundo kuli itagwa lya Yesu ndo vimpele mong'ho munhu ayu mlingumona na kumzela. Kwa itagwa lya Yesu na makundo ndo gamlohole munhu ayu kota hemwe weng'ha vyomlingumona.

17 "Lelo, wang'holozangu, ndanguvizela kota namdita ne kuvizela kota vyowaditile vilongozi wa hemwe. 18 Ila kwa nzila ayi Nguluwi nakeneza chila chiwele nachali yalavile uloli kwa milomo ja waloli wa heye weng'ha kota Kilistu kogazika. 19 Lelo, mleche gehile ga hemwe na mumgalamchile Nguluwi leka yawosele gehile ga hemwe. 20 Mdite ahyo leka Mkulu Nguluwi yawape mhela wa kwesela na kuwegalila yula Kilistu yamhagule yawele ndo Yesu. 21 Yangumlapa yawe kilanga mbaka houfika mhela wa kuwichigwa goya vinhu vyeng'ha, kota Nguluwi vyoyalonjile kwa kukolela waloli wa heye welile. 22 Kwa vila Musa nakalonga, ‘Mkulu Nguluwi, Nguluwi wa hemwe kowagalilani mloli kota heni kulawa hali hemwe. Yanguwagana kumhulichiza ayo kwa chila mbuli hoyowalonjela. 23 Yoneche yawele homhulichiza mloli ayo kobaguligwa na wanhu wa Nguluwi na kudumigwa.’ 24 Waloli weng'ha, kwaluchila Samweli na wala wamuwinzile, nawadamla mbuli azi ziwele zangukoleka kuli mazuwa aga. 25 Malagano gala gawele Nguluwi nakagalavya kwa kukolela waloli ndo kwa chiwalo cha hemwe na mwangihanza kuli ilagano liwele Nguluwi nakalidita na wasekulu wa hemwe, kota vyoyamlonjele Abulahamu, ‘Kwa kukolela walelwa wa hegwe, wanhu weng'ha wa kuli isi wotambichizwa.’ 26 Lelo, Nguluwi nakamzilipula chitumagwa wa heye kwa mzidi wa hemwe tandi, nakamlajiza yawagalile utambichizo kwa kumdita chila yumwe wa hemwe yaleche wihe wa heye."