1 Mhela wuwo, mndewa Helodi nakaluka kuwagaza wanhu wamwe walingumkunda Kilistu. 2 Nakamkopola Yakubu mng'holoze Yohani kwa ipanga. 3 Loyawene kota mbuli ayo naiwanojeza Wayahudi, nakalutilila, nakamibata Petili. Mbuli ayo naikoleka mhela wa mvina ya mibumunda johajiwichigwe usaso. 4 Loyabatigwe, Petili nakawichigwa mchinweng'ho, nakawichigwa hali ulolezi wa vilundo vine vya wamizi, viwele na wamizi wane kuli chila chilundo. Helodi nakanuwila kumlavya hali wanhu loimala mvina ya Pasaka. 5 Lelo, Petili loyawele mchinweng'ho, chilundo cha wanhu walingumkunda Kilistu nachali chilanda ng'hatu kwa Nguluwi kwa chiwalo cha heye.

6 Nechilo, kung'hali zuwa liwele Helodi nayali yanuwile kumlavya na kumlonjeleza, Petili nayali yawasile hagati ha wamizi weli, yawele yawohigwe kwa minyololo mili. Nawo wamizi nawali wokwamila kuli lwizi lwa chinweng'ho. 7 Baho du, mhilisi wa Mkulu nakema habehi na lumuli nalulangaza kuli chila chihengo cha chinweng'ho. Mhilisi nakamdoliza Petili mlubavu na kumdita yalilimche, nakamlonjela, "Uche himahima!" Baho du jila minyololo joyawohigwe mmoko najidumka na kulagala hanyi. 8 Mhilisi nakamlonjela, "Wiwohe isali lyako, uvale makwamba gako." Nakadita hihyo. Hamba mhilisi ayo nakamlonjela, "Uvale ikoti lyako, umbinze." 9 Petili nakamuwinza kunze ila nahavizelele kota ago gaditigwe na ayo mhilisi nagali ga kukomya, nakejesa kota nayali yolota. 10 Nawakola honhu ha mwaluko ha wamizi na ha keli, hamba nawafika kuli lwizi lwa chuma lwa kwinjila kuli muji. Alo lwizi nawichumula uliyeka, nawo walawa kunze. Nawali wojenda kuli nzila imwe na baho du yula mhilisi nakamleka Petili yaliyeka.

11 Aho ndo Petili nakavizela galawile, nakalonga, "Ndikomya, lelo ndanguvizela kota Mkulu nakamlajiza mhilisi wa heye nakandohola kuli moko ga Helode na kulawa kuli mbuli zila zeng'ha ziwele wanhu wa Isilaeli nawazibeteza."

12 Loyavizelele mbuli ayo, nakaluta mbaka haluga ha Maliya mayake Yohani yalinguchemigwa Malichi. Amo nakwali na wanhu wenji wawele wekungajize womlanda Nguluwi. 13 Petili nakahodiza kuli lwizi lwa kunze na chitumagwa yumwe mhinza yalinguchemigwa Loda, nakaluta kuli lwizi. 14 Loyavizele kota nalyali lizi lya Petili, nakasangalala ng'hatu, nakahiluka ne kuchumula lwizi na kuwalonjela kota Petili ka kuli lwizi. 15 Nawamlonjela yula mhinza, "Kuna lukwale!" Ila heye nakemilila kota nakakomya. Nawo nawamlonjela, "Ayo ndo mhilisi wa heye." 16 Mhela awo Petili nayali yolutilila kuhodiza. Hamba nawachumula lwizi, nawamona Petili, nawabubuwala. 17 Petili nakawagololela moko wanyamalile, nakawasimila vila Mkulu vyoyamlavile mchinweng'ho. Hamba nakawalonjela wamlonjele Yakubu mbuli ayo na wala wanhu wanji, hamba nakoka nakaluta honhu hanji.

18 Lokubwemwenzuche, nakwali na lunhwinhwi ng'hatu hali wala wamizi kuwala gala gamfichile Petili. 19 Helode nakalajiza wampale ila hawamuwene. Lelo nakalajiza wala wamizi wauzigwe, nakalavya mzilo wakopoligwe. Hamba Petili nakalawa ako Yudeya nakaluta Kaisaliya kuwele nakekala.

20 Helodi nakezudizwa ng'hatu na wanhu wa Tilo na Sidoni. Ila hewo nawawahilika wasenga kwa heye. Nawo nawampata Bilasto yawe ubanzi wa hewo. Bilasto nayali chilongozi wa walingwamila ng'handa ya mndewa. Hamba, nawaluta kwa Helodi kumlanda kuwe na kikala goya, kwa vila isi ya hewo naitumbila isi ya mndewa ayo kwa chilyo.

21 Zuwa limwe lihaguligwe, Helodi yawele yavalile ivalo lya chiundewa nayali yekalise kuli chigoda cha undewa, nakadamla kwa wanhu. 22 Wala wanhu wawele wekungajize nawatowa iyowe lya kusangalala wolonga, "Ali lizi ndo lya mlungu, haliwele lya munhu." 23 Baho du mhilisi wa Mkulu nakamgwisa Helodi kwa vila nahamtogole Nguluwi. Minhu najimulya, nakabagama. 24 Ulonzi wa Nguluwi nalulutilila kwenela.

25 Balinaba na Sauli lowasindile jila mijito ja hewo jiwele najiwahilika, nawahiluka kahi Yelusalemu kuno wawele hamwe na Yohani yalinguchemigwa Malichi.