1 Mhela Apolo loyawele Kolinto, Paoli nakenula majendo kuluta Efeso kwa kukolela kuli isi ya vidunda. Ako nakawafika walanguswa wamwenga. 2 Nakawauza, "Ndaze, lomkundile namumbochela Muhe Yelile?" Nawamwidichila, "Hebu! Hatuhuliche kota hana Muhe Yelile." 3 Paoli nakawauza, "Nambatizigwa ndaze?" Nawamwidichila, "Kwa ubatizo wa Yohani." 4 Paoli nakalonga, "Ubatizo wa Yohani nawali wa kulajila kota wanhu nawamgalamchila Nguluwi. Yohani nakawalonjela wanhu wamkunde yula yalinguya honhu ha heye, yawele ndo Yesu." 5 Lowahuliche ago, nawabatizigwa kwa itagwa lya Mkulu Yesu. 6 Lelo, Paoli kawawichila moko kuli vitwi vya hewo na Muhe Yelile nakawadulichila, nawaluka kulonga kwa ndonga za chijenzi na kulavya uloli. 7 Awo weng'ha nawali kota walume kumi na weli.

8 Kwa mhela wa myezi jidatu, Paoli nayali yoluta kuli sunagogi ne kudumba, nayali yolongasa na wanhu na kujeza kuwadita wawe kuli ubanzi wa heye kuli mbuli za Undewa wa Nguluwi. 9 Ila wamwe wa hewo nawali wajuvi, nawalema kukunda, nawaluka kulonga vibi kuwala ayo nzila ya Mkulu hali nhing'hano ya wanhu. Aho Paoli nakaleka kulongasa na hewo, nakawahola wala walanguswa wa heye, nayali yolongasa na hewo chila zuwa kuli ng'handa ya kulangusila ya Tulano. 10 Nakalutilila kudita ahyo kwa mhela wa miyaka mili mbaka Wayahudi na Wagilichi wawele nawali wochikala ako Asiya nawahulika ulonzi wa Mkulu.

11 Nguluwi nakadita vinduzanduza vya kububuwaza kwa moko ga Paoli. 12 Wanhu nawali wohola vibende na mivalo jinji jiwele najidoliza lukuli lwa Paoli, nawajigala kwa watamwa, nawo nawoselwa matamwa ga hewo na wala wawele na vijeni, vijeni avyo naviwalawa. 13 Lelo, wamwe wa Wayahudi nawali wojenda aku na ako wowinga vijeni kwa wanhu. Wayahudi awa nawajeza kutumiya itagwa lya Mkulu kuvilavya vijeni kwa wanhu. Weng'ha nawali wolonga, "Ndanguwalonjela muche kwa itagwa lya Mkulu Yesu yawele Paoli kangumdamla." 14 Wana saba wa Sikewa, mtambika mkulu wa Wayahudi, nawali hali awo wawele wodita ahyo. 15 Ila chijeni nachiwedichilla, "Yesu ndangumzela kahi Paoli ndangumzela, ila hemwe mwa whaani?" 16 Hamba yula munhu yawele na chijeni nakawanyozochela, nakawatowa ng'hatu, nakawasumya weng'ha. Nawalawa wobilima kulawa mgati mwa yila ng'handa kuno wawele mwanzi na walumile. 17 Mbuli ayi naizeleka kwa Wayahudi na Wagilichi weng'ha walingikala Efeso. Weng'ha nawali na lunhwinhwi, nawalitogola itagwa lya Mkulu Yesu. 18 Wenji wa wala wawele nawali nawakunda kuli mhela awu nawoya na kulonga gehile ga hewo hazelu kuwala madito ga hewo gehile. 19 Wanji wawele nawadita mbuli za uhawi aho mwaluko nawakungajiza vitabu vya hewo, nawavilakaza hazelu. Lowawazile hisabu ya sendi ziwele nazitumika kugula vitabu avyo viwele navilakazwa nayali vihande elufu makumi gahano ga sendi (50,000). 20 Ahyo ulonzi wa Mkulu nawenela ng'hatu na kuwa na mong'ho.

21 Lozilawile mbuli azo, Paoli nakamula kuluta Yelusalemu kwa kukolela Makedoniya na Akaya. Nakalonga, "Londifika ako, ndanguganigwa kuluta Loma." 22 Ahyo nakawalajiza vitumagwa wa heye weli, wawele ndo Timoteyi na Elasito, walongole kuluta Makedoniya, naye nakasigala Asiya kwa mazuwa mado.

23 Mhela awo nakulawila ivuche likulu ako Efeso kwa chiwalo cha nzila ya Mkulu. 24 Nakwali na munhu yumwe yalingugongomanya sendi yalinguchemigwa Demetiliyo, yawele na mijito ya kugongomanya jimalukolo ja sendi ja ng'handa ya mlungu wa chidala yalinguchemigwa Alitemi. Mijito ajo najiwadita walingugongomanya wa heye wapate chinhu cha mzidi chikulu. 25 Demetiliyo nakawakungajiza wakola mijito awo hamwe na wanji wawele na mijito kota ajo, nakawalonjela, "Hemwe wanhu, mwanguvizela kota lufufu lwetu lwangulawa kuli mijito aji. 26 Lelo namuhulika na kona mwemwe mbuli ziwele Paoli kanguzidita, haiwele hano Efeso hela, ila kuli Asiya yeng'ha. Heye kanguwagalamula wanhu wenji na kuwadita waleche kukunda kota milungu jiwele najigongomanywa na wanhu hajiwele milungu ne hado. 27 Ahyo haiwele kota mijito ja hetwe jobezigwa hela ila mbaka ng'handa ya mlungu wa Alitemi, yawele mkulu, yalingufugamilwa kuli Asiya yeng'ha yowahela lutogo lwa mlungu."

28 Lowahuliche ulonzi awo, nawazudila, nawaluka kutowa iyowe, "Mkulu ndo Alitemi wa Efeso!" 29 Muji weng'ha naumema ivuche. Nawamibata Gayo na Alisitako, wenyeng'haye wa Makedoniya wawele nawali wojenda hamwe na Paoli, lowewabatile nawabilima mbaka kuli lugagala lwa kuvinila. 30 Paoli nakagana kwinjila hagati ha lula lung'hongola, ila walanguswa nawamlemeza. 31 Vilongozi wanji wa mkowa awo wa Asiya, wawele ndo goloko wa heye, nawalajiza usenga kwa Paoli kumdedeza yaleche kwinjila kuli lugagala alo. 32 Mhela awo chila munhu nayali yolonga chila yachizelele, wamwe nawalonga ali na wanji nawalonga lila, mbaka yila nhing'hano naitizika. Wenji nahawavizelele choni chiwele nachambuza kuting'hana kwa hewo. 33 Wayahudi nawamkundujiza Alekizanda kumwando, wanhu wamwe kuli yila nhing'hano nawejesa kota ndo heye. Alekizanda nakawagololela moko wala wanhu yowagana wasindamale leka yelewele hali lula lung'hongola lwa wanhu. 34 Ila lowavizele kota nayali Myahudi, weng'ha nawatowa iyowe kwa lizi limwe kwa mhela wa masaa meli wolonga, "Mkulu ndo Alitemi wa Efeso!" 35 Hamba yalingwandika wa muji nakawadita wanyamalile, nakawalonjela, "Hemwe wanhu wa Efeso, ndaze, isi yeng'ha haivizelele kota muji wa Efeso ndo ulinguilolela ng'handa ya mlungu Alitemi yawele ndo mkulu na kulilolela lila limalukolo liwele naligwa kulawa kilanga? 36 Haduhu yalinguweza kulema mbuli azo. Ahyo, msindamale, mleche kudita chinhu choneche himahima. 37 Namuwegala wanhu awa aha hanga hawahizile kuli ng'handa ya mlungu ne kumliga mlungu wa hetwe wa chidala. 38 Lelo, wone Demetiliyo na wakola mijito wa heye wana ulonjelezi kuwala wanhu awa, hana vitala vya wakulu wa mikowa, wanguweza kuwalonjeleza ako. 39 Ila wone hana mbuli yinji muigale kuli nhing'hano ilinguzeleka iwele naitanganika. 40 Kota vyotuwele sambi twa habehi kulonjelezwa kwa kudita ivuche kwa chiwalo cha mbuli iwele naikoleka lehano. Kwa vila twahela chiwalo cha kulonga ne kulajila kota ndo mwaluko wa ivuche ali." 41 Loyasindile kulonga ago, nakabena nhing'hano.