1 Lowamule kota twaluche majendo mbaka Italiya, nawamuwika Paoli hamwe na wanweng'ha wanji hali wamizi wa Yulio yawele nayali chilongozi wa chilundo chilinguchemigwa "Chilundo cha wamizi wa Kaizali Agusto." 2 Natukwina meli iwele nailawa Adilamito iwele goya kuluta kuli bandali za mkowa wa Asiya, natwaluka majendo. Alistako mwenyeng'haye wa Makedoniya, kulawa Tesalonike kulawila Tesalonike, nayali hamwe na hetwe. 3 Mitondo yake natufika kuli bandali ya Sidoni. Yulio nakamditila Paoli ganojile kwa kumkundiza yawone goloko wa heye leka yapegwe vinhu kwa chiwalo cha heye. 4 Kulawa ako natulutilila na majendo, ila kwa vila mbeho nayali iputa lukami ikuya kumwando kwa hetwe, natukola nzingo ya chihilwa cha Kupilo kuwele mbeho nayali nyindo. 5 Hamba natuloka bahali ya Kilikiya na Pamfiliya, natufika Mula, muji wa Lukiya. 6 Ayo yula mkulu wa wamizi nakaifika meli imwe ya Alekizandiliya ilinguluta Italiya, nakatukwiniza amo.

7 Natujenda mholemhole kwa mhela wa mazuwa menji, kwa kugaya natufika habehi na Nido. Kwa vila mbeho nayali ing'hali iputa, natulutilila kumwando natukolela ubanzi wa Kilete habehi na Salimoni kuwele mbeho hayali nyinji. 8 Natukola mfungo mholemhole natufika honhu halinguchemigwa Bandali Inojile, habehi na muji wa Laseya.

9 Mhela winji nawali ukolile, mbaka zuwa lya kwesela kulya nalyali likolile. Lelo haiwele goya kulutilila na majendo kwa meli. Lelo Paoli nakawakanya, 10 "Wang'hangala, ndangijesa kota majendo aga gowa na magazo na kwajiliza vinhu lukami haiwele kwa vinhu viwele kuli meli yeka mbaka kwa ukomu wa hetwe." 11 Ila yula mng'hangala nakagahulichiza ng'hatu na goyalonjile yalingwendesa meli kusinda gala goyalonjile Paoli. 12 Kwa vila bandali ayo haiwele honhu hanojile ha kikala mhela wa chipute, wenji nawagana kulutilila na majendo mbaka Foinike. Foinike ndo bandali ya Kilete iwele kusini mbaka kolizinjilaga na kasikazini mbaka kolizinjilaga isanya, ako wahawezile kikala kuli mhela wa chipute.

13 Lelo nailawila mbeho inojile ya kusi nayaluka kuputa, nawo nawejesa kota gowalingujesa nagali goya, ahyo nawaluka majendo, nawendesa meli habehi ng'hatu na mhwani ya Kilete. 14 Ila haupulute mhela winji, mbeho ng'hulu ya kasikazini nayaluka kuputa kulawila kuli chihilwa. 15 Mbeho naitowa kuli yila meli na kwa vila natulemwa kitwanza na yila mbeho, ahyo naituhilula kuli bahali kuwele mbeho nayali iluta. 16 Chihilwa chimwe chilinguchemigwa Kauda nachitudinya hado na ayo mbeho, lotukolile kusini mwa chihilwa acho natusinda hanga kwa kugaya kuidita meli yime. 17 Walingudaha kojelela nawalikwega itumbwi mbaka mgati mwa meli hamba nawaliwoha ng'hatu kwa ng'weso. Nawadumba kota wahahilichigwe kuli misanga habehi na mhwani ya Siliti. Ahyo nawadulisa matanga na kuileka meli ihilichigwe na mbeho. 18 Mbeho nailutilila kuputa na mitondo yake nawaluka kutoza kuli mazi mhomholo kulawa kuli meli. 19 Zuwa lya kadatu, nawaluka kutoza kuli mazi vinhu vimwe vya kuli meli kwa moko ga hewo wawo. 20 Kwa mhela wa mazuwa menji hatuwezile kona isanya ne nhondwe, mbeho nailutilila kuputa ng'hatu, mbaka kitumbila kota tolohoka nakutumala.

21 Lotikale kwa mazuwa menji ne kulya chilyo, Paoli nakema hali hewo, nakalonga, "Wang'holozangu, yahawele goya wone namnyhulichize na kuleka kwinula majendo kulawa Kilete. Wone namdite ahyo hatwalifichigwa na magazo aga na kwajiliza vinhu avi vyeng'ha. 22 Ila sambi ndangukulanda kota mikangaze nhumbula, haduhu ne yumwe wa hemwe yawele kokwajiliza ukomu wa heye, meli yeka ndo yodumigwa. 23 Kwa vila zuwa likolile nayali nechilo, mhilisi wa Nguluwi yawele heni ndo wa heye na yawele ndangumfugamila nakandawila, 24 nakandonjela, ‘Paoli, uleche kudumba kwa vila yangukugana wime hali Kaizali mndewa mkulu wa Loma, naye Nguluwi kwa isungu lyake nakakupa uganililo wa ukomu na weng'ha wawele kuli majendo hamwe na hegwe.’ 25 Ahyo wang'holozangu, mikangaze nhumbula! Kwa vila ndangumkunda Nguluwi kota yowa hihila kota vyondonjelwe. 26 Ila yotugana kutajigwa hafungo ha chihilwa chimwenga."

27 Nechilo ya zuwa lya kumi na nne, natwali tuhilikwa aku na hako kuli bahali ya Mediteleniyani. Behi na nechilo ng'hatu, walingudaha kojelela nawejesa kota wahabehi na isi ng'havu. 28 Aho nawapima winji wa mazi kulutila hasi kwa kudulisa ng'weso iwele naiwohigwa chinhu chiwele na itunyo likulu, nawapata mita makumi gane. Hamba nawalutilila kumwando hado nawapima kahi nawapata mita makumi gadatu. 29 Kwa kudumba kunhanhahila kuli mitalawe, nawadulisa vinhu vine vya kwimiza meli kumbele mwa meli, nawalanda kubwemwenzuche himahima. 30 Walingudaha kojelela nawagana wache chinyele, kwa vila nawalidulisa itumbwi kuli mazi, nawedita kota wanguluta kudulisa vinhu vya kwimiza meli viwele kumwando kwa meli. 31 Ila Paoli nakamlonjela yula chilongozi mkulu wa wamizi na wamizi wa heye, "Wone awa walingudaha kojelela hawosigala kuli meli, hamlohoka." 32 Aho wala wamizi nawazitema zila ng'weso zibatilile lila itumbwi, walileka liholigwe na mazi.

33 Habehi na kubwemwenzuka, Paoli nakawadedeza weng'ha walye chilyo, "Kwa mazuwa kumi na gane namwali kuli kudumba ne kulya, hamdile chinhu choneche. 34 Lelo, ndanguwadedeza mulye chilyo leka mlutilile kikala. Kwa vila ne mnvili yimwe kuli vitwi vya hemwe haikwajilila." 35 Loyalonjile ago, Paoli kahola ibumunda, nakalonga malumbo kwa Nguluwi hali hewo weng'ha, nakalibena, nakaluka kulya. 36 Aho weng'ha nawekangaza nhumbula, nawo nawalya. 37 Tweng'ha natwali wanhu miya mbili makumi saba na sita kuli meli. 38 Chila munhu loyadile chilyo cha kuhega, nawapunguza itunyo lya meli kwa kutaga nyhule kuli bahali.

39 Lokubwemwenzuche, walingudaha kojelela nawalemwa kuizela yila isi, ila nawachona chihilwa chiwele na misanga, walamula kwimiza meli ako wone yahawele goya. 40 Ahyo nawadumula nanga na kuzileka mbahali, mhela wuwo nawadohola ng'weso ziwele naziwohigwa kuli chilongoza meli, hamba nawawoha igolole kumwando kwa meli leka libate mbeho, nawaluta kuli chihilwa. 41 Ila nawafika honhu hawele bahali mbili naziting'hana, meli inanahila. Honhu ha kumwando ha meli nayinjila mmisanga ne kutigasika. Honhu ha kumbele kwa meli nakwaluka kubeneka vihande vihande kwa kutowigwa na nhigu ziwele na mong'ho.

42 Wamizi nawagana kuwakopola wanweng'ha weng'ha kwa kudumba kota wahahojelele mbaka mwhani na kusulupuka. 43 Ila kwa vila yula mkulu wa wamizi nakagana kumlohola Paoli, nakawalemeza waleche kudita ahyo. Nakawalonjela wala wadahile kojelela wanyozoche kulawa kuli meli na kojelela mbaka mhwani, 44 na wanji wawinze kwa kibatilila kuli mbawo ama kuli vihande vya meli ibeneche. Ahyo ndo tweng'ha vyotufichile wakomu kuli mhwani.