1 Wanhu wanji nawafika Antiokiya kulawa Yudeya, nawaluka kuwalangusa wala wanhu wa hala wolonga, "Wone hamwinjile ikumbi kota chihendo choyalanguse Musa, hamloholigwa." 2 Mbuli ayi nayambuza kitwanza ng'hatu, hamba Paoli na Balinaba hamwe na wanhu wanji wa chila chilundo cha wanhu walingumkunda Kilistu hala Antiokiya nawahaguligwa leka walute Yelusalemu kulongasa mbuli ayi na watumigwa na wasekulu.

3 Lelo, chilundo cha wanhu walingukunda Kilistu nachiwalaga, nawo lowawele wokola Foinike na Samaliya nawawalonjela wanhu vila wanhu wa isi zinji vyowamgalamchile Nguluwi. Mbuli azo naziwasangalaza ng'hatu wanhu weng'ha. 4 Lowafichile Yelusalemu nawabocheligwa na chilundo cha wanhu walingumkunda Kilistu na watumigwa na wasekulu, Aho ndo Paoli na Balinaba nawawalonjela kuwala geng'ha Nguluwi goyaditile hamwe na hewo. 5 Ila wanhu wamwe wa chilundo cha Mafalisayo nawema na kulonga, "Naiwagana awo wanhu wa isi zinji wenjizwe ikumbi na kulanguswa kukunda malajizo ga Musa."

6 Lelo watumigwa na wasekulu nawadita nhing'hano leka walongase goya kuwala mbuli ayo. 7 Lowalongase lukami, Petili nakema na kulonga, "Wang'holozangu, mwanguvizela kota aho mwaluko Nguluwi nakanyhagula hali hemwe leka ndamle Mbuli Inojile kwa wanhu wa isi zinji leka wahuliche na kukunda. 8 Naye Nguluwi yalinguzizela nhumbula za wanhu, nakatawiza kota nakawakunda kwa kuwapa Muhe Yelile kota vyoyatupele hetwe. 9 Nguluwi halajile uganililo woneche hali hetwe na hewo, ila nakeliza nhumbula za hewo kwa makundo. 10 Lekachoni mwangumjeza Nguluwi kwa kuwadwika awo walanguswa mhomholo iwele hetwe na wasekulu wa hetwe natulemwela kuipika? 11 Ileche kuwa ahyo, ila twangukunda kota twanguloholigwa kwa isungu lya Mkulu Yesu kota hewo vyowaloholigwe."

12 Wanhu weng'ha wawele naweting'hana aho nawenyamalila, nawawahulichiza Paoli na Balinaba vyowawele wolonga kuwala ulajilo na vinduzanduza viwele Nguluwi nakavidita kwa kukolela moko gawo kwa wanhu wa isi zinji. 13 Lowasindile kulonga, Yakubu nakalonga, "Wang'holozangu mhulichize! 14 Simoni nakatulonjela vila Nguluwi vyoyawahagule wanhu wa isi zinji kwa chiwalo cha itagwa lya heye. 15 Mbuli ayi naiwhana ng'hatu na ulonzi wa waloli, kota Maandiko Matakatifu vyogalingulonga,

16 " ‘Lozimala mbuli azi ndohiluka,

na kuyimiza ng'handa ya Daudi igwile,

ndogagongomanya kahi mahame gake na kuzenga kahi.

17 Ahyo wanhu wasigale weng'ha,

wanhu wa isi zeng'ha wawele nandiwachema wawe wa heni,

wompala Mkulu.

18 Ahyo ndo vyoyalingulonga Mkulu,

yaditile mbuli ayi chizeleche kulawila katali.’ "

19 Yakubu nakalutilila kulonga, "Ahyo, kwamula kwa heni ndo aku, tuleche kuwagaza wanhu wa isi zinji wawele wangumgalamchila Nguluwi. 20 Ila tuwahilichile baluwa kuwalonjela kota waleche kulya vilyo vikokomoche viwele navitambichilwa jimalukolo ja milungu na waleche ung'hondwa na waleche kulya igongolo liwele halidumuligwe singo na waleche kunwa danda. 21 Kwa vila kwa Mhela winji ulonzi wa Musa wangudamligwa kuli chila muji na kusomigwa kuli masunagogi geng'ha kuli chila Zuwa lya Kwesela."

22 Watumigwa na wasekulu hamwe na chilundo cha wanhu chilingumkunda Kilistu, nawawahagula wanhu hali hewo na kuwalajiza Antiokiya. Lelo nawawahagula Sila na Yuda yalinguchemigwa Balisaba, wanhu awa nawali vilongozi hali hewo leka walutase na Paoli na Balinaba. 23 Nawawapa baluwa yandichigwe hino, "Hetwe watumigwa na wasekulu na wang'holozenu, twanguwalamsa hemwe wanhu wa isi zinji muwele ako Antiokiya na Siliya na Kilikiya. 24 Natuhulika kota hana wanhu wamwe nawoya kwa hemwe kulawa kwa hetwe, nawawatunya kwa ulonzi wa hewo na kuwadita muwe na lunhwinhwi mnhumbula. Ila nawadita ahyo ne kukundizwa na munhu yoneche hali hetwe. 25 Ahyo natwamula hamwe kuwahagula wanhu wamwe na kuwalajiza kwa hemwe, wochilongoza na wala wotuwaganile wawele ndo Balinaba na Paoli, 26 wala wawele nawauwika ukomu wa hewo mmoko kwa chiwalo cha itagwa lya Mkulu wa hetwe Yesu Kilistu. 27 Ahyo twanguwalajiza Yudasi na Sila, wano wowalonjela mbuli zotwandiche. 28 Kwa vila nainoga kwa Muhe Yelile na hetwe tuleche kuwadwika mhomolo yoneche ng'hulu, ila mbuli azi ziwele zanguganigwa. 29 Mleche kulya chilyo chitambichilwe jimalukolo na mleche kunwa danda na mleche kulya miwunde ja igongolo lyohalidumuligwe singo na miwiche kutali na ung'hondwa. Wone miwiche kutali na mbuli azi, mowa mditile goya. Malumbo!"

30 Lowawalajile, awo wasenga nawaluta Antiokiya kuwele nawachema nhing'hano ya chilundo cha wanhu walingumkunda Kilistu, nawawapa ayo baluwa. 31 Lowasomile ayo baluwa, ulonzi wandichigwe amo nauwakangaza nhumbula, nawasangalala ng'hatu. 32 Yudasi na Sila hewo nawali waloli, nawalonga ulonzi winji wa kuwakangaza nhumbula na kuwadita wawe nzinzili kuli makundo wala wanhu wawele nawakunda. 33 Lowekale ako Antiokiya kwa mhela winji, wanhu wa Antiokiya nawawalaga na kuwagana walute kwa kikala goya, hamba nawahiluka kwa wala wawele nawawalajiza. 34 Ila Sila nakalutilila kikala ako.

35 Paoli na Balinaba nawasigala Antiokiya kwa mhela winji kuno wowalangusa na kudamla ulonzi wa Mkulu hamwe na wanhu wanji wenji.

36 Mhela umwenga hamba, Paoli nakamlonjela Balinaba, "Tuhiluche kuli miji jeng'ha kuwele natudamla usenga wa Mkulu kwa wanhu, leka tone kota wangulutilila ndaze." 37 Balinaba nakagana wamhole Yohani yalinguchemigwa Malichi. 38 Ila Paoli haganile wamhole Malichi, kwa vila aho mwaluko nakawaleka kula Pamfiliya, nahaganile kulutilila kukola mijito na hewo. 39 Lelo, nakwali na kitwanza ng'hatu hali Paoli na Balinaba kuwala mbuli ayi, ahyo nawebagula. Balinaba nakamhola Malichi, nawakwina meli kuluta Kupilo. 40 Ila Paoli nakamhagula Sila na kuka hala du lowalandilwe kunoga kulawa kwa Mkulu na wanhu wa honhu hala. 41 Paoli na Sila nawakolela Siliya na Kilikiya, wowakangaza nhumbula vilundo vya wanhu walingumkunda Kilistu.