1 Zuwa lya Pendekosti lolifichile, walanguswa weng'ha nawali honhu hamwe. 2 Baho du lizi nalihulikwa kulawa kilanga, liwele kota mbeho ng'hulu, naimemeza yila ng'handa yeng'ha yowawele awo walanguswa. 3 Hamba navilawa vinhu vilingoneka kota milapi ja chiluli, navisambaluka na kugwa mchanya mwa chila yumwe wa hewo. 4 Weng'ha nawamemezwa Muhe Yelile, nawaluka kulonga ndonga zilivinji kota vila Muhe vyoyawaditile kulonga.

5 Ako Yelusalemu nawali Wayahudi, wanhu walingumdumba Nguluwi, walawile kuli chila isi. 6 Lowahuliche lizi alyo, chilundo chikulu cha wanhu nachikungajiza. Weng'ha nawatinhuka lukami kwa vila chila yumwe nakawahulika awo walanguswa wolonga kwa ndonga ya heye. 7 Wabubuwala kuno wolonga, "Ndaze, awa weng'ha tulinguwahulika wolonga ahi, hawawele wenyeng'haye wa Galilaya? 8 Naiwa ndaze lelo chila yumwe wa hetwe kanguwahulika wolonga kwa ndonga yake? 9 Wamwe wa hetwe ndo Wapaliti na Wamedi na Waelamu na wanji ndo wenyeng'haye wa Mesopotamiya na Yudeya na Kapadokia na Ponto na Asiya 10 na Fulugiya na Pamfiliya na Misili na honhu ha Libiya behi na Kulene, wamwe wa hetwe ndo wajenzi kulawa Loma, 11 Wayahudi na wanhu wawinzile nzila ya kumfugamila Nguluwi kwa Chiyahudi, wanji nawalawa Kilete na Alabiya. Hetwe tweng'ha twanguwahulika wolonga kwa ndonga za hetwe mbuli ng'hulu za Nguluwi." 12 Weng'ha nawabubuwala kuno wochiuza, "Ayi ina mana yachi?" 13 Ila wamwe nawawabeza wolonga, "Wanhu awa nawagala divai inyale!"

14 Ila Petili nakema hamwe na wala kumi na yumwe nakaluka kuwadamlila wanhu kwa lizi likulu, "Wang'holozangu Wayahudi na weng'ha mlingikala hano Yelusalemu, mhulichize goya ulonzi wa heni. 15 Wanhu awa hawagalile kota vyomlingijesa, kwa vila sambi ndo saa tatu hela mitondo! 16 Ndikomya, mbuli ayi ndo yila yoyalonjile mloli Yoeli kota,

17 " ‘Kuli mazuwa gala ga kuduma, Mkulu Nguluwi kanguwikula,

Ndowapa muhe wa heni wanhu weng'ha.

Wana wa hemwe wadala na walume wolavya uloli,

wasekulu wa hemwe wolota kahi,

na wasongolo wa hemwe wowona ulotezi.

18 Mbaka vitumagwa wa heni walume na wadala,

ndowapa Muhe wa heni kuli mazuwa gala,

nawo wolavya uloli.

19 Ndolavya ulajilo kilanga na kuli isi,

na ulajilo hasi kuli isi,

kowa na danda na chiluli na iyosi,

20 isanya lyowichigwa jiza,

na nyelezi yowa ndung'hu kota danda,

kung'hali kuya kwa zuwa lya Mkulu Nguluwi,

zuwa liwele ndo linojile ng'hatu. 21 Ahyo wanhu weng'ha howolanda kwa itagwa lya Mkulu Nguluwi woloholigwa.’

22 "Wanhu wa Isilaeli, mhulichize ulonzi awu! Yesu wa Nasaleti nayali munhu yawele nakalajilwa kwa hemwe na Nguluwi kwa vinduzanduza na ulajilo, viwele Nguluwi vyoyaditile hali hemwe kwa kukolela heye, kota vyomvizelele. 23 Kwa kihwana vyoyaganile Nguluwi nakagana kota Yesu yabatigwe na hemwe, namwe namumkopola kwa kuwalechela wanhu wehile wamuwambe. 24 Ila Nguluwi nakamzilipula, kalawa kwa wabagame, nakamlohola kuli usungu wa kubagama kwa vila nahakuganigwe kubagama kumuwohe. 25 Kwa vila Daudi nakalonga kuwala heye,

" ‘Nandimona Mkulu kumwando kwa heni mazuwa gose,

ka hamwe na heni kuli ubanzi wa heni wa kudilo si tigasika.

26 Ahyo, nhumbula ya heni naisangalala,

kahi nanhowa luchenze lwa kusangalala.

Lukuli lwa heni lochikala kuli kitumbila,

27 kwa vila hambe uileche nhumbula ya heni kuli wabagame,

ne kumkundiza yelile wa hegwe yole.

28 Nakundajila nzila za ukomu,

nakumemeza heni usangalalo kwa kuwa hamwe na hegwe!’

29 "Wang'holozangu, ndangugana kuwalonjela hazelu mbuli zimfichile Daudi, sekulu wa hetwe. Heye nakabagama, nakatiligwa, kahi chilaga cha heye cha baha kwa hetwe mbaka lehano. 30 Ila kwa vila Daudi nayali mloli, nakavizela kota Nguluwi nakamlahila kota komuwika yumwe wa lulelo lwa heye leka yawe mndewa honhu ha heye. 31 Daudi nakona kung'hali mbuli zoyodita Nguluwi ahyo nakalonga kuwala kuzilipuka kwa Kilistu mhela hoyalonjile, ‘Halechigwe kuli isi ya wabagame, lukuli lwa heye nahalolile.’ 32 Lelo, Nguluwi nakamzilipula ayo Yesu natwe tweng'ha twa walolezi wa mbuli ayo. 33 Yesu loyakwinizwe na kuwichigwa na Nguluwi kuli ubanzi wa heye wa kudilo, nakabochela kwa heye Mhaza yula Muhe Yelile yawele nakalagana, nakamdulisa kwa mchanya mwa hetwe ayo Muhe. Acho ndo mlinguchona sambi na kuhulika. 34 Kwa vila Daudi, hakwinile mbaka kilanga, ila heye nakalonga,

" ‘Mkulu nakamlonjela Mkulu wa heni,

wikalise ubanzi wa heni wa kudilo,

35 mbaka ndiwadite wang'honyo wa hegwe wawe chigoda cha kuwichila magulu ga hegwe.’

36 "Wanhu weng'ha wa Isilaeli yanguwalapa kuvizela kota ayo Yesu yowamgazile, ndo yuyula yawele Nguluwi nakamdita yawe Mkulu na Kilistu."

37 Lelo, wanhu lowahuliche ulonzi awu nauwahoma kuli nhumbula za hewo, nawamuuza Petili na wala watumigwa wanji, "Wang'holozetu tudite choni?" 38 Petili nakedichila, "Mleche gehile ga hemwe na chila yumwe wa hemwe yabatizigwe kwa itagwa lya Yesu Kilistu leka mpate kulechelwa gehile ga hemwe na kubochela ilagano lya Muhe Yelile. 39 Kwa vila, ilagano lila nalyali kwa chiwalo cha hemwe na kwa chiwalo cha wana wa hemwe na kwa chiwalo cha wanhu weng'ha walingikala kutali na kwa chiwalo cha chila munhu yawele Mkulu Nguluwi, Nguluwi wa hetwe komchema kwa heye."

40 Kwa ulonzi unji winji, Petili nakawalajiza wanhu yolonga, "Milohole kuli lulelo alu lwihile." 41 Wenji nawaukunda ulonzi wa heye, nawabatizigwa. Wanhu elufu zidatu nawonjezeka kuli chila chilundo zuwa alyo. 42 Awa weng'ha walutilila kilangusa kulawa kwa watumigwa, kikala hamwe chilukolo na kumogola ibumunda na kumlanda Nguluwi.

43 Vinduzanduza vinji navilajilwa kwa kukolela watumigwa mbaka chila munhu nakadumba. 44 Wanhu weng'ha wa Nguluwi nawalutilila kuwa chinhu chimwe na vinhu vya hewo nawegawila. 45 Nawali woguza lufufu lwawo na vinhu vyowawele navyo hamba nawegawila sendi kwa kiwhana na vinhu vyoyalinguganigwa kuwa navyo chila yumwe. 46 Nawalutilila kiting'hana hamwe chila zuwa kuli Ng'handa ya Nguluwi. Ila mhela wa kumogola mibumunda, naweting'hana kuli ng'handa za hewo na nawalya hamwe chilyo acho kwa usangalalo na nhumbula zigoloche. 47 Nawamtogola Nguluwi, nawaganigwa na wanhu weng'ha. Chila zuwa Mkulu nakawonjezela wanhu kuli chilundo cha hewo wawele nawaloholigwa.