1 Mhela awo Sauli nayali yokangaza kukabusa kwa kuwakopola walanguswa wa Mkulu Nguluwi. Nakaluta kwa mtambika mkulu, 2 nakalanda yapegwe baluwa ya kuzeleswa kuli masunagogi kula Damasiko, leka hoyowafika ako walume ama wadala walinguwinza nzila ayo, yawabate na kuwagala Yelusalemu.

3 Ila loyawele mnzila habehi kufika Damasiko, baho du lumuli kulawa kilanga nalumwemwesa nzingo zeng'ha. 4 Nakagwa hasi na kuhulika lizi limlonjela, "Sauli, Sauli! Lekachoni kwangungaza?" 5 Naye Sauli nakauza, "Kwa whaani hegwe, Mkulu?" Lila lizi nalidichila, "Nda Yesu, yawele ulingumgaza. 6 Ila wime lelo, winjile kuli muji, ako kolonjelwa choulinguganigwa kudita." 7 Wala wanhu wawele nawali kuli majendo hamwe na Sauli nawema ne kuwa na ulonzi, nawahulika lizi ila hawamuwene munhu. 8 Sauli nakenuka, loyagubule meho ga heye hawezile kona choneche, ahyo wala wanhu nawamlongoza kwa kumibata moko mbaka Damasiko. 9 Sauli nakekala mazuwa gadatu ne kona, mhela awo hadile ne kunwa chinhu choneche.

10 Lelo, ako Damasiko nakwali na mlanguswa yalinguchemigwa Ananiya. Mkulu Nguluwi nakamlonjela kuli kulota, "Ananiya!" Ananiya nakedichila, "Nda hano Mkulu." 11 Mkulu Nguluwi nakamlonjela, "Wiwiche goya ulute kuli nzila ilinguchemigwa igoloche, kuli ng'handa ya Yudasi umlande munhu yumwe yalawile Talso yalinguchemigwa Saulo. Sambi kangumlanda Nguluwi, 12 kuli kulota nakamona munhu yalinguchemigwa Ananiya yokwinjila mng'handa na kangumuwichila moko leka yalole kahi." 13 Ila Ananiya nakedichila, "Mkulu, nanyhulika mbuli za munhu ayu kulawa kwa wanhu wenji kuwala gehile goyawaditile wanhu wa hegwe ako Yelusalemu. 14 Nakoya hano Damasiko yawele na ludali kulawa kwa watambika wakulu leka yawabate wanhu weng'ha walingulanda kwa itagwa lya hegwe."

15 Ila Mkulu Nguluwi nakamlonjela, "Hegwe lute, kwa vila nandimhagula heye leka yawe chitumagwa wa heni, yalidamle itagwa lya heni kwa wanhu wa isi zinji na wandewa wa hewo na kwa wanhu wa Isilaeli. 16 Nani ndomlajila ndaze vyoyalinguganigwa kugazika kwa chiwalo cha itagwa lya heni."

17 Lelo, Ananiya nakaluta, nakenjila kuli ayo ng'handa loyawele Sauli. Nakamuwichila moko kumutwi, nakalonga, "Gwa, Sauli, Mkulu yawele ndo Yesu yawele nakakulawila louwele mnzila kuya hano, nakandajiza leka kwa hegwe leka upate kona kahi na umemezwe Muhe Yelile." 18 Baho du vinhu kota mibadu navigwa kulawa kuli meho ga Sauli, nakaluka kulola kahi. Nakema, nakabatizigwa. 19 Loyasindile kulya chilyo, mong'ho wa heye nauhiluka kwa heye.

Sauli nakekala mazuwa machefu hamwe na walanguswa ako Damasiko. 20 Baho du nakaluka kudamla kuli masunagogi kota Yesu ndo Mwana wa Nguluwi. 21 Wanhu weng'ha wamhuliche nawabubuwala, nawalonga, "Ndaze, munhu ayu hawele yawakopole wala walingulanda kwa itagwa lili kula Yelusalemu? Kahi nakoya hano kwa mbuli ya kuwebata wanhu awo na kuwegala kwa watambika wakulu!"

22 Sauli nakonjezeka kuwa na ludali na kuwadita Wayahudi walingikala Damasiko wabubuwale kwa kutawiza kota Yesu ndo Kilistu. 23 Logapulute mazuwa menji, Wayahudi nawekungajiza na kiwika goya mbuli ya kumkopola Sauli. 24 Ila Sauli nakahulika mbuli ayo. Wayahudi nawali wokwamila lwizi jeng'ha ja muji, nechilo na nemisi leka wamkopole. 25 Ila mhela wa nechilo walanguswa wa heye nawamhola, nawamdulisa yawele mgati mwa izandu kwa kukolela kuli lukanzi.

26 Sauli loyafichile Yelusalemu nakajeza kilumba na wala walanguswa. Ila weng'ha nawamdumba kwa vila hawakundile kota naye nayali mlanguswa. 27 Aho, Balinaba nakamhola Sauli, nakamigala kwa watumigwa na kuwalonjela Saulo vyoyamuwene Mkulu mnzila na ndaze Mkulu vyoyalongase naye. Kahi nakawalonjela vila Saulo vyoyadamle kwa itagwa lya Yesu ne kudumba kula Damasiko. 28 Ahyo Sauli nakekala na hewo kuno yojenda kwa kilejeha chila honhu ako Yelusalemu, yodamla kwa itagwa lya Yesu ne kudumba. 29 Nakadawala na kitwanza na Wayahudi walingulonga Chigilichi, ila hewo nawajeza kumkopola. 30 Wala wayage lowavizelele mbuli ayo, nawamhola Sauli, nawamhilika kuli muji wa Kaisaleya na kumdita yalute Taliso.

31 Mhela awo chilundo cha wanhu walingumkunda Kilistu nachali na kikala goya kuli honhu heng'ha ha Yudeya na Galilaya na Samaliya. Nachali na mong'ho na kwa uhembulizo wa Muhe Yelile nachonjezeka na kulutilila kumdumba Nguluwi.

32 Petili loyawele kuli majendo ga kuluta chila honhu, nakafika kwa wanhu wa Nguluwi wawele wochikala Luda. 33 Ako nakamfika munhu yumwe yalinguchemigwa Ainea yawele yawasile kuli chinhanda kwa mhela wa miyaka nane kwa vila nayali yaziliche. 34 Lelo, Petili nakamlonjela, "Ainea, Yesu Kilistu kangukulohola. Winuche uwiche goya chinhanda cha hegwe." Baho du Ainea nakenuka. 35 Wenyeng'haye weng'ha wa Luda na Saloni lowamuwene Ainea yojenda nawamgalamchila Mkulu Nguluwi.

36 Nakwali na mlanguswa yumwe mdala kuli muji wa Yopa yalinguchemigwa Tabita kwa Chigilichi ndo Dolikasi, iwele na mana ya Chifuno. Ayo mdala nayali yodita ganojile na kuwatanza wazunwa. 37 Mhela awo nakatamika, nakabagama. Wanhu nawauhovuga mtufi wake, nawauwasiliza kuli chihengo cha kuchanya. 38 Muji wa Yopa hauwele kutali ng'hatu na Luda, ahyo walanguswa lowahuliche kota Petili nayali Luda, wawalajiza wanhu weli walute kwa heye kuno wawele na usenga, "Uye kwa hetwe himahima." 39 Lelo, Petili nakaluta hamwe na hewo. Loyafichile nakahilikwa kuli chila chihengo. Ako wafililwe na walume wa hewo wawele ndo wenji nawamzunguluta Petili wolila na kumlajila mikoti na mivalo jiwele Dolikasi nayali yajigongomanye kwa chiwalo cha hewo mhela loyawele mkomu. 40 Petili kawalavya kunze weng'ha, hamba nakafugama nakamlanda Nguluwi. Hamba nakaugalamchila wula mtufi, nakalonga, "Tabita, winuche." Nakagubula meho ga heye, loyamuwene Petili, nakekalisa. 41 Petili nakamtanza kwima, hamba nakawachema wala wanhu wa Nguluwi na wala wafililwe na walume wa hewo, nakamigala kwa hewo yawele mkomu. 42 Mbuli ayo nayenela chila honhu ako Yopa na wanhu wenji nawamkunda Mkulu Nguluwi. 43 Petili nekekala mazuwa menji ako Yopa kwa munhu yumwe yalingugongomanya ngozi yalinguchemigwa Simoni.