1 Lelo, mtambika mkulu nakamuuza Stefani, "Ndaze! Mbuli azi ndo zakukomya?" 2 Stefani nakedichila, "Wang'holozangu na wahaza wa heni, mnyhulichize! Nguluwi nakamlawila sekulu wa hetwe Abulahamu loyawele yochikala Mesopotamiya kung'hali hanaluta kikala Halani, 3 Nguluwi nakamlonjela, ‘Uche kuli isi ya hegwe, uwaleche wanhu wa lukolo lwa hegwe, ulute kuli isi yondikulajila.’ 4 Ahyo, Abulahamu nakoka kuli isi ya Wakalidayo, nakaluta kikala Halani. Loyabagame mhaza wa heye, Nguluwi nakamusa Halani na kumigala kuli isi ayi yomlingikala sambi. 5 Nguluwi hampele ne honhu hamwe ha isi ayi leka hawe ha heye, ahyo, nakalagana na heye kota komha isi ayi iwe ya heye na ya walelwa wa heye, hanga mhela awo hawele na mwana. 6 Nguluwi nakamlonjela hino, ‘Walelwa wa hegwe wohilikwa kuli isi ilingulongozwa na wanhu wanji, ako woditigwa wapogozi na kuditilwa vibi kwa mhela wa miyaka miya zine. 7 Ila ndowatagusa wanhu wa isi ayo wawele wowadita wapogozi. Hamba ndowalavya kuli isi ayo leka woye wafugamile heni honhu aha.’ 8 Hamba Nguluwi nakadita ilagano na heye liwele ndo kwinjila ikumbi awo ndo ulajilo wa heye. Ahyo, Abulahamu nakamwinjiza ikumbi mwanage Isaka kuli zuwa lya nane kulawa kupondigwa. Isaka naye nakadita hihyo, nakamwinjiza ikumbi Yakubu. Naye Yakubu nakawenjiza ikumbi wanage kumi na weli wawele ndo wasekulu wa hetwe."

9 "Wala wasekulu wa hetwe nawamonela fihi Yusufu mng'holozawo, nawamguza kuli upogozi Misili. Ila Nguluwi nayali hamwe na heye, 10 nakamlohola kuli magazo ga heye geng'ha. Nguluwi nakamha heye igano lya kwimilila na luhala hali Falao, mndewa wa Misili, mbaka Falao nakamuwika yawe chilongozi wa yila isi na ng'handa ya chiundewa. 11 Hamba, nakwali lufemba kuli isi yeng'ha ya Misili na Kanani, nalwambuza kugaya kukulu. Wasekulu wa hetwe hawawezile kupata chilyo choneche. 12 Lelo, Yakubu loyahuliche mbuli kota ako Misili nakwali na chilyo, nakawalajiza wanage, wawele ndo wasekulu wa hetwe, walute ako Misili, nawaluta. 13 Lowalutile lwa keli, Yusufu nakezelesa kwa wang'holoze na Falao, mndewa wa Misili, nakazeleswa wang'holoze Yusufu. 14 Yusufu nakawalajiza wanhu wamigale Yakubu, mhaza wa heye hamwe na lukolo lwa heye lweng'ha, weng'ha nawali wanhu makumi saba na wahano, woye Misili. 15 Ahyo, Yakubu nakaluta Misili kuwele heye na wanage wawele ndo wasekulu wa hetwe nawabagama. 16 Mitufi ja hewo najigaligwa mbaka Shekemu, najitiligwa kuli chilaga chiguligwe na Abulahamu kulawa kuli nhanzi ya Hamoli kwa chasi chimwenga cha sendi.

17 "Mhela louwele habehi kufika wa lila ilagano liwele Nguluwi nakamha Abulahamu, wanhu nawalutilila konjezeka lukami ako Misili. 18 Hamba, mndewa yumwe yawele hamzelele Yusufu nakaluka kulongoza ako Misili. 19 Nakawaditila vibi wanhu wa hetwe na kuwagaza wasekulu wa hetwe na kuwadita wawataje wana wawele vyali leka wabagame." 20 Musa nakapondigwa mhela awo. Nayali mwana yanojile ng'hatu. Nakaloligwa kuli ng'handa ya mhaza wa heye kwa miyezi jidatu 21 na loyalavigwe kunze, mhiza wa Falao nakamhola, nakamlolela kota mwanage. 22 Musa nakalanguswa mbuli zeng'ha za luhala lwa Wamisili, nayali yazidahe kwa ulonzi na madito.

23 "Loyawele na miyaka makumi gane nakamula kuluta kuwalola wang'holoze Waisilaeli. 24 Ako nakamona yumwe wa hewo yoditilwa vibi na Mmisili, nakaluta kumgombola na kwa kuhilula chibida nakamkopola yula munhu. 25 Musa nakejesa kota Waisilaeli wayage wahavizelele kota Nguluwi kanguwalohola kwa kukolela heye, ila nahawavizelele. 26 Zuwa liwinzile, Musa nakawona Waisilaeli weli wochitwanza, nakajeza kuwahanyisa yolonga, ‘Hemwe mwa lukolo, lekachoni lelo mwangiditila vibi mwemwe yeka?’ 27 Yula yawele yomtowa myage nakamkundujiza Musa hafungo yolonga, ‘Whaani yakuwichile hegwe uwe chilongozi na yalingwamula hali hetwe? 28 Ndaze, kwangugana kung'hopola kota vyoumkopole yula Mmisili mitondo?’ 29 Loyahuliche ago, Musa nakadwina, nakaluta kikala kuli isi ya Midiani, ako nakawa na wana weli.

30 "Miyaka makumi gane lojifichile, mhilisi wa Mkulu Nguluwi nakamlawila Musa kuli chisosolo chilingwaka chiluli kula kugunuche behi na chidunda cha Sinai. 31 Musa loyaiwene mbuli ayo nakabubuwala ng'hatu, loyahejele habehi leka yalole, nakahulika lizi lya Mkulu Nguluwi, 32 ‘Heni nda Nguluwi wa wasekulu wa hegwe wawele ndo Abulahamu na Isaka na Yakubu.’ Musa nakakakama kwa lunhwinhwi na hajezile kulola. 33 Mkulu Nguluwi nakamlonjela, ‘uvule makwamba ga hegwe, kwa vila honhu houkwima ndo honhu helile. 34 Nandigona gehile gowalinguditilwa wanhu wa heni kula Misili. Nanyhulika kulila kwa hewo, nani nambuya kuwalohola. Lelo, ndokulajiza Misili.’

35 "Ayu Musa ndo yula wanhu wa Isilaeli nawamlema lowalonjile, ‘Whaani yakuwichile hegwe uwe chilongozi na yalingwamula hali hetwe?’ Kwa kukolela yula mhilisi yamlawile kuli chila chisosolo chiwele chilingwaka chiluli, Nguluwi nakamlajiza ayo Musa yawe chilongozi na mgombozi. 36 Nakawalongoza wana wa Isilaeli kulawa Misili, loyaditile ulajilo na vinduzanduza vinji ako Misili, kuli bahali ya Shamu na kugunuche kwa mhela wa miyaka makumi gane. 37 Musa ndo yawalonjele wanhu wa Isilaeli, ‘Nguluwi kowahagulila mloli kota heni hali wang'holozenu.’ 38 Waisilaeli lowekungajize kula kugunuche, Musa ndo nayali kota msenga hali awo wasekulu wa hetwe na yula mhilisi yawele nakalongasa naye kuli chidunda cha Sinai. Ndo yapegwe wula ulonzi wa ukomu leka yatupe hetwe.

39 "Ila wahaza wa hetwe nawalema kumhulichiza Musa, nawamlema na kugana kuhiluka Misili. 40 Nawamlonjela Aluni, ‘Tugongomanyile milungu jiwele jotulongoza mnzila, kwa vila hatuvizelele gamfichile ayo Musa yatulongoze kulawa Misili!’ 41 Aho ndo nawegongomanyila limalukolo lya ilogota, nawalavya nhambiko na kudita mvina kuli chinhu chiwele ndo mijito ja moko ga hewo wawo. 42 Ila Nguluwi nakoka hali hewo, nakawaleka wafugamile nhondwe za kilanga, kota voyandichigwe kuli chitabu cha waloli,

" ‘Hemwe Waisilaeli!

Ndaze, kwa miyaka makumi gane kula kuli chiwala,

namingalila nhambiko na ndolendole ne kamwe?

43 Hemwe namchipika chibumuli cha mlungu Moloki,

na limalukolo lya nhondwe lya mlungu wa hemwe Lefani.

Vinhu viwele namvigongomanya mwemwe leka mvifugamile.

Ahyo ndowahilika hemwe kuli isi ya chijenzi, kutali kusinda Babiloni!’

44 "Kula kugunuche wasekulu wa hetwe nawali na lila Ihema lya Nguluwi. Nalyali ligongomanywe kota Nguluwi navyoyamlonjele Musa yalidite, kwa kiwhana na chila choyalajilwe. 45 Hamba wasekulu wa hetwe nawebocheleza lila Ihema lya Nguluwi, mbaka mhela wa, Lowaiholile yila isi kulawa kwa wanhu wa isi wawele Nguluwi nakawawinga hali hewo. Aho naliwa baho mbaka mhela wa Daudi. 46 Daudi nakaganigwa lukami na Nguluwi, nakamlanda Nguluwi yamkundize leka yamzenjele ng'handa Nguluwi wa Yakubu. 47 Ila Solomoni ndo yamzenjele Nguluwi ng'handa.

48 "Ila, Nguluwi Yawele Kuchanya hambe yekale kuli ng'handa zizenjigwe na wanhu, kota mloli vyoyalingulonga,

49 " ‘Mkulu kangulonga,

kilanga ndo chigoda cha heni cha undewa,

na isi ndo chigoda cha heni cha kuwichila magulu.

50 Lelo, ng'handa ilindaze yomuweza kunzenjela,

na honhu hachi hondikwesela?

Ndaze, vinhu avi vyeng'ha sividitile heni?’ "

51 Hamba Stefani nakalutilila kulonga, "Hemwe wajuvi! Nhumbula za hemwe na makutu ga hemwe ndo kota ga wanhu wa isi. Hemwe ndo kota wasekulu wa hemwe. Mazuwa geng'ha mwangumlema Muhe Yelile. 52 Ndaze, hana mloli wa Nguluwi yoneche yawele wasekulu wa hemwe hawamgazile? Nawawakopola awo wawele Nguluwi nakawalajiza wadamle kuya kwa heye Yawele na Hachi. Lelo, namwe namumbelenhuka, namumkopola. 53 Hemwe namgabochela malajizo gagaligwe kwa hemwe na mhilisi, ila hamugakundile."

54 Wala wasekulu wa Chitala lowahuliche ago, nawazudila ng'hatu, nawajejeda mizino kwa kuzudila. 55 Ila Stefani yawele yamemile Muhe Yelile, nakalola kilanga, nakawona ukulu wa Nguluwi na Yesu yemile ubanzi wa kudilo wa Nguluwi. 56 Nakalonga, "Mlole! Ndangona ulanga ugubuligwe na Mwana wa munhu yemile ubanzi wa kudilo wa Nguluwi."

57 Aho, wanhu weng'ha wawele kuli Chitala, nawatowa iyowe na kudinya makutu ga hewo kwa moko gawo. Hamba weng'ha nawamnyozochela, 58 nawamlavya hanze ha muji, nawamtowa na maganga. Wala walolezi nawajiwika mikoti ja hewo hali ulolezi wa msongolo yumwe yalinguchemigwa Saulo. 59 Nawalutilila kumtowa Stefani na maganga kuno yomlanda Nguluwi, "Mkulu Yesu, ubochele Muhe wa heni!"Munhu yalingutowigwa na maganga mbaka kubagama 60 Nakafugama, nakalila kwa lizi likulu, "Mkulu, uwosele gehile aga." Loyalonjile ago, nakabagama.