1 Hamba, walanguswa lowawele wokonjezeka, nakwali na kung'ung'uta hali wanhu walingumkunda Nguluwi walingulonga Chigilichi na wala walingulonga Chiebulaniya. Wala walingulonga Chigilichi nawang'hung'huta kota wanhu wa hewo wawele nawafililwa na walume wa hewo nawali wosemigwa kuli kugawilwa vinhu vyowalinguganigwa kupegwa chila zuwa. 2 Ahyo, watumigwa kumi na weli nawawachema walanguswa weng'ha, nawalonga, "Hainojile hetwe tuleche kudamla ulonzi wa Nguluwi leka tukole mijito ja kuwagawila wanhu vinhu vyowalinguganigwa kupegwa. 3 Ahyo, wang'holozetu, mhagule hali hemwe wanhu saba watanganiche, wawele na Muhe Yelile na luhala, wawele towapa mijito ajo. 4 Natwe tokola mijito ja kumlanda Nguluwi na kudamla ulonzi wa Nguluwi."

5 Mbuli ayo naiwanojeza wanhu weng'ha walingumkunda Nguluwi. Nawawahagula Stefani, munhu yawele na makundo makulu na yawele na Muhe Yelile hamwe na Filipo na Pilokolo na Nikanoli na Timoni na Palimena na Nikolao wa Antiokiya yawele mhela umwe nayali yofugama kwa Chiyahudi. 6 Nawawawika hali watumigwa, nawo watumigwa nawalanda kwa chiwalo cha hewo na kuwawichila moko kumutwi kwa hewo.

7 Ulonzi wa Nguluwi naulutilila kwenela na wanhu walingumkunda Nguluwi ako Yelusalemu nawonjezeka ng'hatu na chilundo chikulu cha watambika nawabochela makundo.

8 Nguluwi nakamha Stefani kunoga kwinji na ludali mbaka nayali yodita vinduzanduza hali wanhu. 9 Ila wanhu wamwenga nawetwanza na Stefani. Wamwe wa wanhu awo nawali wa sunagogi limwe lichemigwe, "Sunagogi lya Wanhu Welejehe," nawo nawalawa Kulene na Alekisandilia, wanji nawalawa Kilikiya na Asiya. 10 Ila nawalemwela kumsumya kwa chiwalo cha luhala lwake na Muhe Yelile yamlongoze mhela loyalonjile. 11 Ahyo nawawalonjela wanhu wamwenga kwa uviso walonje, "Natumhulika Stefano yolonga ulonzi wa kumliga Musa na Nguluwi." 12 Kwa chiwalo acho, nawawadita wanhu na wasekulu na walangusa wa malajizo ga Musa wazudile. Nawo nawamibata Stefani, nawamigala hali chitala. 13 Nawawegala walolezi wa udesi hali chitala wawele nawalonga, "Munhu ayu hambe yaleche kulonga ulonzi wa kuhaliga honhu aha helile na malajizo ga Musa. 14 Kwa vila natumhulika yolonga kota Yesu wa Nasaleti kohawifya ng'hatu honhu helile na kugalula vihendo vyeng'ha vyotupegwe na Musa." 15 Wanhu weng'ha wawele kuli chitala nawamnogolela meho Stefani, nawona kumeho kwa heye kuwele kota mhilisi.