1 Petili na Yohani lowawele wang'hali wowadamlila wanhu, watambika na chilongozi wa wamizi wa ng'handa ya Nguluwi hamwe na Masadukayo nawafika. 2 Nawazudila lukami, kwa vila awo watumigwa nawali wowadamlila wanhu kota Yesu nakazilipuka, mbuli ilingulajila kota wabagame wozilipuka. 3 Lelo, nawawabata, kwa vila nechilo nayali habehi, nawawawika mchinweng'ho mbaka mitondo kwa vila nayali nechilo. 4 Ila wenji hali wala wahuliche usenga wa hewo nawakunda, chilundo cha wanhu wakundile nachali chifichile walume elufu zihano.

5 Mitondo, vilongozi wa Wayahudi na wasekulu na walangusa wa malajizo ga Musa naweting'hana hamwe ako Yelusalemu. 6 Neweting'hana hamwe na Anasi mtambika mkulu na Kayafa na Yohani na Alekizanda na wanji wawele wa lukolo lwa mtambika mkulu. 7 Lowawemize Petili na Yohani hali hewo, nawawauza, "Kwa ludali lwa whaani ama kwa itwagwa lya whaani namdita mbuli ayi?"

8 Aho Petili, yawele yamemile Muhe Yelile, nakawalonjela, "Vilongozi na wasekulu wa wanhu! 9 Wone mwangutuuza lehano kuwala yila mbuli inojile yoyaditilwe yula munhu yawele nayali chete na ndaze vyoyawele mkomu, 10 lelo, hemwe na wanhu weng'ha wa Isilaeli mwanguganigwa kuvizela kota munhu ayu kangwima hali hemwe lehano, mkomu ng'hatu, kwa mong'ho wa itagwa lya Yesu wa Nasaleti yawele hemwe namumuwamba, ila Nguluwi nakamzilipula kulawa kwa wabagame. 11 Ayu ndo yula yawele Maandiko Matakatifu gangulonga,

" ‘Iganga lyomlilemile hemwe mlinguzenga,

lelo naliwa iganga likulu lya msisi.’

12 Ulohozi wahaduhu kwa munhu yunji yoneche, kwa vila kuli isi yeng'ha, wanhu hawapegwe itagwa munhu yunji yawele hetwe twanguweza kuloholigwa naye."

13 Awo vilongozi na wasekulu wa chitala, nawali wovizela kota Petili na Yohani nawali wanhu wawele hawasomile, nawabubuwala kuwala vyowalonjile goya. Nawavizela kota nawali welumbile na Yesu. 14 Ila lowamuwene yula munhu yosilwe utamwa yemile hamwe na hewo, hawalonjile chinhu. 15 Ahyo, nawawalonjela walawe hali chitala, nawo nawapona mng'handa wolongasa chinyele. 16 Naweuza, "Tudite choni na wanhu awa? Chila munhu yalingikala Yelusalemu kanguvizela kota ulajilo awu wakububuwaza naukoleka, natwe hatubela mbuli ayi. 17 Ila wone twangugana kulemeza mbuli ayi ileche kwenela ng'hatu kwa wanhu, tuwalemeze leka waleche kulonga na munhu yoneche kwa itagwa lya Yesu."

18 Ahyo nawawachema kahi mng'handa, nawawalemeza waleche kulonga kahi hazelu, ne kulangusa kwa itagwa lya Yesu. 19 Ila Petili na Yohani nawawedichila, "Mwamule mwemwe wone inoga hali Nguluwi kuwahulichiza hemwe kusinda kumhulichiza Nguluwi. 20 Kwa vila hatuleka kulonga kuwala mbuli zila zotuziwene na kuzihulika." 21 Lelo, awo wasekulu wa chitala nawawalemeza kwa kung'hang'hala ng'hatu, hamba nawawalechela welejehe. Hawawagazile kwa vila wanhu weng'ha nawali womtogola Nguluwi kwa mbuli ayo ilawile. 22 Ayo munhu yoselwe utamwa nayali na miyaka makumi gane.

23 Baho du lowalechigwe welejehe, Petili na Yohani nawahiluka kwa wayawo, nawawalonjela gala gowalonjelwe na watambika wakulu na wasekulu. 24 Nawo lowahuliche mbuli azo nawelumba na wayawo kumlanda Nguluwi wolonga, "Mkulu, hegwe ndo ulumbile ulanga na isi na bahali na vyeng'ha viwele amo! 25 Hegwe nakulonga kwa Muhe Yelile kwa kukolela mlomo wa mhaza wa hetwe Daudi, chitumagwa wa hegwe, nakulonga,

" ‘Lekachoni wanhu wa isi zeng'ha wanguwa na ivuche?

Lekachoni wanhu wangijesa kubelenhuka?

26 Wandewa wa isi nawewika goya,

na vilongozi naweting'hana hamwe

leka kumlema Mkulu Nguluwi na Kilistu.’

27 Ndikomya, kwa vila Helodi na Pontio Pilato hamwe na wanhu wa isi zinji na Waisilaeli, loweting'hane hano kuli muji, kumlemela Yesu chitumagwa wa hegwe Yelile yawele nakumuwika chiuyeng'ha. 28 Ena, naweting'hana leka wadite mbuli zila zouganile zilawile kulawa mwaluko kwa ludali na igano lya hegwe. 29 Lelo, gwa Mkulu, ulole kukabusa kwa hewo. Ututanze hetwe vitumagwa wa hegwe kudamla ulonzi wa hegwe ne kudumba. 30 Golola moko wa hegwe leka uwalohole wanhu. Udite ulajilo na vinduzanduza kwa itagwa lya Yesu Chitumagwa wa hegwe Yelile."

31 Lowasindile kumlanda Nguluwi, hala honhu howawele naweting'hana nahatigaswa, nawo weng'ha nawamemezwa Muhe Yelile. Weng'ha nawaluka kudamla ulonzi wa Nguluwi ne kudumba.

32 Weng'ha wawele na makundo nawali na nhumbula ziwhanile na kunuwila kumwe. Haduhu ne yumwe yawele na chinhu yachiwiche chiwe cha heye yeka, ila nawegawila vyeng'ha vyowawele navyo. 33 Watumigwa nawalavya ulolezi wa kuzilipuka kwa Mkulu Yesu kwa mong'ho ng'hatu na Nguluwi kawatambichiza weng'ha. 34 Haduhu munhu yoneche yawele nakesilwa chinhu, kwa vila wawele na migunda ama ng'handa nawali woguza 35 na kuwapa watumigwa sendi azo, nazigawilwa kwa chila yumwe kwa kiwhana na vyoyalinguganigwa kupegwa.

36 Nakwali na Mlawi wa lukolo lwa Kupulo, itagwa lyake Yusufu, yawele watumigwa nawamchema Balinaba, izeleche kota, "Munhu yalinguwakangaza nhumbula wanhu." 37 Heye naye nayali na mgunda, nakauguza, nakahola zila sendi nakawapa watumigwa.