1 Kula Ikonio, mbuli nazali kota vyoziwele kula Antiokiya, Paoli na Balinaba nawaluta kuli sunagogi lya Wayahudi na kudamla goya mbaka Wayahudi wenji na Wagilichi nawakunda. 2 Ila Wayahudi wanji wawele nawalema kukunda, nawazidita nhumbula za wanhu wa isi zinji ziwe zihile leka wetwanze na wang'holozawo wawele nawakunda. 3 Paoli na Balinaba nawalutilila kikala ako mhela winji. Nawadamla goya kuwala Mkulu, naye Mkulu nakatawiza kukomya kwa usenga wowaulavile kuwala igano lya heye kwa kuwadita wadite ulajilo na vinduzanduza. 4 Ila wanhu wa muji awo nawali kuli banzi mbili, wanji nawelumba na Wayahudi na wamwe nawelumba na watumigwa.

5 Hamba, wanhu wa isi zinji na Wayahudi nawelumba na vilongozi wamwe, nawewika goya kuwaditila vibi watumigwa na kuwatowa na maganga. 6 Watumigwa lowavizelele mbuli ayo, nawabilimila Lustila na Delibe, Miji ja Lukaonia na honhu hanji ha habehi. 7 Ako nawalutilila kudamla Mbuli Inojile.

8 Nakwali na munhu yumwe ako Lustila yawele chete kulawa kupondigwa kwa heye, nahawahiche kujenda nehado. 9 Munhu ayo nayali yomhulichiza Paoli loyawele yodamla. Paoli loyamlolile goya nakona kota kana makundo ga kuloholigwa, 10 nakalonga kwa lizi likulu, "Wime kwa magulu gako!" Ayo munhu nakema na kwaluka kujenda. 11 Chilundo cha wanhu vyochiwene choyaditile Paoli, nachaluka kutowa iyowe kwa ndonga ya Chilukaonia, "Milungu najuya kwa hetwe kwa kiwhana na wanhu!" 12 Balinaba nawamchema Seusi na Paoli nawamchema Helime, kwa vila heye ndo nayali yolonga. 13 Mtambika wa ng'handa ya mlungu Seusi iwele hanze ha muji, nakegala mibuguma na nganda za uluwa hali lwizi lwa muji kwa vila heye na chila chilundo cha wanhu nawagana kuwalavila nhambiko awo watumigwa.

14 Balinaba na Paoli lowahuliche mbuli ayo, nawadeganga mivalo ja hewo na kubilimila kuli chila chilundo cha wanhu, kuno wotowa iyowe wolonga, 15 "Hemwe wanhu, lekachoni mwangudita mbuli azi? Hetwe twa wanhu kota mwemwe. Twahano kuwadamlila Mbuli Inojile leka mjileche aji jimalukolo, mumgalamchile Nguluwi yawele mkomu, Nguluwi yawele nakalumba ulanga na isi na bahali na vinhu vyeng'ha viwele amo. 16 Katali Nguluwi nakawaleka wanhu wa isi zeng'ha wadite kota vila vyowaganile. 17 Ila halechile kilajila kwa wanhu. Nakalajila igano kwa kuwatowela nhonya kulawa kilanga na kuwapa mbena kwa mhela wake, nakawapa chilyo cha kuhega na kumemeza usangalalo kuli nhumbula za hemwe." 18 Hanga nawalonga ago geng'ha, nayali ngondo kuwalemeza wala wanhu kulavya nhambiko.

19 Aho ndo nawoya Wayahudi wamwe walawile Antiokiya na Ikonio, nawalongasa na wala wanhu na kilumba nawo, nawamtowa na maganga Paoli na kumbulunha mbaka hanze ha muji nawejesa kota nakabagama. 20 Ila walanguswa lowekungajize na kumzunguluta, nakenuka na kuhiluka kuli muji. Mitondo, heye hamwe na Balinaba nawaluta Delibe.

21 Paoli na Balinaba lowadamle Mbuli Inojile ako Delibe na wanhu wenji kuwawinza, nawenula majendo kuluta Antiokiya kwa kukolela Lustila na Ikonio. 22 Nawawakangaza nhumbula walanguswa leka wawe nzinzili kuli makundo. Nawawalonjela, "Naitugana tweng'ha kukolela kuli magazo menji leka twinjile kuli Undewa wa Nguluwi." 23 Nawawahagula wasekulu kuli chila chilundo cha wanhu walingumkunda Kilistu kwa kwesela kulya na kulanda, nawawawika kwa Mkulu yawele nawali wangumkunda.

24 Hamba nawakola kuli isi ya Pisidiya, nawafika Pamfiliya. 25 Lowadamle ulonzi wa Nguluwi ako Peliga, nawaluta Ataliya. 26 Kulawa Ataliya nawenula majendo kwa meli nawahiluka Antiokiya kuwele aho mwaluko nawali watogoligwe kwa chiwalo cha Isungu lya Nguluwi kwa mijito jiwele lelo nawajeneza.

27 Lowafichile Antiokiya nawadita nhing'hano na chilundo cha wanhu walingumkunda Kilistu cha honhu hala, nawawalonjela kuwala mbuli zeng'ha Nguluwi zoyaziditile hamwe na hewo na ndaze vyoyawachumulile wanhu wa isi zinji lwizi leka wenjile kuli makundo. 28 Nawekala hamwe na wala walanguswa kwa mhela winji.