1 Paoli nakafika Delibe na Lustila, kuwele nakekala mlanguswa yumwe yalinguchemigwa Timoteyi. Mamo wa Timoteyi naye nayali mlanguswa yawele Myahudi, ila mhaza wa heye nayali Mgilichi. 2 Timoteyi nayali na lutogo lukulu hali wala wanhu wa Lustila na Ikonio. 3 Paoli nakagana Timoteyi yelongoze kuli majendo ga heye, ahyo nakamwinjiza ikumbi. Nakadita ahyo kwa vila Wayahudi weng'ha wawelengikala honhu aho nawavizela kota mhaza wa Timoteyi nayali Mgilichi. 4 Lowawele wokola kuli jila miji nawawalonjela wanhu malajizo galajizwe na watumigwa na wasekulu kula Yelusalemu, nawawalonjela wagawinze. 5 Ahyo, vilundo vya wanhu walingumkunda Kilistu navyali nzinzili kuli makundo na wanhu wawele na makundo nawonjezeka chila zuwa.

6 Paoli na wayage nawakola honhu ha Filugiya na Galatiya, kwa vila Muhe Yelile hawakundize kudamla awo usenga kuli mkowa wa Asiya. 7 Lowafichile kuli mbaka wa Musia, nawajeza kwinjila kuli mkowa wa Bituniya, ila Muhe wa Yesu hawakundize. 8 Lelo, nawakolela Musia, nawaluta mbaka Tiloa. 9 Mhela wa nechilo, Paoli nakona ulotezi uwele nakamona munhu wa Makedoniya yemile yomlanda, "Uloche, uye Makedoniya ututanze!" 10 Paoli loyonile ulotezi awo, natiwika goya kuluta Makedoniya, kuno tuwele tukundile kota Nguluwi nayali nakatuchema kudamla Mbuli Inojile ako.

11 Kulawa Tiloa, natuka kwa meli mbaka Samotilake na mitondo natufika Neapoli. 12 Kulawa ako natwinula majendo mbaka Filipi, muji ukulu wa wilaya ya Makedoniya, kahi ndo uwele wangulongozwa na Waloma. Natikala ako kwa mazuwa mado. 13 Zuwa lya Kwesela natuluta hanze ha muji, natuluta hafungo ha lwanda kuwele natijesa kota ndo honhu ha kulandila. Natikalisa, natudawala na wadala wawele nawekungajiza honhu aho. 14 Yumwe wa wala wadala wawele nawali wotuhulichiza nayali yochemigwa Ludia, nayali yalinguguza nguwo za kitani za lanji ya zambalau, mwenyeng'haye wa Tuatila, nayali yomdumba Nguluwi. Mkulu nakagubula nhumbula ya heye mbaka nakaubochela wula ulonzi uwele Paoli nayali yolonga. 15 Lowabatizigwe, mdala ayo hamwe na wanhu wa ng'handa ya heye nakatulalika kaye kwa heye yolonga, "Ndikomya, wone namona kota heni nandimkunda Mkulu, ndanguwalanda muye mikale kaye kwa heni." Nakatudedeza tulute.

16 Zuwa limwe lotuwele tuluta kuli honhu ha kulandila, natiting'hana na mhinza yawele na chijeni cha kulagula. Mhinza ayo nayali nakawadita wakulu wa heye wawe na sendi nyinji kwa kukola mijito ajo ja kulagula. 17 Ayo mhinza nayali yomuwinza Paoli na hetwe kuno yotowa iyowe na kulonga, "Wanhu awa ndo vitumagwa wa Nguluwi Yawele Kuchanya Ng'hatu. Wanguwawikulila nzila ya kuloholigwa." 18 Nakalutilila kudita ahyo kwa mazuwa menji mbaka zuwa limwe Paoli nakazudila, nakamgalamchila na kuchilonjela acho chijeni, "Ndangukulonjela kwa itagwa lya Yesu Kilistu, ulawe kwa munhu ayu!" Baho du, acho chijeni nachimlawa.

19 Lelo, wakulu wa yula mhinza lowawene kota hawoweza kupata sendi kahi kulawa kwa yula mhinza yawele nawali ngitumbila, nawawebata Paoli na Sila, nawawabulunha mbaka kwa vilongozi. 20 Nawawalonjeleza kwa watagusa wolonga, "Wanhu awa ndo Wayahudi na wangigala ivuche kuli muji wa hetwe. 21 Wangulangusa vihendo viwele hetwe wanhu wa Loma hambe tuganigwe kuvikunda ne kuviwinza." 22 Chilundo cha wanhu nachilumba kuwatowa na wala watagusa nawalonga kota wawavule nguwo na wawazape ng'hobwa. 23 Lowatowigwe lukami nawawichigwa mchinweng'ho na mwamizi wa chinweng'ho nakalonjelwa kota yawamile ng'hatu. 24 Kwa malajizo ago, ayo mwamizi nakawawika kuli chihengo cha kugati ng'hatu mwa chinweng'ho na kugawoha magulu ga hewo kwa minyololo.Wanhu weli wawohigwe ngwamo

25 Loifichile nechilo ng'hatu, Paoli na Sila nawali womlanda Nguluwi na kwimba nzimbo za kumtogola Nguluwi kuno wanji wawele mchinweng'ho wohulichiza. 26 Baho du nalilawila limachinyhina likulu liwele nalitigasa msisi wa chinweng'ho. Baho du lwizi jeng'ha najichumuka na minyololo jiwele nawawawoha najichumuka. 27 Mwamizi wa chinhweng'ho loyalilimche na kona lwizi ja chinweng'ho ja mwazi, nakejesa kota weng'ha wawele nawahindilwa mchinweng'ho nawabilima, ahyo nakasomola ipanga lyake, nakagana kikopola. 28 Ila Paoli nakamchema kwa lizi likulu, "Uleche kikopola, hetwe tweng'ha twa hano."

29 Yula mwamizi nakalajiza vyenje vigaligwe, nakenjila mgati mwa chila chihengo cha chinweng'ho, nakafugama kuno yokakama hali Paoli na Sila. 30 Hamba nakawegala kunze, nakawauza, "Wakulu, ndite choni leka mhate kuloholigwa?" 31 Nawamwidichila, "Umkunde mkulu Yesu nagwe koloholigwa hamwe na wanhu wa ng'handa ya hegwe." 32 Lelo, nawadamla ulonzi wa Mkulu kwa heye hamwe na wanhu wa ng'handa ya heye. 33 Mhela wuwula yula mwamizi nakawahola na kuhovuga vilonda vya hewo, hamba heye na wanhu wa ng'handa heye nawabatizigwa ne kukawila. 34 Hamba nakawahola Paoli na Sila mbaka kaye kwa heye, nakawapa chilyo. Heye hamwe na wanhu wa ng'handa ya heye nawadita mvina kwa vila nawali womkunda Nguluwi.

35 Lokubwemwenzuche, watagusa nawawalajiza vilongozi kwa wakulu wa chinweng'ho wolonga, "Muwadoholele wala wanhu, muwaleche walute." 36 Yula mwamizi wa chinweng'ho nakamlonjela Paoli, "Watagusa nawalajiza kota ndiwachumulile. Lelo mlawe na mlute kwa kikala goya." 37 Ila Paoli nakamlonjela, "Nawatutowa hali wanhu ne kutulonjeleza na kutulonjela twidichile, hamba nawatuwika mchinweng'ho hanga hetwe twa wanhu wa Loma. Lelo, wangugana kutulavya kwa uviso! Wanguganigwa woye watuchumulile wawo." 38 Awo vilongozi nawawalonjela watagusa kuwala mbuli ayo, lowahuliche kota Paoli na Sila nawali wanhu wa Loma nawadumba. 39 Ahyo, nawaluta kuwadedeza, nawawalavya mchinweng'ho na nawawalanda walawe kuli muji wula. 40 Paoli na Sila nawalawa kuli chinweng'ho, nawaluta haluga ha Ludia. Ako naweting'hana na chilundo cha wanhu walingumkunda Kilistu, nawawakangaza nhumbula hamba nawoka.