1 Lolimalile lila ivuche, Paoli nakawachema hamwe wala walanguswa, nakawakangaza nhumbula. Hamba nakawalaga, nakenula majendo kuluta Makedoniya. 2 Kuli majendo ga heye ga kuluta Makedoniya nakakola chila honhu yowakangaza nhumbula walanguswa kwa ulonzi winji. Hamba nakaluta Ugilichi 3 kuwele nakekala kwa myezi jidatu. Loyawele yochiwika goya kuluta Siliya, nakavizela kota Wayahudi nawali wochiwika goya kumditila vibi, ahyo nakamula kuhiluka kwa kukolela Makedoniya. 4 Paoli nayali yelongoze na Sopatilo mwana wa Pilo, kulawa Beleya, kahi nakelongoza na Alisitaliko na Sekundo kulawa Tesalonike na Gayo kulawa Delibe, kahi Timoteo na Tukiko na Tilofimo kulawa Asiya. 5 Wanhu awo nawalongola kuka, nawambeteza Paoli ako Tiloa. 6 Ila hetwe natwinula majendo kwa meli kwa mhela wa mazuwa gahano kulawa Filipi kulawila hala loimalile mnvina ya mibumunda johajiwichigwe usaso, natwe natilumba na wanji ako Tiloa, kuwele natikala kwa mhela wa mazuwa saba.

7 Zuwa lya Kwesela natiting'hana kwa chiwalo cha kumogola ibumunda. Paoli nakalongasa na wanhu mbaka nechilo ng'hatu kwa vila nayali yewichile goya kuka mitondo yake. 8 Kuli chihengo cha kuchanya, muwele naweting'hana namwali na vyenje vinji vilingulavya lumuli. 9 Msongolo yumwe yalinguchemigwa Eutuko nayali yekalise hali itubuli mhela Paoli loyawele yolutilila kudamla. Eutuko nakaluka kusinzila hamba nakabatigwa ng'hatu na usinjizi, nakagwa mbaka hasi kulawa kuchanya kuli chihengo chiwele kuli golofa ya kadatu. Nawamlokota yawele yabagame. 10 Ila Paoli nakedulika hasi, nakawasa mchanya mwake na kumkumbatila, nakalonga, "Mleche kudumba kwa vila ukomu ung'hali mgati mwa heye." 11 Hamba Paoli nakakwina kuli golofa, nakamogola ibumunda, nakalya. Nakalutilila kudamla kwa mhela winji mbaka hamitondo, hamba nakoka. 12 Wala wanhu nawamhilusa yula msongolo mbaka haluga hake kuno yawele mkomu nawo nawawa na uhembulizo ukulu.

13 Hetwe natukwina meli natulongola kuluta Aso kuwele twahamholile Paoli. Ahyo ndo vyoyaganile, kwa vila nakagana kufika ako kwa kukolela kuli isi ng'havu. 14 Lelo, nakatufika kula Aso, nakakwina kuli meli, natuluta mbaka Mitulene. 15 Kulawa ako mitondo yake natufika Kio. Zuwa lya keli natufika Samo na mitondo yake tufika Mileto. 16 Paoli nayali yogana kulutilila na majendo kwa meli ne kukolela Efeso leka yaleche kukawila ng'hatu ako Asiya. Nayali yogana yafiche Yelusalemu himahima kung'hali zuwa lya mnvina ya Pentekoste.

17 Paoli loyawele Mileto nakalajiza usenga kwa wasekulu wa chilundo cha wanhu walingumkunda Kilistu wa ako Efeso leka weting'hane na heye. 18 Lowafichile nakawalonjela, "Mwanguvizela londikale na hemwe kulawila zuwa lya mwaluko lofichile hano Asiya. 19 Nandimkolela mijito Mkulu kwa kunyenyetela kweng'ha na mahozi kuno ndikwimilila magazo na kulemigwa kuwele nakufika heni kwa kiwhana na wihe wa Wayahudi. 20 Mwanguvizela kota sidumbile kuwadamlila hazelu na kuli ng'handa za hemwe na kuwalangusa choneche chila chiwele chahawatanze hemwe. 21 Nandiwakanya Wayahudi na Wagilichi kota yanguwagana wamgalamchile Nguluwi kwa kulonga gehile ga hewo na kumkunda Mkulu wa hetwe Yesu Kilistu. 22 Lelo, muhulichize! Ndangumhulichiza Muhe, ndanguluta Yelusalemu ne kuvizela kota chondawila choni ako. 23 Ndanguvizela kota Muhe Yelile nakandonjela kuli chila honhu kota chinweng'ho na magazo ndo vilingubeteza. 24 Ila hambe ndiwone ukomu wa heni kota ndo chinhu ng'hatu, ila sinde wula utumagwa wa heni na jila mijito joyamhele Mkulu Yesu ndijikole, jiwele ndo kudamla Mbuli Inojile ya isungu lya Nguluwi.

25 "Nang'hola hali hemwe weng'ha kuno ndidamla mbuli ya Undewa wa Nguluwi. Lelo ndanguvizela kota haduhu ne yumwe wa hemwe yawele kombona kahi. 26 Ndikomya, lelo ndanguwalonjela, wone yajilile munhu hali hemwe, ndahela nongwa. 27 Kwa vila silechile kuwadamlila igano lyeng'ha lya Nguluwi. 28 Milolele mwemwe na mchilolele chila chilundo cha wanhu chiwele Muhe Yelile nakawawika hemwe muwe walolezi wake. Mchidime chilundo cha wanhu walingumkunda Kilistu chiwele Nguluwi nakachigula kwa danda ya mwanage. 29 Ndanguvizela kota hala londikuka, mibwa ja kisolo jing'hang'hale jokuya hali hemwe, hajiwa na isungu kwa chilundo acho. 30 Mbaka hali hemwe kowa na wanhu wawele wolonga mbuli za udesi leka kuwajiliza wanhu na kuwadita wawawinze hewo hela. 31 Ahyo, milolele kuno mkumbuchila kota kwa mhela wa miyaka jidatu, nechilo na nemisi, silechile kumkanya chila yumwe wa hemwe kwa mahozi.

32 "Lelo ndanguwawika hemwe hali wamizi wa Nguluwi na usenga wa isungu lya heye. Heye kana ludali lwa kuwawika goya na kuwadita mpate wula utambichizo uwele nakawawichila wanhu wa heye. 33 Siganile sendi ne zahabu ne mivalo ja munhu yoneche. 34 Mwanguvizela kota nang'hola mijito kwa moko gangu leka mhate vinhu vyondilinguganigwa kupegwa na vinhu vyowalinguganigwa kupegwa wayangu. 35 Kuli chila mbuli nandiwakanya kota kwa nzila ayi ya kukola mijito ng'hatu yangutugana kuwatanza ng'hochele kuno mkumbuchila ulonzi wa Mkulu Yesu woyatulonjele, ‘Fola kulavya kusinda kubochela.’ "

36 Loyalonjile ago, Paoli nakafugama hamwe na hewo weng'ha, nakamlanda Nguluwi. 37 Weng'ha nawalila, nawamlaga kwa kumkumbatila na kumnonela. 38 Mbuli iwele naiwadita wesinze ng'hatu nayali ndo ulonzi woyalonjile kota hawomona kahi. Lelo nawamhilika mbaka kuli meli.