1 Lotilajile na hewo, natukwina meli na kuluta mbaka Kosi. Mitondo yake natufika Lode na kulawa ako natuluta Patala. 2 Ako, natuifika meli ilinguluta Foinike, natukwina. 3 Lotuchiwene chihilwa cha Kupulo, natukola ubanzi wa kusini natuluta mbaka Siliya. Meli nayima kuli muji wa Tilo, aho meli nayali inenula mhomolo yoipichile. 4 Ako natuwafika wanhu walingumkunda Kilistu, natikala na hewo kwa mhela wa mazuwa saba. Walanguswa awo nawalongozwa na Muhe Yelile, nawamlonjela Paoli yaleche kuluta Yelusalemu. 5 Ila mhela wa hetwe loumalile natuka. Wala walanguswa hamwe na wache wa hewo na wana wa hewo nawatuhilika mbaka hanze ha muji. Lotufichile mwhani, tweng'ha natufugama, natumlanda Nguluwi. 6 Hamba natilaga, hetwe natukwina meli, nawo nawahiluka haluga ha hewo.

7 Natulutilila na majendo kulawa Tilo natufika Tolemaisi, hala natuwalamsa wanhu walingumkunda Kilistu, natikala nawo kwa zuwa limwe. 8 Mitondo yake natuka natuluta Kaisaliya. Ako natuluta kaye kwa munhu yumwe yalingudamla Mbuli Inojile yalinguchemigwa Filipo. Heye nayali yumwe wa wala saba wawele nawahaguligwa, natikala kwa heye. 9 Filipo nayali na wahinza wane wohawanating'hana na walume, nawali wolavya uloli. 10 Lotikale ako mazuwa mado, nakoya mloli yumwe yalinguchemigwa Agabo kulawa Yudeya. 11 Loyafichile kwa hetwe nakahola msipi wa Paoli, nakewoha kuli moko na magulu, nakalonga, "Muhe Yelile kangulonga hino, ‘Wayahudi wa kula Yelusalemu womuwoha hino munhu yawele na msipi awu na kumuwika kuli moko ga wanhu wa isi.’ "

12 Lotuhuliche ulonzi awo, hetwe na wala wanhu wanji wawele aho natumdedeza Paoli yaleche kuluta Yelusalemu. 13 Ila Paoli nakedichila, "Lekachoni mwangulila na kudita nhumbula ya heni itweguche? Ndagoya haiwele kuwichigwa mchinweng'ho hela mbaka kukopoligwa ako Yelusalemu kwa chiwalo cha itagwa lya Mkulu Yesu." 14 Lotulemwele kumdedeza natuleka kumdedeza, natulonga, "Lyoyalingugana Mkulu likoleche!"

15 Lotikale hala kwa mhela udo, natuhola vinhu vya hetwe na kuluta Yelusalemu. 16 Walanguswa wamwe kulawa Kaisaliya nawaluta hamwe na hetwe na kutuhilika kaye kwa Mnasoni yawele natwali tuluta kikala kwa heye. Mnasomi nayali mwenyeng'haye wa Kupulo, yumwe wa walanguswa wa katali.

17 Lotufichile Yelusalemu, wanhu walingumkunda Kilistu nawatubochela goya ng'hatu. 18 Mitondo yake Paoli nakaluta hamwe na hetwe kumlamsa Yakubu, wasekulu weng'ha wa chilundo cha wanhu walingumkunda Kilistu wali baho. 19 Loyawalamse, Paoli nakawalonjela mbuli zeng'ha ziwele Nguluwi nayali yaziditile hali wanhu wa isi zinji kwa kukolela chitumagwa wa heye. 20 Lowahuliche ago, nawamtogola Nguluwi. Hamba wamlonjela Paoli "Kalumbu, kwangona vyokuwele na maelufu ga Wayahudi wawele nawakunda na weng'ha wanguwinza malajizo ga Musa. 21 Ila nawalonjelwa mbuli za hegwe kota kwanguwalangusa Wayahudi weng'ha walingikala hali wanhu isi zinji kumlema Musa na kota kwanguwalonjela waleche kuwenjiza ikumbi wana wa hewo ne kuwinza vihendo vya hetwe. 22 Lelo mbuli zowa ndaze? Yangoneka wovizela kota hegwe mina kufika aha. 23 Lelo udite kota vyotulingukulonjela. Wabaha wanhu wane wawele nawelaha kuwala chinhu kwa Nguluwi. 24 Wilumbe na hewo kuli kulanda kwa kiyeliza hamwe na hewo na ulavye sendi leka wakang'hane mnvili za hewo. Kwa nzila ayi wanhu weng'ha wovizela kota mbuli zowahuliche kuwala hegwe haziwele za kukomya na kota hegwe kwangugawinza malajizo ga Musa. 25 Ila kuwala wala wanhu wa isi zinji wawele nawakunda, natuwahilichila baluwa kuwalonjela mbuli zotwamule kota waleche kulya chilyo chiwele nachilavigwa nhambiko kwa jimalukolo na waleche kunwa danda na waleche kulya miwunde ja igongolo liwele halidumuligwe singo na waleche ung'hondwa."

26 Mitondo yake Paoli nakawahola wala wanhu, nawamlanda Nguluwi kwa kiyeliza. Hamba nakenjila kuli ng'handa ya Nguluwi kuwalonjela kuwala kuduma kwa mazuwa ga kiyeliza na kuwala nhambiko iwele yolavigwa kwa chiwalo cha chila yumwe wa hewo.

27 Mazuwa ago saba logawele habehi kumala, Wayahudi wawele nawalawa kuli mkowa wa Asiya nawamona Paoli kuli ng'handa ya Nguluwi. Lelo nawambuza ivuche kwa chilundo cheng'ha cha wanhu weng'ha, nawo nawamibata. 28 Nawatowa iyowe wolonga, "Wanhu wa Isilaeli, mtutanze! Ayu ndo yula munhu yalinguwalangusa wanhu chila honhu mbuli za kitwanza na wanhu wa Isilaeli na kubeza malajizo ga Musa na honhu aha helile. Mzidi wa ago nakawenjiza Wagilichi kuli ng'handa ya Nguluwi na kuhadita hawe hakokomoche honhu hano helile." 29 Nawalonga ahyo kwa vila nawamona Tilofimo, mwenyeng'haye wa Efeso, yawele kuli muji hamwe na Paoli, nawejesa kota Paoli nakamwinjiza kuli ng'handa ya Nguluwi.

30 Muji weng'ha nawenela ivuche, wanhu nawoya kulawa banzi zeng'ha, nawamibata Paoli, nawambulunha, nawamlavya hanze ha ng'handa ya Nguluwi na kuhinda lwizi ja ng'handa ya Nguluwi. 31 Nawali goya kumkopola Paoli, mbuli nazimfichila chilongozi mkulu wa wamizi wa Loma kota muji weng'ha wa Yelusalemu nawenela ivuche. 32 Baho du yula chilongozi mkulu wa wamizi nakawahola vilongozi wanji wa wamizi hamwe na wamizi, nawabilima kuluta kuli ivuche. Wala wanhu wawele nawali wodita ivuche lowamuwene yula chilongozi mkulu wa wamizi hamwe na wamizi wanguya nawaleka kumtowa Paoli. 33 Yula chilongozi mkulu nakamibata Paoli, nakulonga yawopigwe minyololo mili. Hamba nakawauza, "Ndo munhu wachi ayu na nakadita choni?" 34 Wamwe kuli chila chilundo cha wanhu nawatowa iyowe wolonga hino na wanji wolonga hila. Yula chilongozi loyawene kota howeza kuvizela goya kota Paoli nakadita choni kwa chiwalo cha iyowe lya wanhu, nakawalonjela wamizi wamhiliche Paoli kuli ngome ya wamizi. 35 Paoli loyafichile kuli vikwinilo, wamizi naiwagana kumpapa kwa vila nahali na ivuche likulu lya wanhu. 36 Kwa vila lung'hongola lwa wanhu nalwali lumuwinza kuno lulutilila kulonga kwa kuyowa, "Mumkopole!"

37 Lowawele womwinjiza mgati mwa ngome, Paoli nakamlanda chilongozi mkulu wa wamizi yolonga, "Ndoweza kukulonjela chinhu?" Yula chilongozi mkulu wa wamizi nakamwidichila, "Kwanguvizela kulonga kwa Chigilichi? 38 Hegwe huwele yula Mmisili yawele kuli mazuwa aga ga habehi nakagana kubelenhuka kwa kulongoza wehile elufu zine wawele na vinhu vya kitowela ngondo kula kugunuche?" 39 Paoli nakedichila, "Heni nda Myahudi, namhondigwa Talso ako Kilikiya, mwenyeng'haye wa muji ulinguzeleka. Dedede, ng'hundize ndidawale na wanhu wano." 40 Yula chilongozi mkulu wa wamizi nakamkundiza. Ahyo Paoli nakema mchanya mwa chikwinilo, nakawagololela moko wala wanhu leka wenyamalile, lowenyamalile, nakaluka kulongasa na hewo kwa ndonga ya Chiebulaniya.