1 Logapulute ago, Paoli nakoka Asene, nakuluta Kolinto. 2 Ako Kolinto, nakamfika Myahudi yalinguchemigwa Akula, mlelwa wa Ponto. Akula hamwe na mche wa heye yalinguchemigwa Pilisikila, nawali wahiluche kulawa Italiya kuli mazuwa gagala kwa vila Kaizali Klaudiyo nayali yawalonjele Wayahudi weng'ha woche Loma. Paoli nakaluta kuwalola, 3 kwa vila nawali wawanzi wa kuhona mahema kota heye, Paoli nakekala na kukola mijito hamwe na hewo. 4 Chila Zuwa lya Kwesela nayali yolongasa kuli sunagogi yojeza kuwadita Wayahudi na Wagilichi welumbe na heye.

5 Sila na Timoteyi lowafichile kulawa Makedoniya, nawamfika Paoli yotumiya mhela wa heye weng'ha kudamla na kuwalonjela Wayahudi kota Yesu ndo Kilistu. 6 Lowamtowile na kwaluka kumliga, nakakung'huna mivalo ja heye hali hewo yolonga, "Wone mwokwajilila mane mwemwe, heni ndahela nongwa yoneche kuwala mbuli ayo. Kulawila sambi ndanguluta kwa wanhu wa isi zinji." 7 Hamba nakoka aho nakaluta kikala kuli ng'handa ya munhu yumwe yalingumdumba Nguluwi yalinguchemigwa Tito Yusto, yawele ng'handa ya heye nayali habehi na lila sunagogi. 8 Chilongozi wa lila sunagogi yalinguchemigwa Kilisipo, nakamkunda Mkulu, heye hamwe na wanhu weng'ha wa ng'handa ya heye. Wakolinto wenji nawauhulichiza usenga awo, nawakunda na kubatizigwa.

9 Zuwa limwe nechilo, Mkulu nakamlonjela Paoli kuli ulotezi, "Uleche kudumba, ulutilile kudamla ne kutweguka nhumbula, 10 kwa vila nda hamwe na hegwe. Haduhu munhu yawele yojeza kukulumiza kwa vila kuli muji awu hana wanhu wenji wawele ndo wanhu wa heni." 11 Lelo, Paoli nekekala ako kwa mhela wa mwaka umwe ana nusu, yolangusa ulonzi wa Nguluwi.

12 Mhela Galio loyawele chilongozi wa mkowa wa Akaya, Wayahudi nawamvaba Paoli na kumigala kuli chitala. 13 Nawalonga, "Twangumlonjeleza munhu ayu kwa chiwalo cha kuwadita wanhu wamdumbe Nguluwi vila vyohaiganigwe na malajizo ga Musa." 14 Kung'hali Paoli hanakwaluka kulonga, Galio nakawalonjela Wayahudi, "Mhulichize hemwe Wayahudi! Wone mkomya mbuli ayi yahawele kuwala kuwifya ama wihe ndahawele goya kuwahulichiza. 15 Ila kwa vila yanguwala ulonzi na matagwa na malajizo ga hemwe, mwamule mwemwe. Hambe ngane kuwa mtagusa wa mbuli azo!" 16 Lelo, nakawawinga kuli chitala. 17 Aho ndo nawamibata Sostene yawele ndo chilongozi wa sunagogi, nawamtowa hali chitala. Ila Galio nahajesile mbuli ayo ne hado.

18 Paoli nakekala na awo wanhu walingumkunda Kilistu ako Kolinto kwa Mazuwa menji. Hamba nakawalaga, nakakwina meli kuluta Siliya hamwe na Pilisikila na Akula. Lowafichile Kenikilea, nakabeya mnvili za heye za kumutwi kwa vila nayali yawichile chilaho. 19 Nawafika Efeso, Paoli nakawaleka Pilisikila na Akula, nakaluta kuli sunagogi, nakalongasa na Wayahudi. 20 Nawamlanda yekale na hewo kwa mhela wa mazuwa menji ila nakalema. 21 Ila loyawele yokuka, nakalonga, "Ndohiluka wone Nguluwi yagane." Hamba nakoka Efeso kwa meli.

22 Meli nayima Kaisaliya, naye Paoli nakaluta Yelusalemu kuchilamsa chilundo cha wanhu walingumkunda Kilistu, hamba nakaluta Antiokiya. 23 Loyekale ako kwa mhela uchefu, hamba nakalutilila na majendo kwa kukolela honhu ha Galatiya na Fulugiya kuno yowakangaza nhumbula walanguswa weng'ha.

24 Myahudi yumwe yalinguchemigwa Apolo, mlelwa wa Alekizandilia, nakafika Efeso. Nayali munhu yalinguvizela kulonga goya na yalingugazela goya Maandiko Matakatifu. 25 Nayali yalanguswe kuwala nzila ya Mkulu na nayali yolutilila kwa kugana, nakalangusa goya kuwala Yesu, hanga nakauzela ubatizo wa Yohani hela. 26 Pilisikila na Akula lowamhuliche vila vyolonga goya kuli sunagogi, nawamhola na kumlangusa goya nzila ya Nguluwi. 27 Apolo loyaganile kuluta Akaya, wala wanhu wawele nawamkumkunda Kilistu nawamkangaza nhumbula kwa kwandika baluwa kwa walanguswa wa kula Akaya kota wambochele. Loyafichile ako nakawatanza ng'hatu wala wawele nawakunda kwa igano lya Nguluwi, 28 kwa vila nakalutililila kuwasumya Wayahudi hazelu kuno yotawiza kwa Maandiko Matakatifu kota Yesu ndo Kilistu.