1 Hamba mndewa Agilipa nakamlonjela Paoli, "Kwangukundizwa kilewela." Aho Paoli nakagolola moko wa heye nakelewela hino, 2 "Mndewa Agilipa, ndangiwona kota nhambichizwa kwa kilewela hali hegwe kuwala ulonjelezi weng'ha uwele Wayahudi nawali walonjile kuwala heni. 3 Kwa vila hegwe kwanguvizela vihendo vya Wayahudi na kitwanza kwa hewo, ndangulanda unyhulichize kwa kwimilila.

4 "Wayahudi weng'ha wanguvizela kikala kwa heni kulawila kuli uwana wa heni, ndaze vyondikale kulawila mwaluko kuli kikala kwa heni kuli isi ya heni na ako Yelusalemu. 5 Wangunzela kwa mhela winji na wanguweza kulonga wone wogana, kota kulawila mwaluko nandikala kota yumwe wa chilundo cha walinguikunda ng'hatu nzila ya hetwe ya kufugamila, mina ndo chilundo cha Mafalisayo. 6 Sambi nda hano nhagusigwe kwa chiwalo ndangitumbila lila ilagano liwele Nguluwi nakalagana na wasekulu wa hetwe. 7 Ali ndo ilagano liwele nhanzi kumi na mbili za isi ya hetwe zangugana kulyona likwenela hozimkolela mijito Nguluwi kwa nhumbula yeng'ha nemisi na nechilo. Mng'hangala mndewa, Wayahudi wangundonjeleza kwa chiwalo cha kitumbila ako! 8 Lekachoni hemwe mwangona itunyo ng'hatu kukunda kota Nguluwi kanguwazilipula wabagame? 9 Ndikomya, nani nang'hunda kota nanganigwa kudita mbuli nyinji leka kulilema itagwa lya Yesu wa Nasaleti. 10 Mbuli azo ndo zondiziditile ako Yelusalemu. Kwa ludali lwa watambika wakulu watambika wakulu, nandiwawika mchinweng'ho wanhu wenji hali welile. Lowatagusigwe kubagama nang'hunda mbuli ayo. 11 Mala nyinji nandiwadita wagazigwe kuli masunagogi geng'ha kuno ndiwadita waileme nzila ya hewo ya kufugamila. Ng'halazi ya heni kwa hewo nayali ng'hulu mbaka nandiwapala kuli miji ja kutali.

12 "Lelo, kuli mijito ajo londiwele ndiluta Damasiko kuno mbele na ludali kulawa kwa watambika wakulu. 13 Lombele mnzila mhela wa nemisi, nambona lumuli lukulu kusinda lumuli lwa isanya, nalulangaza kulawa kilanga, nalunzunguluta heni hamwe na wala wawele mmajendo na heni. 14 Tweng'ha natugwa hasi, nani nanyhulika lizi lindonjela kwa Chieblaniya, ‘Saulo, Saulo! Lekachoni kwangungaza? Kwangilumiza hihi hela kota isenga lilingutowa teche ng'hweku ya mkulu wa heye.’ 15 Heni nambuza, ‘Kwa whaani hegwe Mkulu?’ Naye Mkulu nakedichila, ‘Heni nda Yesu yawele hegwe ulingumgaza. 16 Winuche lelo, wime. Nandikulawila leka ndikudite uwe chitumagwa na mlolezi wa heni. Kotawiza kwa wanhu wanji mbuli zouzonile lehano na zila zondikulajila. 17 Ndokulohola kwa wanhu wa Isilaeli na wanhu wa isi zinji wawele nandikulajiza kwa hewo. 18 Kogubula meho ga hewo na kuwadita walawe kuli jiza na kwinjila kuli lumuli, walawe kuli ulongozi wa Limazoga, wamgalamchile Nguluwi, leka kwa kukunda, woselwe gehile na kuhola honhu ha hewo hali wala wanhu wahaguligwe Nguluwi.’

19 "Mndewa Agilipa, siwezile kuwa mjuvi kwa ulajilo awo wa kilanga. 20 Ila nanyaluka kudamla kwa wanhu wa Damasiko, hamba kwa wala wa Yelusalemu na isi yeng'ha ya Yudeya, kahi na wanhu wa isi zinji. Nandiwalonjela wamgalamchila Nguluwi na kulajila kwa madito kota nhumbula za hewo nazigaluka. 21 Kwa chiwalo acho, Wayahudi newembata lombele kuli ng'handa ya Nguluwi, nawajeza kung'hopola. 22 Ila Nguluwi nakanhanza, ahyo mbaka lehano nanyima nzinzili kuno ndilavya ulolezi kwa weng'ha, wakulu na wadodo. Gondilingulonga ndo gala waloli na Musa nawalonga kota golawila, 23 Nawalonga kota naigana Kilistu yagaziche na yawe wa mwaluko kuzilipuka kulawa kwa wabagame, leka yawikule kota lumuli lwa ulohozi lwanguwalangazila wanhu weng'ha, Wayahudi kahi na wanhu wa isi zeng'ha."

24 Paoli loyawele yelewele kwa kulonga ago, Festo nakalonga kwa lizi likulu, "Paoli! Kuna lukwale! Kusoma lukami kwa hegwe kwangukudita uwe na lukwale!" 25 Ila Paoli nakalonga, "Mndewa Festo, ndahela lukwale chondilingulonga ndo kukomya ng'hatu. 26 Hegwe mndewa Agilipa kwanguzizela mbuli azi, ahyo ndanguweza kulonga ne kudumba hali hegwe. Ndahela majesa kwa vila mbuli azi zanguzeleka kwa hegwe kwa vila hazikoleche chinyele. 27 Mndewa Agilipa, ndaze, kuna makundo na waloli? Ndanguvizela kota kwangukunda." 28 Mndewa Agilipa nakamlonjela Paoli "Ndaze, kwangundita ndimkunde Kilistu himahima hino!" 29 Paoli nakedichila, "Ndangumlanda Nguluwi kota, kwa mhela udo ama winji, haiwele hegwe hela ila weng'ha walingunyhulika lehano wawe kota heni, ila ne minyololo."

30 Aho mndewa Agilipa na chilongozi wa mkowa na Belinike na wala weng'ha wawele wekalise hamwe na hewo nawema. 31 Lowawele wokuka nawalongasa, "Munhu ayu haditile choneche chilingumuwala kubagama ama chinweng'ho." 32 Mndewa Agilipa nakamlonjela Festo, "Munhu ayu yahalechigwe yelejehe wone yahalechile kulanda nongwa ya heye ihulichizwe na Kaizali mndewa mkulu wa Loma."