1 Wana walume wa Yuda nawali Pelesi na Hesiloni na Kalimi na Huli na Shobali. 2 Shobali nayali na mwana mlume yawele nayali yochemigwa Leaya. Leaya nayali na mwana mlume yawele nayali yochemigwa Yahati, naye Yahati nayali na wana walume wawele ndo Ahumayi na Lahadi. Alo nalwali ndo lukolo lwa Wasolati.

3 Wana walume wa Etamu nawali ndo Yesileeli na Ishima na Idibashi. Wana awo nawali na lumbulyao yawele nayali yochemigwa Haseleponi. 4 Penueli nayali na mwana mlume yawele nayali yochemigwa Gedoli. Eseli nayali na mwana mlume yawele nayali yochemigwa Husha. Awo nawali ndo walelwa wa Huli, mlelwa wa mwaluko wa Efulata na Kalebu, yawele ndo chaluchizo cha muji wa Betelehemu.

5 Ashuli, yawele ndo chaluchizo cha muji wa Tekowa, nayali na wache weli wawele ndo Hela na Naala. 6 Naala nakaponda wana walume wane wawele ndo Ahusamu na Hefeli na Temeni na Haahashitali. 7 Hela nayali na wana walume wane wawele ndo Seleti na Sohali na Etinani na Kosi. 8 Kosi nayali na wana walume weli wawele ndo Anubi na Sobeba, kahi nayali ndo sekulu wa ivyazi lyeng'ha lya Ahaliheli, mwana wa Halumu.

9 Nakwali na munhu yalinguchemigwa Yabesi, yawele nayali yatogoligwe kusinda wang'holoze weng'ha. Mayake nakamha itagwa lya Yabesi kwa vila nakamponda kwa usungu ng'hatu. 10 Yabesi nakamlanda Nguluwi wa Isilaeli yolonga, "Gwa Nguluwi, ndangukudedeza unhambichize na konjeza mbaka ja isi yondilingikala. Moko wa hegwe uwe hamwe na heni na unyamile kwa mbuli yoneche ya usungu leka ndeche kulumizwa." Nguluwi nakamha goyalandile.

11 Kelubu mng'holoze Shuha, nayali na mwana mlume yawele nayali yochemigwa Mehili, naye Mehili nayali na mwana mlume yawele nayali yochemigwa Eshitoni. 12 Eshitoni nayali na wana walume wadatu, wawele ndo Beti-lafa na Paseya na Tehina. Tehina nayali sekulu wa muji wa Nahashi. Awa ndo walelwa wawele nawali wochikala kuli muji wa Leka.

13 Wana walume wa Kenasi nawali ndo Otinieli na Selaya. Wana walume wa Otinieli nawali ndo Hatati na Meonatayi. 14 Meonatayi nayali na mwana mlume yawele nayali yochemigwa Ofula. Selaya nayali na mwana mlume yawele nayali yochemigwa Yoabu, kahi nayali ndo sekulu wa wawanzi walingikala kuli ibindi lilinguchemigwa Ge-halashimu*.

15 Kalebu, mwana mlume wa Yefune, nayali na wana walume wadatu wawele ndo Ilu na Ela na Naamu. Mwana mlume wa Ela nayali yochemigwa Kenasi. 16 Wana walume wa Yehaleleli nawali ndo Sifu na Sifa na Tiliya na Asaleli. 17 Esila nayali na wana walume wane wawele ndo Yeteli na Meledi na Efeli na Yaloni. Meledi nakamhesa Bitiya, mhinza wa Falao, yawele nakampondela wana wadatu. Wana awo ndo Miliamu na Shamayi na Ishiba. Ishiba nayali ndo chaluchizo cha muji wa Eshitemoa. 18 Meledi nayali na mche yunji kulawa kuli nhanzi ya Yuda, yawele nakawaponda Yeledi na Hebeli na Yekutieli. Yeledi ndo yawele nayali mhaza wa Gedoli. Hebeli ndo yawele nayali mhaza wa Soko. Yekutieli ndo yawele nayali mhaza wa Sanowa.

19 Nakwali na munhu yalinguchemigwa Hodiya, yawele nakamhesa lumbulye Nahamu. Lulelo lwa Hodiya ndo Keila, yawele ndo mhaza wa lukolo lwa Wagalimi, na Eshitemoa, yawele ndo mhaza wa lukolo lwa Wamaakati.

20 Walelwa walume wa Shimoni nawali ndo Amunoni na Lina na Beni-hanani na Tiloni. Ishi nayali na wana walume weli wawele ndo Soheti na Beni-soheti.

21,22 Shela nayali yumwe wa wana walume wa Yuda. Shela nayali na walelwa wawele ndo Eli na Laada na Yokimu na wanhu wawele nawekala kuli muji wa Koseba na Yoashi na Salafi. Eli nayali ndo chaluchizo cha muji wa Leka. Laada nayali ndo chaluchizo cha muji wa Malesha, yawele ndo lukolo lwa wakola mijito ja kutawa nguwo za kitani inojile, wawele nawali wochikala kuli muji wa Beti-ashibeya. Yoashi na Salafi, wawele nawalongoza ako Moabu, wawele hamba nawahiluka Lehemu. Mbuli azi ndo za katali ng'hatu. 23 Awa nawali ndo walingulumba vinhu vya ilongo wawele nawali wochikala kuli muji wa Netaimu na muji wa Gedela, kahi nawali ndo vitumagwa wa mndewa.

24 Simeoni nayali na wana walume wahano wawele ndo Nemueli na Yamini na Yalibu na Sela na Sauli. 25 Mwana mlume wa Sauli nayali yochemigwa Shalumu, naye Shalumu nayali na mwana mlume yawele nayali yochemigwa Mibisamu, naye Mibisamu nayali na mwana mlume yawele nayali yochemigwa Mishima. 26 Mishima nayali na mwana mlume yawele nayali yochemigwa Hamueli, naye Hamueli nayali na mwana mlume yawele nayali yochemigwa Sakuli, naye Sakuli nayali na mwana mlume yawele nayali yochemigwa Shimeyi. 27 Shimeyi nayali na wana walume kumi na sita na wahinza sita, ila wang'holoze hawawele na wana wenji na ng'holo zawo kahi hazonjezeche kota nhanzi ya Yuda.

28 Nawali wochikala kuli miji jilinguchemigwa Beeli-sheba na Molada na Hasali-shuali 29 na Biliha na Esemu na Toladi 30 na Betueli na Holima na Sikilagi 31 na Beti-malikaboti na Hasali-susimu na Beti-bili na Shaalaimu. Aji najali miji ja hewo mbaka kuli mhela wa ulongozi wa mndewa Daudi. 32 Kahi, nawekala kuli miji jinji jihano jiwele ndo Etamu na Aini na Limoni na Tokeni na Ashani, 33 hamwe na vijiji vya hafungo mwa miji ajo ako Baali. Aho nahali ndo haluga ha hewo, nawo nawawika kukumbuchila kuwala ng'holo zawo.

34 Wanhu wawele nawali wakulu wa ng'holo zawo nawali ndo Meshobabu na Yamuleki na Yosha, mwana wa Amasiya 35 na Yoeli na Yehu, mwana wa Yoshibiya, mwana wa Selaya, mwana wa Asieli. 36 Kahi nakwali na wakulu wa ng'holo wawele ndo Elionayi na Yaakoba na Yeshohaya na Asaya na Adieli na Yesimieli na Benaya 37 na Sisa, mwana wa Shifi, mwana wa Aluni, mwana wa Yedaya, mwana wa Shimuli, mwana wa Shemaya. 38 Wanhu awa wandichigwe matagwa gawo aho hachanya nawali ndo vilongozi wa ng'holo zawo. Ivyazi lyawo nalonjezeka ng'hatu. 39 Nawenela mbaka habehi na muji wa Gedoli, ubanzi wa kolilawilaga isanya mwa ibindi, wopala honhu ha kudimila kwa chiwalo cha ming'holo ja hewo. 40 Aho, nawali na honhu hakulu na hawele goya kudimila ming'holo na isi nayali na honhu ha kuhega iwele na kikala goya. Wamwe wa Wahamu nawekala ako katali.

41 Kuli mhela wa ulongozi wa Hesekiya, mndewa wa Yuda, wanhu wala wawele matagwa gawo nagandichigwa nawaluta kuli isi ayo. Nawawatowa Wahamu hali haluga hawo hamwe na Wameuni, wawele nawali ako, nawawasumya ng'hatu, kulawa mhela awo. Hamba nawekala ako kwa vila nakwali na honhu hanojile ha kudimila ming'holo ja hewo. 42 Wanhu wa nhanzi ya Simeoni wafichile miya zihano, wawele nawali wolongozwa na Pelatiya na Nealiya na Lefaya na Usieli, wawele ndo wana walume wa Ishi, nawaivaba isi ya vidunda vya Seili. 43 Nawawakopola Waamaleki wasigale, nawo wang'hali wangikala ako kulawa mhela awo.