1 Daudi nakawatowa na kuwasumya Wafilisti. Nakauhola muji wa Gati kulawa mmoko mwa Wafilisti. 2 Nakawasumya kahi Wamoabu, nawo Wamoabu nawali vitumagwa wa heye na nawali womigalila kodi.

3 Daudi kahi nakamsumya Hadadeseli, mndewa wa Soba wa isi iwele habehi na muji wa Hamati, nakadita ahyo mhela Hadadeseli loyalutile kujeza kwimiza ludali lwa undewa wa heye kuli lwanda lwa Eyufulate. 4 Daudi nakahola mituka ja ngondo elufu imwe (1,000) na wamizi wakwina falasi elufu saba (7,000) na wamizi walingujenda kwa magulu elufu makumi meli (20,000). Daudi kahi nakawabagula falasi wa mituka miya imwe (100) kwa chiwalo cha heye, hamba nakawatema midanha ja magulu ga kumbele ja falasi weng'ha wa mituka wasigale.

5 Nawo Waalamu wa muji wa Damasiko lowalutile kumtanza Hadadeseli, mndewa wa Soba, Daudi nakawatowa na kuwakopola wamizi elufu makumi meli na mbili (22,000) hali hewo. 6 Hamba Daudi nakawika wamizi kuli undewa wa Waalamu kuli muji wa Damasiko. Lelo, Waalamu nawali vitumagwa wa mndewa Daudi, ahyo nawali womha kodi. Mkulu Nguluwi nakamha Daudi mong'ho wa kusumya kweng'ha koyalutile kitowa. 7 Kahi Daudi nakazihola ngawo za zahabu ziwele nazali za vilongozi wa wamizi wa Hadadeseli na kuzihilika Yelusalemu. 8 Kahi Daudi nakahola shaba nyinji lukami kulawa kuli muji wa Tibuhati na kuli muji wa Kuni, miji jiwele najali ja Hadadeseli. Shaba ayo Solomoni nakaigongomanyila ibiga lya shaba na mizengo ja shaba na vinhu viyage vya shaba kwa chiwalo cha ng'handa ya Nguluwi.

9 Towu, mndewa wa Hamati loyahuliche kota Daudi nakawasumya wamizi weng'ha wa Hadadeseli, mndewa wa Soba, 10 nakamlajiza mwanage yalinguchemigwa Hadolamu kwa mndewa Daudi, leka yamlamse na kumtogola kwa kumsumya mndewa Hadadeseli kuli ngondo kwa vila Hadadeseli nayali yetowile ngondo na Towu mala nyinji. Hadolamu nakamhilichila Daudi vinhu vya zahabu na sendi na shaba. 11 Mndewa Daudi nakaviwika vinhu avyo viwe vya chiuyeng'ha kwa chiwalo cha kumfugamila Mkulu Nguluwi hamwe na sendi na zahabu ziwele nakazihola kulawa kuli isi za Edomu na Moabu na Amoni na Filistiya na Amaleki.

12 Abishayi, yawele mayake nayali yochemigwa Seluiya, nakawakopola Waedomu elufu kumi na nane (18,000) kuli Ibindi lya Mwino. 13 Lelo, nakawika kambi za wamizi ako Edomu. Waedomu weng'ha wa ako nawawa vitumagwa wa Daudi. Mkulu Nguluwi nakamha Daudi kusumya kweng'ha koyalutile.

14 Lelo, Daudi nakalongoza kuli Isilaeli yeng'ha, nakawaditila hachi wanhu wa heye weng'ha. 15 Yoabu, yawele mayake nayali yochemigwa Seluiya, nayali chilongozi mkulu wa wamizi na Yehoshafati, mwana wa Ahiludi, nayali yalingwandika kukumbuchila. 16 Sadoki, mwana wa Ahitubu na Ahimeleki, mwana wa Abiatali nawali watambika, Shausha nayali yalingwandika 17 na Benaya, mwana wa Yehoyada, nayali chilongozi wa Wakeleti na Wapeleti, nawo wana walume wa Daudi nawali wang'hangala kuli undewa wa Daudi.