1 Awa ndo wanhu wawele nawaluta kwa Daudi ako Sikilagi, mhela Daudi loyawele nakawinjigwa na Sauli, mwana wa Kishi. Wanhu awo nawali hali wala wazidahe wawele nawamtanza Daudi kuli ngondo. 2 Awo nawali wanhu wa nhanzi ya Benjamini kota vyoyawele Sauli. Nawali wazidahe ng'hatu kutumiya mipinde na misale na kutoza maganga kwa mhembeyo kwa moko geng'ha, gawele ndo wa kudilo ama wa kumoso. 3 Chilongozi wa hewo nayali Ahieseli yawele nakatanzigwa na Yoashi, awo weng'ha nawali wana wa Shemaa kulawa Gibeya. Wanji nawali ndo wana wa Asimaweti, wawele ndo Yesieli na Peleti. Wanji kahi ndo Belaka na Yehu, kulawa Anatoti 4 na Ishimaya, kulawa Gibeoni, yawele ndo yazidahe hali wala wamizi wazidahe makumi gadatu na kahi nayali ndo chilongozi wa hewo. Wanji nawali ndo Yelemiya na Yahasieli na Yohanani na Yosabadi, kulawa Gedela 5 na Elusayi na Yelemoti na Bealiya na Shemaliya na Shefatiya, kulawa Halufu 6 na wanhu kulawa kuli lukolo lwa Kola, wawele ndo Elikana na Ishiya na Asaleli na Yoeseli na Yashobeamu. 7 Wanji nawali ndo wana walume wa Yelohamu, kulawa Gedoli, wawele ndo Yoela na Sebadiya.

8 Wanhu wamwenga kulawa kuli nhanzi ya Gadi nawebagula na kilumba na Daudi kuli ngome ya heye ako kugunuche. Nawali wazidahe ng'hatu na wawele goya ng'hatu kwa ngondo na wazidahe kutumiya ngawo na igoha. Kumeho kwa hewo nakwali kwangukabusa kota kumeho kwa isimba na nawali wobilima kota ibala vyolilingubilima kuli chidunda. 9 Chilongozi mkulu wa hewo nayali Eseli, wa keli nayali Obadiya na wa kadatu nayali Eliabu 10 na wa kane nayali Mishimana na wa kahano nayali Yelemiya 11 na wa sita nayali Atayi na wa saba nayali Elieli 12 na wa nane nayali Yohanani na wa tisa nayali Elisabadi 13 na wa kumi nayali Yelemiya na wa kumi na imwe nayali Makibanayi.

14 Wagadi awo nawali wakulu wa chilundo cha wamizi. Kwa kiwhana na ukulu wa hewo kuli mijito, chilongozi wa hasi nayali yolongoza chilundo cha wamizi miya imwe (100) na chilongozi wa kuchanya nayali yolongoza wamizi elufu imwe (1,000). 15 Awa ndo wanhu wawele nawaloka lwanda lwa Yolodani kuli mwezi wa mwaluko, mhela lwanda loluwele lumemile ng'hatu mazi na kuwambuza wanhu wawele nawali wochikala kuli mibindi wabilimile kuluta kolilawilaga isanya na kolizinjilaga isanya.

16 Wamwe wa wanhu kulawa kuli nhanzi za Benjamini na Yuda kahi nawaluta kuli ngome ya Daudi. 17 Daudi nakalawa mgati, nakaluta kuwabochela na kuwalonjela, "Wone namuya kwa heni kwa kikala goya kota goloko wa heni leka mnhanze, ndanguwabochela kwa nhumbula imwe, ila wone namuya kwa heni leka kumbelenhuka heni kwa kilumba na wang'honyo wa heni, hanga siditile chinhu choneche chihile, Nguluwi wa wahaza wa hetwe yawone na yawataguse."

18 Ahyo Muhe nakamwinjila Amasayi, mkulu wa awo wanhu makumi gadatu naye nakalonga,

"Hetwe ndo wanhu wa hegwe, gwa Daudi,

twa kuli ubanzi wa hegwe, gwa mwana wa Yese!

Utambichizo, utambichizo uwe kwa hegwe,

na kwa yoneche yawele kuli ubanzi wa hegwe,

kwa vila Nguluwi kokutanza."

Hamba Daudi nakawabochela na kuwadita wawe vilongozi kuli vilundo vya wamizi wa heye.

19 Wanhu wamwenga kulawa kuli nhanzi ya Manase nawelumba na Daudi mhela loyalutile hamwe na Wafilisti kitowa na Sauli. Daudi na wanhu wa heye hawawatanzile Wafilisti, kwa vila vilongozi wa Wafilisti nawekundiza kumhilusa Daudi, nawalonga, "Towajiliza ukomu wa hetwe wone Daudi kotubelenhuka na kuhiluka kwa mkulu wa heye Sauli." 20 Lelo, Daudi loyawele Sikilagi, wanhu kulawa kuli nhanzi ya Manase, wawele ndo Adina na Yosabadi na Yediaeli na Mikaeli na Yosabadi na Elihu na Siletayi, nawaluta kwa heye. Chila yumwe wa wanhu awo nayali chilongozi wa chilundo cha wanhu elufu imwe (1,000) kuli nhanzi ayo ya Manase. 21 Nawamtanza mndewa Daudi kitowa na vilundo vya wamizi walinguvaba, kwa vila weng'ha nawali wamizi wazidahe ng'hatu na vilongozi wa wakulu wa wamizi kuli chilundo cha wamizi wa heye. 22 Chila zuwa wanhu nawaluta kilumba na Daudi, mbaka Daudi nakawa na chilundo chikulu ng'hatu cha wamizi kota chilundo cha wamizi wa Nguluwi.

23 Ayi ndo hisabu ya vilundo vya wamizi wawele na vinhu vya kitowela ngondo, wawele nawelumba na Daudi ako Hebuloni leka kuuhola undewa kulawa kwa Sauli, kwa kiwhana na ulonzi wa Mkulu Nguluwi. 24 Walume wa nhanzi ya Yuda wawele na migoha na ngawo nawali elufu sita na miya nane (6,800), weng'ha wawele wewichile goya kitowa ngondo. 25 Kulawa kuli nhanzi ya Simeoni nawali wanhu elufu saba na miya imwe (7,100) wazidahe na wawele na uwanzi ng'hatu kuli kitowa ngondo. 26 Kulawa kuli nhanzi ya Lawi nawali wanhu elufu zine na miya sita (4,600). 27 Yehoyada, yawele nayali chilongozi wa ivyazi lya Aluni, nayali hamwe na wanhu elufu zidatu na miya saba (3,700) 28 na Sadoki, msongolo yazidahe kitowa ngondo, nayali hamwe na vilongozi wa wamizi makumi meli na weli kulawa kuli lukolo lwa mhaza wa heye yuye. 29 Kulawa kuli nhanzi ya Benjamini, iwele ndo nhanzi ya Sauli, nawali wanhu elufu zidatu (3,000) wawele nawamuwinza Daudi, wenji wa hewo nawalutilila kitumbila kwa Sauli mbaka mhela awo. 30 Kulawa kuli nhanzi ya Efulaimu nawali wanhu elufu makumi meli na miya nane (20,800) wawele kahi nawelumba na Daudi. Wanhu awo nawali wazidahe ng'hatu kitowa ngondo na walinguzeleka kuli ng'holo zawo. 31 Kulawa kuli nusu ya nhanzi ya Manase, nawali wanhu elufu kumi na nane (18,000), wawele nawachemigwa kwa matagwa leka walute kumdita Daudi yawe mndewa. 32 Kulawa kuli nhanzi ya Isakali, vilongozi miya mbili (200) hamwe na wang'holozawo weng'ha wawele hali ulongozi wa hewo, nawo nawelumba na Daudi. Vilongozi awo nawali na uwanzi wa kuvizela mbuli za mihela na nawavizela chowalinguganigwa Waisilaeli kudita. 33 Kulawa kuli nhanzi ya Sebuluni, wamizi wazidahe ng'hatu wawele na vinhu vya hewo vya kitowela ngondo na wewichile goya kuvitumiya, leka kumtanza Daudi kwa kukundigwa ng'hatu, nawali elufu makumi gahano (50,000). 34 Kulawa kuli nhanzi ya Nafutali, wakulu wa wamizi elufu imwe (1,000) hamwe na wanhu elufu makumi gadatu na saba (37,000) wawele na ngawo na migoha, nawelumba na Daudi. 35 Kulawa kuli nhanzi ya Dani, wanhu elufu makumi meli na nane na miya sita (28,600) wewichile goya kitowa ngondo, nawo nawelumba na Daudi. 36 Kulawa kuli nhanzi ya Asheli, wanhu elufu makumi gane (40,000) wazidahe kitowa ngondo, wawele nawawichigwa goya kwa chiwalo cha kitowa ngondo, nawo kahi nawelumba na Daudi. 37 Kulawa kuli nhanzi ya Lubeni na Gadi na nusu ya nhanzi ya Manase ya kolilawilaga isanya mwa lwanda lwa Yolodani, nawali wanhu lachi imwe na makumi meli (120,000) wawele na vinhu vya hewo vya kitowela ngondo, wawele nawelumba na Daudi.

38 Wamizi awo weng'ha, wawele nawewika goya ng'hatu kwa kitowa ngondo, nawaluta ako Hebuloni wawele na kunuwila kwa kumuwika Daudi yawe mndewa wa Isilaeli yeng'ha. Nawo wanhu weng'ha wa Isilaeli kahi nawelumba wawele na kunuwila kumwe kwa kumdita Daudi yawe mndewa. 39 Lelo, nawekala na Daudi kwa mhela wa mazuwa gadatu, kuno wolya na kunwa kwa vila wang'holozawo nawawawichila vilyo. 40 Mzidi wa ago, walingikalasa habehi na hewo mbaka wala wa kutali kota ako Isakali na Sebuluni na Nafutali, nawawahilichila vilyo vipapigwe na midogowi na ngamiya na migongolo kota midogowi mikulu na misenga milume. Vilyo avyo navyali ndo utimbo na vilundo vya tini zikalile na vilundo vya zabibu zikalile na divai na mafuta na misenga na ming'holo minji. Ahyo nakwali na vilyo vinji ng'hatu, kwa vila nakwali na usangalalo kuli isi ya Isilaeli.