1 Limazoga nalyambuza magazo kwa Waisilaeli kwa kumhada Daudi yawawaze wanhu wa Isilaeli. 2 Ahyo Daudi nakamlonjela Yoabu na wala vilongozi wanji wa wamizi, "Mlute mkawawaze Waisilaeli kulawa Beeli-sheba mbaka Dani, hamba mndonjele hisabu ya hewo." 3 Yoabu nakalonga, "Mkulu Nguluwi yonjeze hisabu ya Waisilaeli mala miya kusinda vyowawele sambi! Mkulu wa heni mndewa, wanhu awa weng'ha hawawele vitumagwa wa hegwe? Lekachoni kwangugana kudita mbuli iwele yowagalila nongwa Waisilaeli?" 4 Ila mndewa hagalule majesa ga heye. Ahyo, Yoabu nakaluta chila honhu kuli isi yeng'ha ya Isilaeli hamba nakahiluka Yelusalemu. 5 Hamba Yoabu nakamha Daudi hisabu ya wamizi. Kuli Isilaeli yeng'ha nakwali na wanhu milioni imwe na lachi imwe (1,100,000) wawele wadahile kutumiya mipanga na kuli Yuda nakwali na wanhu lachi zine na elufu makumi saba (470,000), wawele kahi wadahile kutumiya mipanga. 6 Ila Yoabu hawawazile Walawi na Wabenjamini kwa vila ilajizo wa mndewa naumzudiza ng'hatu.

7 Mbuli ayo haimnojeze Nguluwi, ahyo, nakawatowa Waisilaeli. 8 Daudi nakamlonjela Nguluwi, "Nandita gehile ng'hatu kwa kudita mbuli ayi. Ahyo, ndangukudedeza wuse nongwa ya heni chitumagwa wa hegwe, kwa vila nandita mbuli ya chipoka ng'hatu."

9 Mkulu Nguluwi nakamlonjela Gadi, mloli wa mndewa Daudi, 10 "Ulute ukamlonjele Daudi hino, ‘Mkulu Nguluwi kangulonga ahi. Ndina mbuli zidatu kwa chiwalo cha hegwe, lelo wihagulile mbuli imwe, nani ndokuditila.’ " 11 Ahyo Gadi nakaluta kwa Daudi na kumlonjela, "Mkulu Nguluwi kangulonga hino, ‘Uhagule mbuli imwe hali azi. 12 Ndaze, lulawile lufemba lwa miyaka jidatu kuli isi ya hegwe ama myezi jidatu ja kuwabilima wang'honyo wa hegwe howokuwinza ama mazuwa gadatu ga utamwa wa tauni uwele Mkulu Nguluwi kougala kwa kukolela mhilisi, kuli isi yeng'ha ya Isilaeli?’ Lelo, wamule ndaze vyondimwidichila ayo yandajize." 13 Daudi nakamwidichila Gadi, "Nanyinjila kuli magazo makulu ng'hatu! Fola ngazigwe na Mkulu Nguluwi, kwa vila heye kana isungu ng'hatu, kusinda kugazigwa na wang'honyo." 14 Ahyo, Mkulu Nguluwi nakamlajiza mhilisi yawegalile Waisilaeli utamwa wa tauni, uwele nauwakopola Waisilaeli elufu makumi saba (70,000). 15 Mhilisi ayo loyagolole moko wa heye kulutila kuli muji wa Yelusalemu leka kuudumya, Mkulu Nguluwi nakagalula kunuwila kwa heye. Mkulu Nguluwi nakamlonjela yula mhilisi yawele yowadumya wanhu, "Ihega! Uhiluse moko wa hegwe." Mhilisi wa Mkulu Nguluwi nayali yemile habehi na honhu ha kupululila nyhule ha Alauna, Myebusi. 16 Daudi nakenula meho ga heye, nakamona mhilisi wa Mkulu Nguluwi yemile hagati ha kilanga na isi, yawele yagolole ipanga lya heye hali muji wa Yelusalemu, yawele goya kuudumya. Mhela awo Daudi na wasekulu weng'ha wawele nawali wavalile mivalo ja migunila kwa kulajila masinzo kwa chiwalo cha gehile ga hewo, nawagwa chifunama. 17 Daudi nakalanda, "Gwa Nguluwi, heni ndo nditile gehile. Heni ndo ndajize kuwazigwa kwa wanhu. Wanhu awa ndo waliholile, hawaditile wihe. Gwa Mkulu Nguluwi, Nguluwi wa heni, magazo ago goye kwa heni na kuli ivyazi lya heni, ila uleche kukunda utamwa awu ulutilile kuwa hali wanhu wa hegwe."

18 Hamba mhilisi ayo wa Mkulu Nguluwi nakamlajiza Gadi yamlonjele Daudi kota yalute kumzenjela Mkulu Nguluwi honhu ha kulavila nhambiko kuli luga lwa kupululila nyhule lwa Alauna, Myebusi. 19 Lelo Daudi nakalihulichiza ilajizo lya Mkulu Nguluwi, nakaluta ako kwa kuwinza ulonzi wa Nguluwi, woyaulonjile kwa kukolela Gadi. 20 Alauna na wanage walume wane nawali wopulula ngano, lowamonile yula mhilisi, wala wanage nawevisa, ila heye Alauna nakalutilila kupulula ngano. 21 Lelo Daudi loyawele habehi na Alauna, Alauna loyamonile Daudi, nakalawa kuli lula luga lwa kupululila nyhule, nakamfugamila Daudi na kinamiza kumeho kwa heye mbaka hasi. 22 Daudi nakamlonjela Alauna, "Nguzile honhu ha luga ha hegwe ha kupululila nyhule leka ndimzenjele Mkulu Nguluwi honhu ha kulavila nhambiko, leka utamwa wa tauni uleche kuwafika wanhu. Ndohagula honhu aho kwa chasi cha kuhega." 23 Alauna nakamlonjela Daudi, "Uhole luga alu mkulu wa heni mndewa na uhatumiye kota vyoulingugana. Ulole ndangujilavya mibuguma aji kwa chiwalo cha nhambiko za kulakazwa na vinhu vya kupululila nyhule kwa chiwalo cha ngodi, hamwe na ngano leka iwe nhambiko ya nyhule. Vyeng'ha avyo ndangukupa." 24 Mndewa Daudi nakamwidichila Alauna, "Hebu! Ndangukomya, ndolipa kwa chasi cha kuhega. Sihola chinhu cha hegwe choneche kwa chiwalo cha Mkulu Nguluwi ne kulavya nhambiko ya kulakazwa iwele heni silavile chinhu choneche." 25 Lelo Daudi nakamha Alauna migwala ja zahabu jiwele na kilo saba kwa chiwalo cha kuhagula honhu ha luga alo. 26 Hamba Daudi nakamzenjela Mkulu Nguluwi honhu ha kulavila nhambiko hali honhu aho na kumlavila nhambiko za kulakazwa na nhambiko za kikala goya. Nakamlanda Mkulu Nguluwi, naye nakedichila kulanda kwa heye kwa kigala chiluli kulawa kilanga leka kulakaza nhambiko.

27 Mkulu Nguluwi nakamlajiza mhilisi yahiluse ipanga lya heye, naye mhilisi nakahilusa lila ipanga myala yake. 28 Mhela awo, Daudi loyawene kota Mkulu Nguluwi nakamwidichila kula kuli luga lwa kupululila nyhule lwa Alauna, Myebusi, nakalavya nhambiko ako. 29 Ihema lya Mkulu Nguluwi liwele Musa nakaligongomanya kula kugunuche, hamwe na honhu ha kulavila nhambiko za kulakazwa, mhela awo navyali hali honhu ha kufugamila ako Gibeoni. 30 Daudi hawezile kuluta ako kumlanda utanzi Nguluwi kwa vila nayali yolidumba ipanga lya yula mhilisi wa Mkulu Nguluwi.