1 Daudi loyawele sekulu wa miyaka minji, nakamdita Solomoni, mwanage, yawe mndewa wa isi ya Isilaeli.

2 Mndewa Daudi nakawakungajiza vilongozi weng'ha wa isi ya Isilaeli na watambika na Walawi wanji. 3 Walawi weng'ha walume wawele na miyaka makumi gadatu na kulutilila, nawawazigwa. Hisabu ya hewo nayali elufu makumi gadatu na nane (38,000). 4 Hali hewo, Daudi nakawabagula Walawi elufu makumi meli na zine (24,000) leka wawe vilongozi wa wakola mijito ja Ng'handa ya Mkulu Nguluwi na wanhu elufu sita (6,000) wawe vilongozi wakulu na watagusa 5 na wanhu elufu zine (4,000) leka wawe wamizi wa hali lwizi na wanhu elufu zine (4,000) leka wawe walingwimba womtogola Mkulu Nguluwi kwa vinhu vya muzichi viwele navigongomanyigwa na mndewa Daudi kwa chiwalo acho.

6 Daudi nakawagawa Walawi kuli vilundo vidatu kwa kiwhana na ng'holo za nhanzi ya Lawi. Lukolo lwa Gelishoni na lukolo lwa Kohati na lukolo lwa Melali.

7 Wana walume wa Gelishoni nawali weli, wawele ndo Ladani na Shimeyi. 8 Ladani nayali na wana walume wadatu wawele ndo Yehieli, yawele ndo wa mwaluko na Setamu na Yoeli. 9 Shimeyi nayali na wana walume wadatu wawele ndo Shelomoti na Hasieli na Halani. Awa wadatu nawali vilongozi wa ivyazi lya Ladani. 10 Shimeyi nayali na wana walume wanji wane, wawele ndo Yahati na Sina na Yeushi na Beliya. 11 Yahati nayali wa mwaluko hali hewo na Sina nayali wa keli, ila Yeushi na Beliya hawawele na wana wenji, ahyo nawawazigwa kota ivyazi limwe na nawapegwa mijito jimwe.

12 Kohati nayali na wana walume wane, wawele ndo Amulamu na Isihali na Hebuloni na Usieli. 13 Wana walume wa Amulamu nawali Aluni na Musa. Aluni nayali yawichigwe chiuyeng'ha leka yawe yoviwika chiuyeng'ha vinhu vyelile ng'hatu na walelwa wa heye wawe wofunyhiza ubani hali Mkulu Nguluwi mazuwa gose, womkolela mijito na kuwatambichiza wanhu kwa itagwa lya Mkulu Nguluwi, mazuwa gose. 14 Ila wana wa Musa, munhu wa Nguluwi, nawawazigwa kota ndo honhu ha nhanzi ya Lawi. 15 Wana walume wa Musa nawali Gelishomu na Elieseli. 16 Gelishomu nayali na wana walume, mwana wa heye wa mwaluko nayali Shebueli. 17 Lehabiya nayali ndo mwana wa udewele wa Elieseli, ila heye Lehabiya nayali na wana wenji lukami.

18 Mwana mlume wa mwaluko wa Isihali nayali yochemigwa Shelomiti, yawele nayali ndo chilongozi wa lukolo lweng'ha. 19 Hebuloni nayali na wana walume wane, wa mwaluko nayali yochemigwa Yeliya na wa keli nayali yochemigwa Amaliya na wa kadatu nayali yochemigwa Yahasieli na wa kane nayali yochemigwa Yekameamu. 20 Usieli nayali na wana walume weli, wa mwaluko nayali yochemigwa Mika na wa keli nayali yochemigwa Ishiya.

21 Melali nayali na wana walume weli, wawele ndo Mahili na Mushi. Mahili nayali na wana walume weli, wawele ndo Eleasali na Kishi. 22 Eleasali nakabagama yalihela mwana mlume, ila nayali na wahinza hela. Wahinza awo nawaholeka na wang'holozawo, wana walume wa Kishi. 23 Mushi nayali na wana walume wadatu wawele ndo Mahili na Edeli na Yelemoti.

24 Awo nawali ndo wana wa Lawi kwa kiwhana na ng'holo zawo. Chila yumwe wa hewo yawele nayali na miyaka makumi meli na mzidi nakakola mijito kuli ng'handa ya Mkulu Nguluwi. 25 Kwa vila Daudi nakalonga, "Mkulu Nguluwi, Nguluwi wa Isilaeli, nakawapa wanhu wa heye kikala goya, naye kochikala kuli muji wa Yelusalemu mazuwa gose. 26 Ahyo, Walawi hawalinguganigwa kahi kulipika ihema lya Nguluwi ne vinhu vyake." 27 Kwa kiwhana na malajizo ga kuduma ga Daudi, Walawi weng'ha wawele nawali na miyaka makumi meli na mzidi nawandichigwa. 28 Mijito jawo najali ndo kuwatanza watambika wa lukolo lwa Aluni kuli mijito ja kuli ng'handa ya Mkulu Nguluwi, mijito ajo ndo kulolela lugagala na vihengo na kuhovuga vinhu vyelile vyeng'ha na kukola mijito jinji ja kuli ng'handa ya Mkulu Nguluwi. 29 Nawali kahi na mijito ja kulolela mibumunda jelile na nhambiko za nyhule na mibumunda johajiwichigwe usaso na mijito ja kubanika na kuhanzanya, hamwe na mijito jilinguwala vipimilo vyeng'ha vya winji na ukulu. 30 Kahi nawaganigwa kulonga malumbo kwa Mkulu Nguluwi na kumtogola, chila mhela wa mitondo na matinazo 31 na mhela woneche wa kumlavila Mkulu Nguluwi nhambiko za kulakazwa, kuli mazuwa ga Kwesela na kuli mnvina za kulawa kwa nyelezi na kuli mnvina zinji ziwichigwe. Nawaganigwa kukola mijito hali Mkulu Nguluwi chila mhela kwa hisabu ya hewo ilinguganigwa na kota vyowalajizwe. 32 Ahyo, Walawi nawali woganigwa kulilolela ihema lya Nguluwi na honhu helile na kuwatanza wang'holozawo watambika, wawele ndo walelwa wa Aluni, kwa chiwalo cha uchitumagwa wa kuli ng'handa ya Mkulu Nguluwi.