1 Ahyo, wanhu weng'ha wa Isilaeli nawandichigwa kuli lukolo na matagwa ago nagandichigwa kuli Chitabu cha Wandewa wa Isilaeli. Wanhu wa Yuda nawali wahilikwe kuli isi ya chijenzi ako Babuloni kwa vila nawadita gehile hali Nguluwi. 2 Wanhu wa mwaluko kuhiluka haluga hawo kuli muji wa hewo nawali Waisilaeli na watambika na Walawi na vitumagwa wa kuli Ng'handa ya Nguluwi. 3 Wamwe wa wanhu wa nhanzi ya Yuda na Benjamini na Efulaimu na Manase nawaluta kikala kuli muji wa Yelusalemu.

4-6 Nakwali na wanhu miya sita na makumi tisa (690) kulawa kuli nhanzi ya Yuda wawele nawekala ako Yelusalemu. Lulelo lwa mwana wa Yuda, yawele ndo Pelesi nalwali na chilongozi yawele ndo Utayi, mwana wa Amihudi, mwana wa Omuli. Wasekulu wake wanji ndo Imuli na Bani. Lukolo lwa Shela, kulawa kuli nhanzi ya Yuda, nalwali na chilongozi yawele nayali yochemigwa Asaya, yawele kahi nayali ndo mwana wa mwaluko kuli ivyazi lya heye. Lulelo lwa mwana wa Yuda yawele nayali yochemigwa Sela, nalwali na chilongozi yawele nayali yochemigwa Yeueli.

7,8 Wanhu walinguya wa nhanzi ya Benjamini wawele nawekala ako Yelusalemu, nawali ndo Salu, mwana wa Meshulamu, mwana wa Hodaviya, mwana wa Hasenuwa na Ibuneya, mwana wa Yelohamu na Ela, mwana wa Usi, mwana wa Mikili na Meshulamu, mwana wa Shefatiya, mwana wa Leueli, mwana wa Ibuniya.

9 Nakwali na wanhu miya tisa na makumi gahano na sita (956). Wanhu weng'ha wawele nawandichigwa aho hachanya nawali vilongozi wa ivyazi lyawo.

10-12 Watambika wawele nawekala ako Yelusalemu nawali ndo Yedaya na Yehoyalibu na Yakini na Asaliya, mwana wa Hilikiya, mwana wa Meshulamu, mwana wa Sadoki, mwana wa Melayoti, mwana wa Ahitubu, yawele nayali chilongozi wa ng'handa ya Nguluwi na Adaya, mwana wa Yelohamu, mwana wa Pashuli, mwana wa Malikiya na Maasayi, mwana wa Adieli, mwana wa Yasela, mwana wa Meshulamu, mwana wa Meshilemiti, mwana wa Imeli. 13 Watambika wawele nawali ndo vilongozi wa ivyazi lyawo nawali elufu imwe na miya saba na makumi sita (1,760). Nawali wawanzi wa chila mbuli ilingukoleka kuli ng'handa ya Nguluwi.

14-16 Walawi wawele nawekala ako Yelusalemu nawali ndo Shemaya na Bakibakali na Heleshi na Galali na Mataniya na Obadiya na Belekiya. Shemaya nayali mwana wa Hashubu, Hashubu nayali mwana wa Asilikamu, Asilikamu nayali mwana wa Hashabiya wa kulawa kuli lukolo lwa Melali. Mataniya nayali mwana wa Mika, Mika nayali mwana wa Sikili, Sikili nayali mwana wa Asafu. Obadiya nayali mwana wa Shemaya, Shemaya nayali mwana wa Galali, Galali nayali mwana wa Yedutuni. Belekiya nayali mwana wa Asa, Asa nayali mwana wa Elikana, wawele nawali wochikala kuli vijiji vya muji wa Netofahi.

17 Wamizi wa lwizi ja ng'handa ya Nguluwi wawele nawali wochikala ako Yelusalemu nawali ndo Shalumu na Akubu na Talimoni na Ahimani na wang'holozawo. Shalumu nayali ndo chilongozi wa hewo. 18 Wamizi awo nawali wokwamila kuli lwizi lwa mndewa luwele kuli ubanzi wa kolilawilaga isanya. Awo nawali wamizi kulawa kuli kambi ya Walawi.

19 Shalumu, mwana wa Kole, mwana wa Ebiasafu, mwana wa Kola, hamwe na wang'holoze wa lukolo lwa Kola, nawali wokola mijito ja kwamila lwizi lwa ihema lyelile kota wasekulu wa hewo vyowawele wokwamila hali honhu ha kwinjilila ha ihema lya Nguluwi. 20 Aho katali Finehasi, mwana wa Eleasali, nayali chilongozi wa wamizi, naye Mkulu Nguluwi nayali hamwe na heye.

21 Sekaliya, mwana wa Meshelemiya, nayali mwamizi wa lwizi lwa ihema lya Nguluwi.

22 Hisabu ya wanhu wawele nawahaguligwa kuwa wamizi hali lwizi lwa ihema lya Nguluwi nayali wanhu miya mbili na kumi na weli (212). Nawandichigwa kwa kuwinza ng'holo zawo hali vijiji vyowawele nawali wochikala. Mndewa Daudi na mloli Samweli ndo wawawichile wamizi awo kuli mijito ja hewo ja kukundigwa. 23 Wanhu awo hamwe na walelwa wa hewo, nawali vilongozi wa wamizi wa kwamila lwizi ja ihema lya Mkulu Nguluwi. 24 Wamizi nawahilikwa kuli banzi zeng'ha, ziwele ndo kolilawilaga isanya na kolizinjilaga isanya na kasikazini na kusini. 25 Wang'holozawo kulawa kuli vijiji vya hewo nawali woluta chila mhela leka kuwatanza kukola mijito ja hewo, kwa mhela wa mazuwa saba. 26 Nakwali na wamizi wakulu wane, wawele nawali ndo Walawi, nawapegwa mijito ja kulolela vihengo na ng'hano kuli ihema lya Nguluwi. 27 Nawekala nechilo yeng'ha habehi na ihema lya Nguluwi kwa vila nawali na mijito ja kulyamila na kuchumula lwizi ja ihema alyo chila mitondo.

28 Walawi wamwenga nawali na mijito ja kulolela vinhu viwele navyali vikolelwa mijito kuli ng'handa ya Nguluwi. Vinhu avyo navyali viwazigwa chila mhela wa kuhilikwa na kulavigwa kuli ng'handa ya Nguluwi. 29 Wanji nawahaguligwa kukola mijito kwa chiwalo cha vinhu vya ng'handa ya Nguluwi na vinhu vyake vyelile vyeng'ha, hamwe na utimbo unojile na divai na mafuta ga mzeituni na ubani na unhunyhililo. 30 Ila mbuli ya kuwika goya unhunyhililo naiditigwa na watambika.

31 Metitiya, yumwe wa Walawi, mlelwa wa mwaluko wa Shalumu, kulawa kuli lukolo lwa Kola, nakapegwa mijito ja kuteleka mibumunda ja nhambiko. 32 Walawi wanji kulawa kuli lukolo lwa Kohati, nawapegwa mijito ja kuteleka mibumunda ja honhu helile kuli chila zuwa lya Kwesela.

33 Wala wawele nawali wokwimba, wawele ndo vilongozi wa ivyazi lya Walawi, nawekala kuli vihengo vya ng'handa ya Nguluwi na hawaganigwe kupegwa mijito jinji kwa vila nawali wokola mijito jawo nemisi na nechilo. 34 Wanhu weng'ha awo nawali vilongozi wa ivyazi kuli nhanzi ya Walawi, kwa kuwinza ng'holo zawo, wawele nawali wochikala Yelusalemu.

35 Yeieli nayali ndo chaluchizo cha muji wa Gibeoni, muji uwele nayali yochikala heye hamwe na mchewake yawele nayali yochemigwa Maaka. 36 Mlelwa wa heye wa mwaluko nayali yochemigwa Abudoni, walelwa wa heye wanji nawali ndo Suli na Kishi na Baali na Neli na Nadabu 37 na Gedoli na Ahiyo na Sekaliya na Mikiloti. 38 Mikiloti nayali na mwana mlume yawele nayali yochemigwa Shimeamu. Hewo kahi nawekala ako Yelusalemu habehi na wang'holozawo.

39 Neli nayali na mwana mlume yawele nayali yochemigwa Kishi, naye Kishi nayali na mwana mlume yawele nayali yochemigwa Sauli. Sauli nayali na wana walume wane, wawele ndo Yonatani na Maliki-shuwa na Abinadabu na Eshibaali. 40 Yonatani nayali na mwana mlume yawele nayali yochemigwa Melibu-baali, naye Melibu-baali nayali na mwana mlume yawele nayali yochemigwa Mika. 41 Mika nayali na wana walume wane, wawele ndo Pitoni na Meleki na Taleya na Ahasi. 42 Ahasi nayali na mwana mlume yawele nayali yochemigwa Yalahi, naye Yalahi nayali na wana walume wawele ndo Alemeti na Asimaweti na Simuli, naye Simuli nayali na mwana mlume yawele nayali yochemigwa Mosa. 43 Mosa nayali na mwana mlume yawele nayali yochemigwa Bineya, naye Bineya nayali na mwana mlume yawele nayali yochemigwa Lefaya, naye Lefaya nayali na mwana mlume yawele nayali yochemigwa Eleasa, naye Eleasa nayali na mwana mlume yawele nayali yochemigwa Aseli.

44 Aseli nayali na wana walume sita, wawele ndo Asilikamu na Bokelu na Ishimaeli na Shealiya na Obadiya na Hanani.