1 Daudi nakalongasa na vilongozi wa wamizi wa vilundo vya maelufu na vilundo vya mamiya, hamwe na vilongozi wanji weng'ha. 2 Hamba Daudi nakailonjela nhing'hano yeng'ha ya Waisilaeli, "Wone naiwa goya kwa hemwe na wone ndo kugana kwa Mkulu Nguluwi, Nguluwi wa hetwe, tulajize usenga kwa wang'holozetu wanji wawele kutali na wawele habehi kuli isi yeng'ha ya Isilaeli, kahi kwa watambika na Walawi wawele hamwe na hewo kuli miji jawo na kuli honhu ha hewo ha kudimila, leka woye welumbe na hetwe. 3 Hamba tulute kulihola isanduku lya ilagano lya Nguluwi wa hetwe, kwa vila natulibeza kuli mhela wa ulongozi wa mndewa Sauli." 4 Wanhu weng'ha nawaukunda ulonzi awo kwa vila nawoneka kota ndo mbuli inojile.

5 Ahyo, Daudi nakawakungajiza Waisilaeli weng'ha wa kuli isi, kulawa kuli lwanda lwa Shiholi luwele Misili mbaka Lebo-hamati leka kuligala isanduku lya ilagano kulawa Kiliati-yealimu. 6 Daudi na Waisilaeli weng'ha nawaluta mbaka kuli muji wa Baala, uwele ndo Kiliati-yealimu, kuli isi ya Yuda, leka kulihola isanduku lya ilagano, lilinguchemigwa kwa itagwa lyake Mkulu Nguluwi, yalingikalisa kuli chigoda cha heye cha undewa, hagati ha vilumbigwe viwele na mabawa. 7 Lelo nawalihola isanduku lya ilagano lya Nguluwi kulawa kuli ng'handa ya Abinadabu kwa mutuka unyale wa kukwejigwa na misenga. Usa na Ahio nawendesa mutuka awo. 8 Daudi na Waisilaeli weng'ha nawali womtogola Nguluwi kwa mong'ho wawo weng'ha, kwa nzimbo na kwa ving'hweleng'hwele na kwa igombogombo na kwa ngoma ndodo na kwa matoazi na kwa mhalamhanda.

9 Lowafichile kuli honhu ha kupululila nyhule ha Kidoni, Usa nakaugolola moko wa heye leka kulibatilila isanduku lya ilagano kwa vila jila misenga najikwang'hwala. 10 Mkulu Nguluwi nakazudizwa na Usa kwa chiwalo cha kibata isanduku lya ilagano, nakamkopola. Ahyo Usa nakabagama baho du hali Nguluwi. 11 Daudi nakazudila kwa vila ng'halazi ya Mkulu Nguluwi nayali ing'hang'hale kwa Usa. Lelo, kulawa mhela wula honhu aho nahachemigwa Pelesi-usa.

12 Zuwa alyo Daudi nakamdumba Nguluwi, nakalonga, "Lelo ndoweza ndaze kulihilika isanduku lya ilagano habehi na ng'handa ya heni?" 13 Lelo Daudi halihiliche isanduku lya ilagano kuli muji wa heye, ila nakalihilika kuli ng'handa ya Obedi-edomu, Mgiti. 14 Isanduku lya ilagano nalisigala na ivyazi lya Obedi-edomu, haluga ha heye kwa mhela wa myezi jidatu, naye Mkulu Nguluwi nakaitambichiza ng'handa ya Obedi-edomu na vinhu vyeng'ha vyoyawele navyo.