1 Awa ndo walelwa wa Lubeni, yawele ndo mlelwa wa mwaluko wa Isilaeli. Hanga Lubeni nayali mlelwa wa mwaluko, hachi ya heye ya ulelwa wa mwaluko nakapegwa Yusufu mng'holoze, kwa vila Lubeni nakambasa soni mhaza wa heye kwa kuwasa na mha wa mhaza wa heye. Ahyo, Lubeni hawichigwe kuli matagwa ga lukolo lwa hewo kwa kuwinza hachi ya heye ya mlelwa wa mwaluko. 2 Hanga nhanzi ya Yuda nayali na mong'ho ng'hatu kusinda nhanzi zinji na vilongozi nawalawa amo, ila hachi ya mlelwa wa mwaluko nakapegwa Yusufu. 3 Wana walume wa Lubeni nawali ndo Hanoki na Palu na Hesiloni na Kalimi.

4 Walelwa walume wa Yoeli kulawa lulelo lumwe mbaka lulelo lunji nalwali ndo Shemaya na Gogi na Shimeyi 5 na Mika na Leaya na Baali 6 na Beela, yawele nakaholigwa na mndewa Tigilati-pileseli wa Ashulu na kuhilikwa kuli isi ya chijenzi. Beela nayali chilongozi wa Walubeni.

7 Vilongozi wa ng'holo azi matagwa gawo nagandichigwa kwa kiwhana na kukumbuchila kwa nhanzi ya Lubeni. Vilongozi awo ndo Yeieli na Sekaliya 8 na Bela, mwana wa Asasi, mzukulu wa Shema, wa lukolo lwa Yoeli. Lukolo alo nalwali luchikala ako Aloeli na kuli honhu heng'ha ha kasikazini mbaka Nebo na Baali-meoni. 9 Kwa vila migongolo ja hewo najali jonjezeche ako Gileadi, nawenela kuli ubanzi wa kolilawilaga isanya mbaka hafungo ha kugunuche kuwele nakwenela mbaka kuli lwanda lwa Eyufulate.

10 Kuli mhela wa ulongozi wa mndewa Sauli, nhanzi ya Lubeni nayaluka kitowa na Wahagali, nawawakopola na kuihola isi ya hewo. Hamba nawekala kuli mihema ja Wahagali kuli honhu heng'ha ha kolilawilaga isanya mwa Gileadi.

11 Wanhu wa nhanzi ya Gadi nawekala kuli ubanzi wa kasikazini mwa nhanzi ya Lubeni kuli isi ya Bashani, iwele nayenela kulawa ubanzi wa kolilawilaga isanya mbaka kuli muji wa Saleka. 12 Yoeli nayali ndo chaluchizo cha lukolo lulongoze na Shafamu nayali chaluchizo cha lukolo lwa keli. Yanayi na Shafati nawali chaluchizo cha lukolo lunji ako Bashani. 13 Wang'holozawo kwa kuwinza ng'holo zawo nawali saba, wawele ndo Mikaeli na Meshulamu na Sheba na Yolayi na Yakani na Siya na Ebeli.

14 Weng'ha awa nawali walelwa walume wa Abihaili, mwana wa Huli, mwana wa Yaloya, mwana wa Gileadi, mwana wa Mikaeli, mwana wa Yeshishayi, mwana wa Yado, mwana wa Busi. 15 Ahi, mwana mlume wa Abidieli, mzukulu wa Guni, nayali chilongozi wa ng'holo zawo. 16 Nawekala Gileadi kuli isi ya Bashani na miji jake na kuli honhu ha kudimila ha Shaloni mbaka kuli mbaka ja isi. 17 Awo weng'ha nawandichigwa kuli kukumbuchila kwa ng'holo zawo, kuli mazuwa ga Yotamu, mndewa wa Yuda na Yeloboamu, mndewa wa Isilaeli.

18 Nhanzi za Lubeni na Gadi na Manase ya ubanzi wa kolilawilaga isanya mwa lwanda lwa Yolodani, nazali na wamizi wazidahe elufu makumi gane na wane na miya saba na makumi sita (44,760), wawele nawalanguswa goya kutumiya ngawo na mipanga na mipinde na misale. 19 Nawetowa na nhanzi za Wahagali na Wayetuli na Wanafishi na Wanodabu. 20 Nawali wochitumbila kwa Nguluwi na nawamlanda yawatanze, naye nakedichila kulanda kwa hewo na kuwawika Wahagali hamwe na goloko wa hewo mmoko mwawo. 21 Nawahola migongolo ja Wahagali, jiwele ndo ngamiya elufu makumi gahano (50,000) na ming'holo lachi mbili na elufu makumi gahano (250,000) na midogowi elufu mbili (2,000), kahi nawawahola wapogozi wa ngondo lachi imwe (100,000). 22 Nawawakopola wang'honyo wenji lukami kwa vila ngondo ayo nayali ndo ya Nguluwi. Nawalutilila kikala kuli isi ayo mbaka mhela wa kuluta kuli isi ya chijenzi loufichile.

23 Wanhu wa Manase wa kulawa kolilawilaga isanya nawekala kuli isi ya Bashani. Nawonjezeka lukami, nawenela ubanzi wa kasikazini mbaka Baali-helimoni na Senili na chidunda cha Helimoni. 24 Wakulu wa ng'holo za nhanzi ayo nawali ndo Efeli na Ishi na Elieli na Asilieli na Yelemiya na Hodaviya na Yadieli. Weng'ha nawali wamizi wazidahe na wazeleche ng'hatu na ndo vilongozi wa ng'holo azo.

25 Ila wanhu nawambelenhuka Nguluwi wa wasekulu wa hewo, nawadita kota wang'hondwa kwa kujifugamila milungu ja wenyeng'haye wa isi azo, wawele Nguluwi nakawadumya hali hewo. 26 Lelo, Nguluwi wa Isilaeli nakamwimiza Pulu, yawele nayali ndo mndewa wa Ashulu, yawele kahi nayali yozeleka kota Tigilati-pileseli. Ayo nakaivaba isi ya hewo na kuwahola Walubeni na Wagadi na nhanzi ya Manase ya kolilawilaga isanya na kuwahilika mbaka kuli isi za chijenzi ako Halahi na Haboli na Hala na hafungo ha lwanda lwa Gosani, kuwele nawali wochikala kulawa mhela awo.